ཕྱི་ལོ་ ༢༠༡༩ ཟླ་ ༡༠ ཚེས་ ༤ རེས་གཟའ་པ་སངས།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༩ ཟླ་ ༡༠ ཚེས་ ༡ རེས་གཟའ་མིག་དམར་ཉིན་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་པེ་ཅིང་དཔྱིད་ཀའི་དུས་དེབ་ཁང་དང་། རྒྱ་ནག་མང་གཙོ་ཚོགས་པ། རྒྱ་ནག་མང་གཙོ་མཐུན་ལྷན་སོགས་རྒྱ་རིགས་མང་གཙོ་དོན་གཉེར་བའི་ཚོགས་པ་ཆེ་ཁག་ནས།  ༼དམར་པོའི་གཞུང་གིས་རྒྱལ་ཁབ་རྐུན་འཕྲོག་བྱས་ནས་ལོ་ངོ་བདུན་ཅུ་འཁོར་བ་དང་འབྱུང་འགྱུར་གྱི་གནས་སྟངས། ༽ ཞེས་པའི་བགྲོ་གླེང་ཚོགས་འདུའི་སྟེང་བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མཉམ་ཞུགས་གནང་འདུག 

དེ་ཡང་གོང་ཚེས་ཉིན་གྱི་ཚོགས་འདུའི་ཐོག་རྒྱ་རིགས་མི་གྲངས་བརྒྱ་ལྷག་ཙམ་ཞིག་མཉམ་ཞུགས་གནང་ཡོད་པ་དང་། རྒྱ་རིགས་ཤེས་ཡོན་ཅན་ཚོས་དམར་གཞུང་གིས་རྒྱ་ནག་རྐུན་འཕྲོག་བྱས་ནས་ལོ་བདུན་ཅུ་འཁོར་ཞིང་། དུས་སྐབས་དེའི་རིང་གང་བྱུང་བའི་གནས་ཚུལ་ལས་སློབ་གསོ་ལེན་དགོས་པ་དང་། རྒྱ་ནག་གི་མ་འོངས་ཁ་ཕྱོགས། ཧོང་ཀོང་གི་གནས་སྟངས། མི་རིགས་ཀྱི་དཀའ་རྙོག་སེལ་ཐབས་སོགས་ལ་བགྲོ་གླེང་གནང་འདུག

སྐབས་དེར་རྒྱ་རིགས་འབྲེལ་མཐུད་པས། ལོ་ངོ་བདུན་ཅུའི་དུས་སྐབས་དེར་བོད་མིར་མཚོན་ན། བོད་ཀྱི་ལོ་རྒྱུས་ཐོག་ཆེས་མུན་ནག་དང་གདུག་རྩུབ་ཅན་གྱི་དུས་སྐབས་ནི་བོད་ཀྱི་ལོ་རྒྱུས་ཁྲོད་སྔར་རྩ་བ་ནས་བྱུང་མྱོང་མེད་པ་དང་། བོད་མིའི་ཚོས་མི་ལོ་དྲུག་ཅུའི་རིང་རྒྱ་ནག་གཞུང་གིས་དབང་སྒྱུར་ལ་ཞི་བའི་ངོ་རྒོལ་བསྟུད་མར་བྱས་ཡོད། ལྷག་པར་ཕྱི་ལོ་ ༢༠༠༩ ནས་ད་བར་བོད་མི་ ༡༥༣ གྱིས་སྐུ་ལུས་མེར་སྲེག་གི་ལམ་ནས་རྒྱ་གཞུང་གི་དྲང་བདེན་མིན་པའི་སྲིད་བྱུས་ལ་གདོང་ལེན་གནང་ཡོད། ད་བར་རྒྱ་གཞུང་གིས་བོད་མིའི་ཐོག་འཇམ་རྩུབ་ཀྱི་སྲིད་བྱུས་སྣ་ཚོགས་ལག་བསྟར་བྱས་ཀྱང་ལམ་ལྷོངས་བྱུང་མེད་སྐོར་དང་། བོད་རྒྱའི་གནད་དོན་སེལ་ཆེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་གྲུབ་འབྲས།  རྒྱ་རིགས་ཚོས་ཀྱང་དབུ་མའི་ལམ་གྱི་སྲིད་བྱུས་ཐོག་དོ་སྣང་གནང་དགོས་གལ་སོགས་གསུངས། །