ཕྱི་ལོ་ ༢༠༡༩ ཟླ་ ༡༠ ཚེས་ ༢༨ རེས་གཟའ་ཟླ་བ།

༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༨ སྔ་དྲོ་ཆུ་ཚོད་ ༩ ཙམ་ལ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་སྐུ་ཞབས་སེ་མུལ་བྷ་རོན་བྷེག་ Samuel D. Brownback མཆོག་གིས་གཙོས་ཕྱག་སྦྲེལ་ཨ་རིའི་གནད་ཡོད་མི་སྣ་ཁག་གཅིག་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་འདུག

སྐབས་དེར་མགོན་པོ་གང་ཉིད་ཀྱིས་ཨ་རི་དང་བོད་དབར་ལོ་རྒྱུས་ཀྱི་འབྲེལ་བ་ཡོད་པ་དང་།  དེ་སྔ་ཨ་རིའི་སྲིད་འཛིན་གོང་མ་རིམ་བྱོན་རྣམས་ཀྱིས་བོད་དོན་ཐོག་ཐུགས་ཁུར་ཆེ་བཞེས་ཀྱིས་རྒྱབ་སྐྱོར་གནང་བ་མ་ཟད། ལྷག་པར་སྲིད་འཛིན་ ༣༢ སྐུ་ཞབས་ཕེ་རེངྐ་ཌི་རུ་སུ་ཝེལ་ Franklin D. Roosevelt མཆོག་གིས་ཕྱག་ཚོད་གཅིག་ཕྱག་རྟགས་སུ་འབུལ་བཞེས་མཛད་པའི་ལོ་རྒྱུས་ཐུགས་དྲན་གསོ་དང་སྦྲགས་ཕྱག་རྟགས་ཕྱག་ཚོད་དེ་བསྟན་གནང་མཛད་འདུག 

སྤྱིར་སྐུ་མགྲོན་རྣམ་པ་རེས་གཟའ་ཉི་མའི་ཕྱེད་ཡོལ་ཆུ་ཚོད་ ༥ ཙམ་ལ་བཞུགས་སྒར་དུ་ཕེབས་འབྱོར་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གཙོས་དྲིལ་བསྒྲགས་དྲུང་ཆེ་དང་ལས་བྱེད་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་རྗེས་རྡ་སྟེང་བོད་ཁྱིམ་ཉེ་འདབས་སུ་ཆགས་པའི་མོག་ཤ་གསོལ་མགྲོན་ཁང་དུ་གཞུང་འབྲེལ་ཕེབས་བསུ་ཞུས་ཡོད།

སྤྱིར་ཐེངས་འདིར་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་སྐུ་ཞབས་སེ་མུལ་བྷ་རོན་བྷེག་ Samuel D. Brownback མཆོག་ལ་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཁྱབ་ཁོངས་བོད་ཀྱི་ཟློས་སྒར་ཚོགས་པ་བཙུགས་ནས་ལོ་ངོ་དྲུག་ཅུ་ཧྲིལ་པོ་འཁོར་བའི་ཉིན་མོར་ཆེད་མངགས་སྐུ་མགྲོན་གཙོ་བོར་སྲིད་སྐྱོང་མཆོག་གིས་མགྲོན་འབོད་ཞུས་པ་ཞིག་ཡིན་འདུག  ཕྱི་ལོ་ ༢༠༡༩ ཟླ་ ༡༠ ཚེས་ ༢༩ ཉིན་བོད་ཀྱི་ཟློས་སྒར་ཚོགས་པ་བཙུགས་ནས་ལོ་ངོ་དྲུག་ཅུ་ཧྲིལ་པོ་འཁོར་བཞིན་ཡོད་འདུག

དེ་ཡང་ཕྱི་ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་རྒྱལ་སྤྱིའི་བོད་ཀྱི་ཟློས་སྒར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་དབུ་འབྱེད་ཉིན་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་སྐུ་ཞབས་སེ་མུལ་བྷ་རོན་བྷེག་ Samuel D. Brownback མཆོག་ཕེབས་ནས་གསུང་བཤད་གནང་ཡོད་པ་བཅས། །