ཕྱི་ལོ་ ༢༠༡༩ ཟླ་ ༡༡ ཚེས་ ༢༡ རེས་གཟའ་ཕུར་བུ།
སྐུ་ཞབས་ཊེཌ་ཡོ་ཧོ་ Ted Yoho མཆོག
༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཉེ་ལམ་ཨ་རིའི་རྒྱལ་ས་ཝ་ཤིང་ཊོན་དུ་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་ཊེཌ་ཡོ་ཧོ་ Ted Yoho མཆོག་དང་མཇལ་འཕྲད་གནང་སྟེ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་གྲོས་ཚོགས་འཐུས་མིའི་དབར་བརྙན་འཕྲིན་ལམ་ནས་གླེང་མོལ་ལས་རིམ་ཞིག་གོ་སྒྲིག་ཞུ་ཆོག་ཐད་གོ་བསྡུར་གནང་འདུག སྐབས་དེར་དབུ་ཁྲིད་རྣམ་གཉིས་ཀྱིས་དེང་སྐབས་སོག་ཡུལ་ནང་རྒྱ་ནག་གཞུང་གི་ཤུགས་རྐྱེན་ཇེ་ཆེར་འགྲོ་བཞིན་པར་སེམས་འཚབ་ཤུགས་ཆེ་གནང་བ་དང་། གྲོས་ཚོགས་འཐུས་མི་མཆོག་གིས་བོད་ཀྱི་གནད་དོན་ལ་ཐུག་སྐབས་ཨ་རིའི་གྲོས་ཚོགས་གོང་འོག་གཉིས་ཀའི་ནང་གི་མང་གཙོ་དང་སྤྱི་མཐུན་ཚོགས་པ་ཐུན་མོང་ཐོག་རྒྱབ་སྐྱོར་ཤུགས་ཆེ་གནང་མུས་ཡིན་པ་དང་། བོད་མི་ཚོས་སྙིང་སྟོབས་ཞུམ་པ་མེད་པའི་ཐོག་ནས་མུ་མཐུད་རྒྱ་ནག་གཞུང་གི་དབང་སྒྱུར་ལ་གདོང་ལེན་བྱེད་བཞིན་པར་ཡི་རངས་བསྔགས་བརྗོད་གནང་འདུག
སྐུ་ཞབས་ཊོ་མི་ Toomey མཆོག
ཕྱེད་ཡོལ་དཔལ་ལྡན་སྲིད་སྐྱོང་མཆོག་གིས་གྲོས་ཚོགས་གོང་མའི་འཐུས་མི་སྐུ་ཞབས་ཊོ་མི་Toomey མཆོག་དང་མཇལ་འཕྲད་གནང་འདུག སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་བྱུང་རབས་སྐོར་དང་། དེང་སྐབས་རྒྱ་ནག་གཞུང་གིས་བོད་ནང་ཚད་མཐོའི་རིག་གསར་འཕྲུལ་ཆས་བཀོལ་སྤྱོད་བྱས་ནས་བོད་མིའི་འགྲོ་འདུག་སྤྱོད་གསུམ་ལ་དམ་བསྒྲགས་ཤུགས་ཆེ་བྱས་སྐོར་གསུངས་འདུག དེ་རྗེས་གྲོས་ཚོགས་འཐུས་མི་ཊིམ་བྷུར་ཆེ་ཊི་ Tim Burchett མཆོག་དང་མཇལ་འཕྲད་གནང་འདུག སྤྱིར་དོན་གཅོད་དངོས་གྲུབ་ཚེ་རིང་ལགས་ཀྱིས་དེ་སྔོན་ཁོང་དང་མཇལ་འཕྲད་ཞུ་སྐབས་ཁོང་གིས་མ་སྐུལ་དང་བླངས་ཐོག་ནས་བོད་དོན་ཁྲིམས་འཆར་གསར་པར་རྒྱབ་སྐྱོར་གནང་རྒྱུའི་ཁས་ལེན་གནང་བ་མ་ཟད། གྲོས་ཚོགས་འོག་མའི་ཁྲིམས་འཆར་ཨང་ ༤༣༣༡ ལ་རྒྱབ་སྐྱོར་གནང་འདུག སྤྱིར་ཁོང་གི་ཡབ་དམ་པར་མཚོན་ན་དེ་སྔ་འཛམ་གླིང་དམག་ཆེན་གཉིས་པའི་སྐབས་རྒྱ་ནག་དམར་ཤོག་ཚོགས་པའི་བཅིངས་བཀྲོལ་དཔུང་དམག་དང་འཐབ་ནས་རྐྱེན་འདས་སོང་འདུག མཇལ་འཕྲད་སྐོར་ཁོང་གི་སྒེར་གྱི་གླེང་མོལ་གླེང་སྟེགས་ཊུ་ཝི་ཊར་ tweeter ནང་དུའང་བཀོད་གནང་འདུག
