ཕྱི་ལོ་ ༢༠༡༩ ཟླ་ ༡༡ ཚེས་ ༢༧ རེས་གཟའ་ལྷག་པ།

༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༢༧ རེས་གཟའ་ལྷག་པའི་ཕྱེད་ཡོལ་ཆུ་ཚོད་ ༣།༣༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག  ཆོས་རིག་དྲུང་ཆེ་ལུང་རྟོགས་ལགས་བཅས་དབུ་བཞུགས་ཐོག  བོད་མིའི་ཆོས་ཚོགས་ཐེངས་བཅུ་བཞི་པའི་དམིགས་བསལ་གྲོས་ཆོད་གཏན་འབེབས་བྱུང་བའི་ཐོག་གསར་འགོད་གསལ་བསྒྲགས་སྤེལ་རྗེས་གསར་འགོད་པའི་དྲི་བར་ལན་འདེབས་གསལ་བཤད་གནང་ཡོད། 

དམིགས་བསལ་གྲོས་ཆོད། 

སྔོན་གླེང་། 

༄༅། །ཕྱི་ལོ་ ༡༩༦༩ ནས་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་གསར་འགོད་པ་མང་པོས་གང་ཉིད་ཀྱི་ཡང་སྲིད་སྐོར་བཀའ་འདྲི་ཞུས་སྐབས། ཏཱ་ལའི་བླ་མའི་ཡང་སྲིད་ལམ་སྲོལ་སྔར་ལམ་བཞིན་རྒྱུན་སྐྱོང་དགོས་དང་མི་དགོས་བོད་མི་ཚོས་ཐག་གཅོད་བྱེད་དགོས་པ་ཞིག་རེད་ཅེས་བཀའ་ལན་བསྩལ་ཡོད་པ་དང་། ཕྱི་ལོ་༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འཕགས་ཡུལ་དྷ་རམ་ས་ལར་བསྐྱངས་པའི་ཆོས་ཚོགས་ཐོག་གང་ཉིད་ཀྱི་ཡང་སྲིད་དང་འབྲེལ་བའི་སྐོར་ལ་གལ་ཆེའི་བཀའ་ཡིག་ཅིག་ཆེད་སྩོལ་མཛད་ཡོད་པར། ཆོས་ཚོགས་དེའི་སྟེང་ནས་བཀའ་ཡིག་གི་ནང་དོན་ལ་སྤྱི་མོས་ཀྱིས་ངོས་ལེན་རྒྱབ་སྐྱོར་ཞུས་པའི་གྲོས་ཆོད་དོན་ཚན་༥ ཅན་ཞིག་ཀྱང་སྣོལ་འཇོག་བྱུང་ཡོད་ན། ད་ཆ་བོད་མི་སྤྱི་ཡོངས་ནས་༸རྒྱལ་བའི་ཡང་སྲིད་དང་འབྲེལ་བའི་གནད་དོན་ཐོག་ཁྲིམས་འཕེར་ཡིག་ཆ་བཟོ་འཇོག་བྱ་གལ་ཆེ་བ་ལྟར། ད་ལམ་ཆོས་ཚོགས་འདིའི་སྟེང་ནས་དེ་འབྲེལ་དམིགས་བསལ་གྲོས་ཆོད་ཅིག་སྣོལ་འཇོག་བྱ་རྒྱུ་དུས་ཀྱི་དགོས་མཁོར་མཐོང་།

གྲོས་ཆོད།  

༡༽ སྔ་མའི་ཐུགས་བསྐྱེད་དམ་བཅའ་དང་གདུལ་བྱ་འདུལ་བྱེད་ཀྱི་རྟེན་འབྲེལ་གྱི་དབང་གིས་འཕགས་མཆོག་འཇིག་རྟེན་དབང་ཕྱུག་མིའི་རྣམ་པར་རོལ་བ་༸རྒྱལ་དབང་སྐུ་ཕྲེང་རིམ་པ་དང་བོད་མི་རྣམས་ནམ་ཡང་ཁ་འབྲལ་ཐབས་མེད་པ་དང་། ཁྱད་པར་བོད་གངས་ཅན་གྱི་སྐྱེ་འགྲོ་རྣམས་གཉན་འཕྲང་གི་འགག་ཆེན་ལ་ཐུག་པའི་དུས་སྐབས་འདིར། ༸གོང་ས་ཏཱ་ལའི་བླ་མའི་ཡང་སྤྲུལ་ལམ་ལུགས་སྔར་མུས་བཞིན་རྒྱུན་གནས་ངེས་པར་དགོས་པ་དང་། ༸རྒྱལ་བའི་ཡང་སྲིད་འཁྲུལ་བྲལ་རིན་པོ་ཆེ་མུ་མཐུད་ངེས་འབྱོན་དགོས་པ་བོད་མི་ཡོངས་ཀྱི་བཅོས་མིན་མངོན་འདོད་ཡིན་པར་བརྟེན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དེ་དོན་གསོལ་འདེབས་རྩེ་གཅིག་ཏུ་ཞུ་རྒྱུ། 

༢༽ ༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ཕེབས་ཕྱོགས་ཐག་གཅོད་གནང་རྒྱུའི་དབང་ཆ་ཡོངས་རྫོགས་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་རང་ཉིད་གཅིག་པུར་ཡོད་པ་ལས། གཞན་སྲིད་གཞུང་སོགས་སུ་ལའང་མེད། གལ་སྲིད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་གིས་སྲིད་དོན་གྱི་དགོས་མཁོ་ལ་བརྟེན་ནས་༸རྒྱལ་བའི་ཡང་སྤྲུལ་ངོས་འཛིན་དང་འདེམས་སྒྲུག་བྱས་པ་བྱུང་ཚེ། ཡང་སྤྲུལ་དེར་བོད་མི་རྣམས་ནས་ངོས་འཛིན་དང་དད་མོས་བྱ་རྒྱུ་མིན།  

༣༽ ༸གོང་ས་ཏཱ་ལའི་བླ་མའི་ཡང་སྲིད་ངོས་འཛིན་བྱེད་ཕྱོགས། ནང་པ་སངས་རྒྱས་པའི་གཞི་རྩའི་ལྟ་གྲུབ་ཡང་དག་ལ་བརྟེན་ཅིང་། མི་ལོ་བརྒྱད་བརྒྱ་ལྷག་ཙམ་སྔོན་ནས་བྱུང་བའི་བོད་ལུགས་ནང་བསྟན་གྱི་ཐུན་མོང་མ་ཡིན་པའི་ལམ་སྲོལ་ད་ལྟའི་བར་རྒྱུད་འཛིན་ལག་ལེན་བྱས་དང་བྱེད་མུས་ཡིན་པའི་བྱེད་ཐབས་དེ་ཉིད་ལ་བརྟེན་ནས་ངོས་འཛིན་བྱ་རྒྱུ་ཡིན་པ་བཅས་ཀྱི་སྤྱི་མོས་གྲོས་ཆོད་དུ། བོད་མིའི་ཆོས་ཚོགས་ཐེངས་ ༡༤ པའི་དབུ་བཞུགས་བླ་ཆེན་རྣམ་བ་དང་། ཚོགས་འཐུས་ཡོངས་ནས། བོད་རྒྱལ་ལོ་ ༢༡༤༦ ཕྱི་ལོ་ ༢༠༡༩ ཟླ་ ༡༡ ཚེས་ ༢༧ ལ། །