ཕྱི་ལོ་ ༢༠༡༩ ཟླ་ ༡༠ ཚེས་ ༢༤ རེས་གཟའ་ཕུར་བུ། 

༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༢ ནས་ ༢༥ བར་ཨིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་གཞུང་འབྲེལ་མ་ཡིན་པའི་རྒྱལ་སྤྱིའི་གཞོན་སྐྱེས་ཚོགས་པ་ One Young World ཞེས་པའི་གོ་སྒྲིག་འོག་རྒྱལ་སྤྱིའི་གཞོན་སྐྱེས་འགོ་ཁྲིད་ཚོགས་འདུ་ཚོགས་ཡོད་པ་དང་། ཚོགས་འདུའི་སྟེང་རྒྱལ་ཁབ་ ༡༩༠ ལྷག་གི་གཞོན་སྐྱེས་སྐུ་ཚབ་གྲངས་ ༢༠༠༠ ལྷག་དང་ཕྱི་རྒྱལ་གཞུང་ཚབ་མི་སྣ་སོགས་མཉམ་ཞུགས་གནང་འདུག
ཨིན་ཡུལ་སྐུ་ཚབ་དོན་གཅོད་བསོད་ནམས་ཚེ་རིང་ཕར་སི་ལགས་དང་བཀྲ་ཤིས་ལྷུན་པོ་དགོན་པའི་སྐུ་ཚབ་རྣམ་གཉིས་ཚོགས་པ་དེའི་རྒྱལ་སྤྱིའི་གཞོན་སྐྱེས་འགོ་ཁྲིད་ཚོགས་འདུ་དབུ་འབྱེད་མཛད་སྒོ་དང་ཆོས་ལུགས་ནང་ཁུལ་གྱི་མཆོད་འབུལ་འདུ་འཛོམས་ཐོག་ཕེབས་ཡོད། ཆོས་ལུགས་ནང་ཁུལ་གྱི་མཆོད་འབུལ་འདུ་འཛོམས་ཐོག་ཆོས་ལུགས་ཁག་གཅིག་གི་བླ་ཆེན་རྣམ་པ་ཕེབས་འདུག་པ་མ་ཟད། ཁོང་རྣམ་པས་སོ་སོའི་ཆོས་ལུགས་ཀྱི་ལྟ་གྲུབ་སྐོར་གསུང་བཤད་གནང་།

སྐབས་དེར་སྐུ་ཚབ་དོན་གཅོད་བསོད་ནམས་ཚེ་རིང་ཕར་སི་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཆོས་ལུགས་ནང་ཁུལ་དབར་མཐུན་སྒྲིལ་ཡོང་བར་ཐུགས་འགན་བཞེས་བཞིན་པའི་སྐོར་དང་འབྲེལ་ནས་གཞོན་སྐྱེས་སྐུ་ཚབ་རྣམས་ལ་འཛམ་གླིང་ཞི་བདེ་ལྡན་པ་ཞིག་བསྐྲུན་པར་བྱམས་པ་དང་། བཟོད་སྒོམ། སྙིང་རྗེ་བཅས་སོ་སོའི་ཉིན་རེའི་འཚོ་བའི་ནང་ལག་བསྟར་གནང་དགོས་པའི་སྐོར་གསུང་བ་དང་། དེ་བཞིན་བྱམས་བརྩེ་ལྡན་པའི་འགོ་ཁྲིད་ཅིག་ཡིན་ན་འགྲོ་བ་མིའི་སྤྱི་ཚོགས་འདི་བཞིན་ཞི་བདེ་དང་བཟོད་སེམས་ཅན་ཞིག་ལ་བསྒྱུར་ཐུབ་ཀྱི་རེད། ཅེས་གསུང་། གཞན་ཡང་གཞོན་སྐྱེས་རྣམ་པས་སོ་སོའི་ཁྱིམ་མཚེས་ཀྱིས་གཙོས་འཛམ་གླིང་འཆམ་མཐུན་དང་ཞི་བདེ་ལྡན་པ་ཞིག་བསྐྲུན་རྒྱུའི་ཕྱག་ལས་གནང་དགོས་པ་སོགས་ཀྱི་སྐོར་གསུངས། །