ཕྱི་ལོ་ ༢༠༡༩ ཟླ་ ༡༡ ཚེས་ ༢༦ རེས་གཟའ་མིག་དམར།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་སྨན་པ་ཟུར་པ་དང་། རྒྱ་གར་སྤྱི་དམངས་ཀྱི་གཟེངས་རྟགས་མཐོ་ཤོས་ཨང་བཞི་པ་པདྨ་ཤྲཱི་ Padma Shree བཞེས་མྱོང་མཁན་དགུང་གྲངས་ ༩༢ ཕེབས་པ་སྨན་པ་ཡེ་ཤེས་དོན་ལྡན་མཆོག་ཕྱི་ལོ་ ༢༠༡༩ ཟླ་ ༡༡ ཚེས་ ༢༦ རེས་གཟའ་མིག་དམར་ཐོ་རངས་ཆུ་ཚོད་ ༢།༥༣ ཐོག་རྡ་ས་མེག་གྷན་རང་ཤག་ཏུ་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག  

དམ་པ་ཁོང་གིས་ཕྱི་ལོ་ ༡༩༦༠ ནས་ ༡༩༨༠ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་སྨན་པའི་ཞབས་ཞུ་བསྒྲུབས་ཡོད་ཅིང་།  ཕྱི་ལོ་ ༢༠༡༨ ཟླ་ ༡ ཚེས་ ༢༦ ཉིན་རྒྱ་གར་མང་གཙོའི་དུས་དྲན་ཐེངས་ ༦༩ ཉིན་དང་བསྟུན།  རྒྱ་གར་གྱི་སྲིད་འཛིན་རཱམ་ནཱཐ་ཀོ་ཝིནྜ་ President Ram Nath Kovind མཆོག་གི་དྲུང་ནས་པདྨ་ཤྲི་ Padma Shri གཟེངས་རྟགས་བཞེས་གནང་འདུག

དམ་པ་ཁོང་ནི། ཕྱི་ལོ་ ༡༩༢༧ ཟླ་ ༥ ཚེས་ ༡༥ ཉིན་བོད་ལྷོ་ཁར་སྐུ་འཁྲུངས་ཤིང་དགུང་ལོ་ ༡༡ ཕེབས་སྐབས་ལྷ་ས་ལྕགས་པོ་རི་བོད་ཀྱི་གསོ་བ་རིག་པ་སློབ་གཉེར་ཁང་དུ་སློབ་ཞུགས་ཀྱི་སློབ་གཉེར་གནང་ཡོད་པ་དང་། རྒྱ་གར་ནང་བཙན་བྱོལ་དུ་ཕེབས་རྗེས་ལོ་མང་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་སྨན་གྱི་ཞབས་ཞུ་བསྒྲུབས་པ་མ་ཟད།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༦༡ ཟླ་ ༣ ཚེས་ ༢༣ ཉིན་བཙན་བྱོལ་དུ་བཞུགས་སྒར་དརྨ་ཤཱ་ལར་བོད་གཞུང་སྨན་རྩིས་ཁང་ཐོག་མར་གསར་འཛུགས་མཛད་སྐབས་འགན་ཁུར་བཞེས་མཁན་གཙོ་གྲས་ཤིག་ཀྱང་ཡིན་འདུག །