ཕྱི་ལོ་ ༢༠༡༩ ཟླ་ ༡༡ ཚེས་ ༢༢ རེས་གཟའ་པ་སངས།

༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༢༡ རེས་གཟའ་པ་སངས་ཉིན་གྱི་སྔ་དྲོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིའོ་Senator Rubio མཆོག་དང་མཇལ་འཕྲད་གནང་འདུག ཁོང་ནི་ཡུན་རིང་ནས་བོད་དོན་རྒྱབ་སྐྱོར་གནང་མཁན་ཞིག་ཡིན་པ་མ་ཟད།  འཛམ་གླིང་ས་ཁུལ་གང་སར་གདུག་རྩུབ་མནར་གཅོད་འོག་དཀའ་སྡུག་མྱོང་བཞིན་པའི་མི་མང་ཚོར་སྔ་ཕྱི་བར་གསུམ་དུ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་འདུག  ཕྱོགས་མཚུངས་བོད་རྒྱའི་གནད་དོན་ཐད་རྒྱུས་མངའ་ཧ་ཅང་ཡོད་མཁན་ཞིག་ཀྱང་རེད་འདུག

མཇལ་འཕྲད་གྲུབ་མཚམས་སྲིད་སྐྱོང་མཆོག་གིས་ཨ་རི་མོན་ཊ་ན་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་སི་ཊེ་ཧྥི་ཌེ་ནེ་སི་ Steve Daines མཆོག་དང་མཇལ་འཕྲད་གནང་ཡོད་ཅིང་། སྐབས་དེར་ཁོང་གིས་དཔལ་ལྡན་སྲིད་སྐྱོང་ལ་མོན་ཊ་ནའི་ Montana རང་ཁྱིམ་དུ་བོད་ཀྱི་རུམ་གདན་དམར་པོ་ཡིད་དུ་འོང་བ་ཞིག་རྒྱུན་སྤྱོད་བྱེད་བཞིན་ཡོད་སྐོར་དགའ་སྤོབས་ཆེན་པོས་གསུངས།

གཞན་ཡང་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་ Heritage Foundation ཞེས་པའི་བསམ་མཛོད་བསྟི་གནས་ཁང་གིས་མགྲོན་འབོད་ཞུས་པ་ལྟར།  དཔལ་ལྡན་སྲིད་སྐྱོང་མཆོག་གིས། དེང་སྐབས་རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་སུ། ཐབས་ལམ་འདྲ་མིན་བརྒྱུད་བོད་དོན་ཞུ་གཏུགས་ལས་འགུལ་ལ་འགོག་རྐྱེན་སྣ་ཚོགས་བཟོ་བཞིན་པར་བརྟེན་བོད་མི་དང་། བོད་དོན་རྒྱབ་སྐྱོར་བ་ཚོས་འཛམ་གླིང་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུགས་ཀྱི་ལས་འགུལ་སྤེལ་རྒྱུར་སྔར་བས་དཀའ་ངལ་ཇེ་ཆེར་ཕྱིན་ཡོད་སྐོར་ཞིབ་ཕྲ་གསུངས། ཕྱོགས་མཚུངས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་མཚོན་ནའང་བཟང་ཕྱོགས་ཀྱི་འགྱུར་བ་འགྲོ་རྒྱུའི་ཚབ་ཏུ་གནས་སྟངས་སྔར་བས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་སྐོར་གསུངས་ཡོད་པ་བཅས། །