སྐུ་ཞབས་ Tim Burchett མཆོག
ཕྱོགས་མཚུངས་དེ་ཉིན་གྱི་ཕྱེད་ཡོལ་དུ་དཔལ་ལྡན་སྲིད་སྐྱོང་མཆོག་གིས་གྲོས་ཚོགས་གོང་མའི་ཕྱི་འབྲེལ་ལས་དོན་ཚན་པའི་ཚོགས་གཙོ་སྐུ་ཞབས་ཇེམ་སི་James Risch མཆོག་དང་མཇལ་འཕྲད་གནང་སྟེ་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་རྩད་གཅོད་ཀྱི་ལམ་ལུགས་དང་། རྒྱ་ནག་དམར་ཤོག་ཚོགས་པས་བོད་མིའི་ཐུན་མིན་སྲོལ་རྒྱུན་ལམ་ལུགས་དེ་ད་ཆ་ཆབ་སྲིད་ཀྱི་དགོས་མཁོར་བཀོལ་སྤྱོད་བྱེད་བཞིན་པའི་སྐོར་སོགས་གསུངས། དབུ་ཁྲིད་རྣམ་གཉིས་མཇལ་འཕྲད་གྲུབ་མཚམས་གྲོས་ཚོགས་གོང་མའི་འཐུས་མི་སྐུ་ཞབས་ཇོ་ཤི་ཧོ་ལེ་Josh Hawley མཆོག་དང་མཇལ་འཕྲད་གནང་འདུག ཁོང་ནི་ན་གཞོན་ཡར་ཐོན་ཅན་གྱི་གྲོས་ཚོགས་འཐུས་མི་ཞིག་ཡིན་འདུག དཔལ་ལྡན་སྲིད་སྐྱོང་མཆོག་གིས་དེང་སྐབས་རྒྱ་ནག་གཞུང་གིས་བོད་ནང་ཚད་མཐོའི་རིག་གསར་འཕྲུལ་ཆས་བཀོལ་སྤྱོད་བྱས་ནས་བོད་མིའི་འགྲོ་འདུག་སྤྱོད་གསུམ་ལ་དམ་བསྒྲགས་ཤུགས་ཆེ་བྱས་སྐོར་གསུང་སྐབས་ཁོང་གིས་སེམས་འཚབ་ཀྱི་རྣམ་པ་ཤུགས་ཆེ་བཏོན་པ་དང་སྦྲགས་བོད་དོན་རྒྱབ་སྐྱོར་གྱི་ཁྲིམས་འཆར་གསར་པར་རྒྱབ་སྐྱོར་གནང་རྒྱུའི་ཁས་ལེན་གནང་འདུག
སྐུ་ཞབས་ཇེམ་སི་James Risch མཆོག
དཔལ་ལྡན་སྲིད་སྐྱོང་མཆོག་གིས་མཐར་གྲོས་ཚོགས་གོང་མའི་འཐུས་མི་སྐུ་ཞབས་མི་ཊི་རོམ་ནེ་ Mitt Romney མཆོག་དང་མཇལ་འཕྲད་གནང་འདུག ཁོང་ནི་དེ་སྔ་ཨ་རིའི་རྒྱལ་ཡོངས་སྲིད་འཛིན་འོས་བསྡུ་ཆེན་མོའི་སྐབས་སྲིད་འཛིན་གྱི་འོས་མི་ཞིག་ཡིན་འདུག ཁོང་གིས་དེ་སྔ་བོད་ཀྱི་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ཡུ་ཊ་ Utah མངའ་སྡེར་ཆིབས་སྒྱུར་སྐྱོང་སྐབས་མགོན་པོ་གང་ཉིད་དང་མཇལ་འཕྲད་ཞུས་པའི་གནས་སྟངས་ཐུགས་དྲན་གསོ་གནང་བ་མ་ཟད། རྒྱ་ནག་གཞུང་གིས་བོད་མིའི་མངོན་འདོད་ལ་བདག་སྤྲོད་རྩ་བ་ནས་མ་བྱས་པ་དེར་སེམས་འཚབ་ཡོད་སྐོར་གསུངས་པ་དང་། རྒྱ་ནག་གཞུང་གིས་བོད་མིའི་རང་ཐག་རང་གཅོད་ཀྱི་ཐོབ་ཐང་ལ་བརྩི་བཀུར་ངེས་པར་ཞུ་དགོས་པ་མ་ཟད། རྒྱ་ནག་གིས་དབང་སྒྱུར་བྱེད་བཞིན་པའི་ས་ཁུལ་གཞན་ཁག་ཏུའང་དེ་མཚུངས་བརྩི་བཀུར་ཞུ་དགོས་པའི་བསམ་ཚུལ་གསུངས་འདུག །
