ཕྱི་ལོ་ ༢༠༡༩ ཟླ་ ༡༡ ཚེས་ ༢༡ རེས་གཟའ་ཕུར་བུ། 

༄༅། །འདི་གར་ཕྱི་དྲིལ་དབུ་མའི་ལམ་ལས་འཆར་ཚན་པས་ས་གནས་ནས་བཏང་གནས་ནང་འཁོད་དོན།  བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་གྱི་ལས་འཆར་ཚན་པའི་གོ་སྒྲིག་འོག ཕྱི་ལོ་ ༢༠༡༩ ཟླ་ ༡༡ ཚེས་ ༡༨ ནས་ ༢༠ བར་ཉིན་གྲངས་གསུམ་རིང་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་སེར་བྱེས་ཡིད་དགའ་ཆོས་གླིང་དུ་སྦེང་ལོར་ལྷོ་སྤྱི་གཙོས་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་དང་། ལས་དྲུང་། གཞན་ཡང་ས་གནས་འཐུས་ཚོགས་ཀྱི་ཚོགས་མི་བཅས་ལ་དབུ་མའི་ལམ་དང་འབྲེལ་བའི་ཟབ་འཁྲིད་པའི་ཟབ་སྦྱོང་ཞིག་གོ་སྒྲིག་ཞུས་ཡོད།

ཟབ་སྦྱོང་ཐོག་ཁྱད་སྟོན་པ་ལྕམ་ཇ་ཡ་ཨ་ཡར་ Jaya Iyer ལགས་དང་སྐུ་ཞབས་ཧི་ཏེཤ་ར་ཝཏ་ Hitesh Rawat ལགས་རྣམ་གཉིས་དང་། གཞན་ཡང་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཀྱིས་གཉིས་སྨན་དབུ་མའི་ལམ་གྱི་སྲིད་བྱུས་སྐོར་གསུང་བཤད་དང་འབྲེལ་དོགས་དྲི་ཁག་ལ་ལན་འདེབས་གསལ་བཤད་གནང་ཡོད།

སྤྱིར་ཕྱི་དྲིལ་དབུ་མའི་ལམ་ལས་འཆར་ཚན་པས། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་དང་། གཞུང་འབྲེལ་མིན་པའི་ཚོགས་ཁག་བཅས་ལ་ཟབ་འཁྲིད་པའི་ཟབ་སྦྱོང་ཕུལ་ཡོད། འོན་ཀྱང་ད་ལན་རྒྱ་གར་ལྷོ་ཕྱོགས་ཁུལ་གྱི་ས་གནས་འགོ་འཛིན་རྣམས་ལ་ཟབ་སྦྱོང་གོ་སྒྲིག་ཞུས་པ་ཐེངས་དང་པོ་ཆགས་ཀྱི་ཡོད། 

དེ་ཡང་ཐེངས་འདིའི་ཟབ་སྦྱོང་ནང་ཁྱོན་མི་གྲངས་ ༢༣ མཉམ་ཞུགས་གནང་ཡོད་པ་དང་། ཟབ་སྦྱོང་གི་དམིགས་ཡུལ་གཅོ་བོ་ནི། ས་གནས་འགོ་འཛིན་གྱིས་གཙོས་ཟབ་སྦྱོང་བ་རྣམས་ཕྱིར་སོ་སོའི་ས་གནས་སུ་ཕེབས་རྗེས། ས་གནས་མི་མང་ལ་དབུ་མའི་ལམ་གྱི་སྐོར་གོ་རྟོགས་སྔར་ལྷག་སྤེལ་ཐུབ་ཆེད་ཡིན།

ཟབ་སྦྱོང་གོ་སྒྲིག་གནང་མཁན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་བྱེད་ནོར་བུ་དབང་འདུས་ལགས་དང་། ཚེ་རིང་ཕྱོགས་ལས་ལགས། མཁའ་འགྲོ་སྒྲོལ་མ་ལགས་བཅས་ཡིན། །