ཕྱི་ལོ་ ༢༠༡༩ ཟླ་ ༡༡ ཚེས་ ༡༥ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༡༤ ཉིན་རྒྱབ་སུད་སིའི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་བོད་མིའི་སྒྲིག་འཛུགས་ཀྱི་བོད་ཀྱི་འགྲེམས་སྟོན་ཁང་དང་སུད་སིའི་སྐུ་ཚབ་དོན་གཅོད་ཁང་གཉིས་ཀྱི་གོ་སྒྲིག་འོག་༼ ཕ་ཡུལ་ཕྱོགས་སུ་རྒྱང་བལྟ་བྱེད་པ། ༽ ཞེས་པའི་བརྗོད་གཞི་གཞིར་བཞག་ཐོག་ཉིན་གྲངས་གཉིས་རིང་གི་པར་རིས་འགྲེམས་སྟོན་དབུ་འབྱེད་གནང་ཡོད་པ་དང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གཙོས་སུད་སིའི་གྲོགས་ཚོགས་འཐུས་མི་སྐུ་ཞབས་ཁར་ལོ་ Carlo Sommaruga མཆོག དེ་བཞིན་ཕྱི་རྒྱལ་ཡུལ་གྲུ་ཁག་ནས་ཕེབས་པའི་གཟིགས་སྐོར་བ་མི་ཉུང་བ་ཞིག་ཕེབས་འདུག
དེ་ཡང་ཐེངས་འདིའི་འགྲེམས་སྟོན་གཙོ་བོ་ནི། རྒྱ་ནག་དམར་ཤོག་གཞུང་གིས་ཕྱི་ལོ་ ༡༩༤༩ ལོར་བོད་ས་དབང་སྒྱུར་འགོ་བཙུགས་པ་ནས་བཟུང་བོད་ཀྱི་དགོན་སྡེ་ཁག་གཏོར་བཤིག་དང་། བོད་མི་བཙོན་འཇུག་དང་དམར་གསོད་བཏང་བ། བོད་མིའི་འཐབ་རྩོད། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག དེ་བཞིན་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ། བཙན་བྱོལ་དུ་འབྱོར་རྗེས་བོད་མི་ཚོས་མུ་མཐུད་རྒྱལ་སྤྱིའི་སྟེང་བོད་དོན་ལས་འགུལ་དང་གོ་རྟོགས་ཇི་ལྟར་སྤེལ་དང་སྤེལ་མུས་སོགས་རྣམ་གྲངས་མ་འདྲ་བ་ ༡༡ ཙམ་གྱི་སྐོར་འགྲེམས་སྟོན་གནང་ཡོད་པ་བཅས། །
