ཕྱི་ལོ་ ༢༠༡༩ ཟླ་ ༡༡ ཚེས་ ༢༢ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱིས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིར་གཞུང་འབྲེལ་ཕྱོགས་ཕེབས་གནང་བཞིན་པའི་སྐབས་དང་བསྟུན་ཕྱི་ཚེས་ ༢༠ ཉིན་རྒྱལ་ས་ཝ་ཤིང་ཊོན་དུ་བྱང་ཨ་རིའི་སྐུ་ཚབ་དོན་ཁང་གི་གོ་སྒྲིག་འོག རྒྱ་རིགས་མང་གཙོ་དོན་གཉེར་བ་དང་འགྲོ་བ་མིའི་ཐོབ་ཐང་འཐབ་རྩོད་པ་སོགས་ཁྱོན་ཕྱི་སྡོད་རྒྱ་རིགས་མི་གྲངས་ ༣༠ ཙམ་དང་ཐུག་འཕྲད་གནང་འདུག་པ་དང་།  དེ་ཁྲོད་རྒྱ་རིགས་ཁྲིམས་རྩོད་པ་དང་འགྲོ་བ་མིའི་ཐོབ་ཐང་འཐབ་རྩོད་པ་གྲགས་ཅན་སྐུ་ཞབས་ཁྲེན་ཀོང་ཁྲེང་ Mr Chen Guangcheng ལགས་དང་། ཝེ་ཅེང་ཧྲེང་ Mr Wei Jingsheng ལགས། དེ་བཞིན་རྒྱ་ནག་མི་དམངས་སྟོབས་ཤུགས་ཚོགས་པའི་འགན་འཛིན་ཡང་ཅེན་ལི་ Dr Yang Jianli ལགས་སོགས་ཡོད་འདུག སྐབས་དེར་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་ཚོ་ལགས་ཀྱིས་ངོ་སྤྲོད་གསུང་བཤད་དང་། སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་རྒྱ་ནག་གི་དབང་སྒྱུར་འོག་དཀའ་སྡུག་མྱོང་བཞིན་པའི་བོད་མི་དང་རྒྱ་ནག་མི་མང་བཅས་ཀྱི་རང་དབང་དོན་དུ་ཕྱར་བ་གྲུ་འདེགས་དགོས་གལ་སྐོར་གསུངས།

དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་ནག་དམར་པོའི་དབང་སྒྱུར་འོག་དཀའ་ངལ་ཧ་ཅང་འཕྲད་བཞིན་ཡོད་ཀྱང་ཕྱི་སྡོད་བོད་མི་དང་རྒྱ་རིགས་མི་མང་ཚོར་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་གདོང་ལེན་བྱ་རྒྱུའི་གོ་སྐབས་ཤིག་ཀྱང་ཡོད་པ་དྲན་སྐུལ་གནང་བ་དང་སྦྲགས། དེང་སྐབས་རྒྱ་ནག་དམར་པོའི་སྲིད་གཞུང་གིས་ཆབ་སྲིད་ཀྱི་དགོས་མཁོར་གཞིགས་ཏེ། བོད་བརྒྱུད་ནང་བསྟན་གྱི་བླ་སྤྲུལ་རྩད་གཅོད་ཞུ་རྒྱུའི་སྲོལ་རྒྱུན་ལམ་ལུགས་ལ་གནའ་སྔ་མོ་ནས་བདག་ཐོབ་ཡོད་ཚུལ་འཁྱོག་བཤད་སྣ་ཚོགས་བྱེད་བཞིན་པ་དང་། ལྷག་པར་ཕྱི་ལོ་ ༢༠༠༧ ཕྱི་ཟླ་ ༨ ནང་རྒྱ་ནག་གཞུང་གིས་བཀའ་ཁྱབ་ཨང་ ༥ ཟེར་བ་བསྒྲགས་ནས་བོད་མིའི་ཆོས་ལུགས་ཀྱི་བྱེད་སྒོ་དང་འབྲེལ་བའི་བླ་སྤྲུལ་རྩད་འཚོལ་ལམ་ལུགས་ལ་ཐེ་བྱུས་ཤུགས་ཆེ་བྱས་པ་དང་།  ཆུ་ངན་ལམ་ཤོར་དེ་འདྲ་བྱུང་ཚེ་འབྱུང་འགྱུར་རྒྱ་ནག་གཞུང་གིས་བོད་མི་ནང་པ་ཙམ་མ་ཟད། རྒྱ་ནག་གི་དབང་སྒྱུར་འོག་ཡོད་པའི་ཆོས་ལུགས་གཞན་གྱི་བླ་མ་བསྐོ་གཞག་དང་ངོས་འཛིན་ཐག་གཅོད་བྱ་རྒྱུའི་ཐད་ལའང་དབང་སྒྱུར་བྱེད་ངེས་ཡིན་སྐོར་དང་།   རྒྱ་ནག་གཞུང་གིས་ཁ་ནས་ཆོས་ལུགས་དད་མོས་རང་དབང་བཤད་བཞིན་དུ་བོད་བརྒྱུད་ནང་བསྟན་གྱི་ཆོས་ལུགས་བྱེད་སྒོར་དངོས་ཤུགས་བརྒྱུད་གསུམ་ནས་དམ་བསྒྲགས་སུན་གཙེར་བཟོ་བ་དང་། དགོན་པ་གཏོར་བཤིག་བཏང་བ་སོགས་བྱེད་བབ་དེ་དག་ནི་དངོས་འགལ་ཞིག་ཡིན་ཞིང་།  རྒྱ་རིགས་ཚོས་བོད་མིའི་རང་དབང་ཆེད་རྒྱབ་སྐྱོར་གནང་དགོས་པའི་འབོད་སྐུལ་གནང་འདུག 

