ཕྱི་ལོ་ ༢༠༡༩ ཟླ་ ༡༡ ཚེས་ ༡༡ རེས་གཟའ་ཟླ་བ།
༄༅། །ཨ་རིའི་ཝ་ཤིན་ཊོན་མངའ་སྡེའི་ནང་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ Association of Washington Generals ཞེས་པའི་གོ་སྒྲིག་འོག་ཕྱི་ལོ་ ༢༠༡༩ ཟླ་ ༡༡ ཚེས་ ༡༡ ཉིན་གྱི་སྔ་དྲོ་ཨ་རིའི་ཝ་ཤིན་ཊོན་ Washington State མངའ་སྡེའི་སྲིད་སྐྱོང་གཞོན་པ་ས་ཡི་ར་སི་ཧ་བྷི་ Cyrus Habib ལགས་ཀྱིས་གཙོས་ཨ་རིའི་སེ་ཨ་ཊལ་ Seattle བོད་རིགས་སྤྱི་མཐུན་ཚོགས་པའི་ཚོགས་གཙོ་ཟུར་པ་སྤྱི་ཟུར་བཀྲ་ཤིས་རྣམ་རྒྱལ་ལགས་དང་། དེ་བཞིན་ཨ་རིའི་ཝ་ཤིན་ཊོན་ Washington State མངའ་སྡེ་ནང་གི་སློབ་གྲྭ་ཁག་གཅིག་གི་སློབ་མ་དང་གཞུང་དང་གཞོན་འབྲེལ་མ་ཡིན་པའི་ཚོགས་པ་ཁག་གཅིག་གི་ ༢༠༢༠ ལོའི་བྱམས་བརྩེའི་སྐུ་ཚབ་ཚོགས་ཆུང་གི་སྐུ་ཚབ་གྲངས་ ༢༤ བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོར་གོང་གི་སྐུ་ཚབ་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་རྗེས་སྐུ་བཅར་རྣམ་རྒྱལ་གྲྭ་ཚང་གི་ཚོགས་ཁང་དུ་གསར་འགོད་གསལ་བསྒྲགས་ཤིག་སྤེལ་སོང་།
སྐབས་དེར་གསར་འགོད་པས་ཁོང་རྣམ་པར་མཇལ་ཁ་ཞུ་སྐབས་མགོན་པོ་གང་ཉིད་མཆོག་གིས་བཀའ་སློབ་གཙོ་བོ་གང་ཕེབས་སྐོར་དྲིས་པར། ཝ་ཤིན་ཊོན་མངའ་སྡེའི་སྲིད་སྐྱོང་གཞོན་པ་ས་ཡི་ར་སི་ཧ་བྷིབ་ལགས་ཀྱིས་གསར་འགོད་པར་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་མང་རིང་བྱམས་བརྩེའི་སྐོར་བཀའ་སློབ་ཕེབས་ཡོད། ད་དུང་ཡིན་ནའང་ཨ་རིའི་ནང་མཚོན་ན་འདས་པའི་ལོ་ངོ་བཅུའི་རིང་ཕྱོགས་གང་ས་ཅི་ཐད་ནས་བལྟས་ཀྱང་བྱམས་བརྩེ་གོང་མཐོར་དེ་ཙམ་འགྲོ་ཐུབ་མི་འདུག ད་དུང་ཡིན་ནའང་ལས་ཀ་བྱེད་དགོས་པ་མང་པོ་འདུག
རྣམ་པ་ཚོས་མཁྱེན་གསལ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེའི་སྐོར་ཕྱག་དེབ་མང་པོ་ལྗགས་རྩོམ་མཛད་ཡོད། གཞན་གཅེས་འཛིན་དང་གཞན་ཕན་གྱི་བསམ་བློ་དེ་ནི་རང་ཉིད་བདེ་སྐྱིད་འབྱུང་བའི་རྒྱུ་རྐྱེན་གཙོ་བོ་དེ་ཡིན། ཁོང་ཁྲོ་དང་རང་གཅེས་འཛིན་གྱི་བློ་དེས་ལུས་པོའི་འཕྲོད་བསྟེན་དང་། སེམས་བློ་ཞི་བདེ་ཡོང་བར་འགོག་རྐྱེན་བཟོ་བཞིན་ཡོད། གཞན་ལ་རོགས་རམ་བྱས་ན་སོ་སོ་སྒེར་ལ་ཕན་ཐོགས་ཡོང་། ཨ་མི་རི་ཀ་རྒྱལ་ཁབ་ནི་སྟོབས་ཆེན་རྒྱལ་ཁབ་ཅིག་ཡིན་སྟབས་འཛམ་གླིང་གི་སྣེ་ཁྲིད་དགོས་པ་མ་ཟད། ལྷག་པར་གོ་ལའི་ཁོར་ཡུག་སྲུང་སྐྱོབ་ཀྱི་ལས་འགུལ་ཐད་ངེས་པར་སྣེ་ཁྲིད་ཐུབ་པ་བྱེད་དགོས། ཧི་མཱ་ལ་ཡ་རི་རྒྱུད་ཁུལ་ལ་དེ་སྔ་ཡིན་ན་ཁ་བ་མང་པོ་བཏང་གི་འདུག ད་ཆ་གོ་ལའི་ཚ་དྲོད་རྒྱས་པར་བརྟེན་གངས་མང་པོ་འབབ་ཐུབ་ཀྱི་མེད་པ་སོགས་ཀྱི་གནད་དོན་སྐོར་བཀའ་སློབ་སྩལ་སྐོར་གསུངས།
ཨ་རིའི་ཝ་ཤིན་ཊོན་མངའ་སྡེའི་སྲིད་སྐྱོང་གཞོན་པ་ས་ཡི་ར་སི་ཧ་བྷི་ལགས་ཀྱི་ཕ་མ་ནི་ཨེ་རན་ Iran ནས་ཨ་རིར་གཞི་སྤོས་བྱས་པ་ཡིན་འདུག ཁོང་ལོ་ན་དྲུག་ལ་སོན་སྐབས་འབྲས་ནད་ཀྱི་རྐྱེན་པས་མིག་གཉིས་ལོང་བར་གྱུར་འདུག འོན་ཀྱང་ཁོང་གིས་ཨ་རིའི་མཐོ་སློབ་གྲགས་ཅན་ཁོ་ལམ་བྷི་ཡའི་ Columbia University ནང་རྩོམ་རིག་ཐོག་ཉེ་བའི་རབ་འབྱམས་པའི་སློབ་སྦྱོང་དང་། ཨིན་ཡུལ་གྱི་མཐོ་སློབ་གྲགས་ཅན་ཨོ་སི་ཁི་སི་ཧྥོར་ཊིའི་ Oxford University ནང་རྩོམ་རིག་ཐོག་རབ་འབྱམས་པའི་སློབ་མཐར་སོན་པ་མ་ཟད། ཨ་རིའི་མཐོ་སློབ་གྲགས་ཅན་ཡེལ་ Yele Law School ནང་ཁྲིམས་ལུགས་རིག་པའི་ཐོག་སློབ་སྦྱོང་ལེགས་པར་ཐོན་འདུག་པ་བཅས། །