སྐབས་དེར་རྒྱ་རིགས་ཁྲིམས་རྩོད་པ་དང་འགྲོ་བ་མིའི་ཐོབ་ཐང་འཐབ་རྩོད་པ་གྲགས་ཅན་སྐུ་ཞབས་ཁྲེན་ཀོང་ཁྲེང་ Mr Chen Guangcheng ལགས་ཀྱིས་དེང་སྐབས་རྒྱ་ནག་གུང་བྲན་ཏང་སྲིད་གཞུང་གིས་རྒྱ་ནག་ཧན་མི་རིགས་ལ་དམ་བསྒྲགས་བྱེད་བཞིན་པ་དེ་དག་འཆར་གཞི་ལྡན་པ་ཞིག་དང་། ཨ་རིའི་གྲོས་ཚོགས་གོང་འོག་ནང་ཧོང་ཀོང་མི་མང་གི་འགྲོ་བ་མིའི་ཐོབ་ཐང་སྲུང་སྐྱོབ་ལ་རྒྱབ་སྐྱོར་གནང་བ་དེས་རེ་བའི་བརྡ་ལན་ཞིག་ཡིན་སྟབས། ད་ཆ་ང་ཚོས་རྒྱལ་སྤྱིའི་སྤྱི་ཚོགས་ཁྱོན་ལ་ང་ཚོའི་རྒྱབ་ཏུ་ལངས་རོགས་གནང་ཞེས་རེ་འདུན་ཤུགས་ཆེ་གདོན་དགོས་པའི་དུས་ལ་བབ་ཚུལ་གསུངས། སྤྱིར་ཁོང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཤུགས་ཆེ་གནང་བཞིན་ཡོད་པ་དང་།  རྒྱ་ནག་དམར་པོའི་དབང་སྒྱུར་འོག་དཀའ་སྡུག་གཅིག་མཚུངས་མྱོང་མཁན་རྣམས་རྡོག་རྩ་གཅིག་ཏུ་བསྒྲིལ་ནས་འཐབ་རྩོད་རྒྱུན་སྐྱོང་དགོས་གལ་ཆེ་སྐོར་གསུངས།

སྐབས་དེར་རྒྱ་ནག་མང་གཙོ་དོན་གཉེར་བ་གྲགས་ཅན་ཝེ་ཅིང་ཧྲེང་ལགས་ཀྱིས། ཧོང་ཀོང་མི་མང་གིས་བློ་རྩེ་གཏན་པོས་ལས་འགུལ་སྤེལ་སྟངས་དེ་རིགས་མི་རིགས་ཚང་མས་སློབ་སྦྱོང་བྱེད་དགོས་གལ་དང་། ཁོ་ཚོས་ད་ཐེངས་རྒྱ་ནག་དམར་ཤོག་གཞུང་ལས་རྒྱལ་ཁ་ལེན་སྲིད་པར་བཤད། དེ་བཞིན་ཡང་སྲིད་སྐོར་ལ་ཁོང་གིས། རྒྱ་ནག་གཞུང་ནས་འཆར་གཞི་ལྡན་པའི་ཐོག་ནས་རྒྱ་ནག་ནང་གི་ཆོས་ལུགས་རྩ་མེད་གཏོང་ཐབས་བྱེད་བཞིན་ཡོད་པ་དང་། དེ་ཡང་ཐད་ཀར་གྱི་དྲག་གནོན་ཐོག་ཆོས་ལུགས་སོ་སོའི་དབུ་འཁྲིད་ངོས་འཛིན་བྱེད་ཐབས་ནི་འཆར་གཞི་འདིའི་ཆ་ཤས་ཡིན་པ་འགྲེལ་བཤད་གནང་།  དེ་བཞིན་བོད་བརྒྱུད་ནང་བསྟན་གྱི་ཐུན་མོང་མ་ཡིན་པའི་ཡང་སྲིད་ཐོག་ཐེ་བྱུས་བྱེད་སྟངས་ཡང་ཆོས་ལུགས་རྩ་མེད་གཏོང་རྒྱུའི་འཆར་གཞི་ལག་ལེན་དུ་བསྟར་བཞིན་པ་དང་། ཁོང་གིས་རྒྱ་རིགས་མི་མང་དང་བོད་རིགས་ཚང་མ་ལྷན་དུ་རྒྱ་ནག་གཞུང་གི་འཆར་གཞི་འདི་རིགས་ལ་ཐབས་བྱུས་ལྡན་པའི་ཐོག་ནས་ཁ་གཏད་གཅོག་དགོས་གལ་གསུང་སོང་།

དེ་བཞིན་ཧོང་ཀོང་ནས་ཕེབས་པའི་གཞོན་སྐྱེས་གཅིག་གིས་དེང་སྐབས་ཧོང་ཀོང་ནང་དམ་བསྒྲགས་བྱེ་ཤུགས་ཆེ་རུ་གཏོང་བཞིན་པའི་མྱོང་ཚོར་སྐོར་གསུངས་པ་དང་སྦྲགས། བོད་མི་ཚོས་ཧོང་ཀོང་མི་མང་ལ་གདུང་སེམས་མཉམ་སྐྱེ་གནང་བར་ཐུགས་རྗེ་ཆེ་གསུངས་འདུག