༢༠༡༩ ཟླ་ ༡༠ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༥ ཉིན་གྱི་སྔ་དྲོ་བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་གཞུང་གི་མཐོ་སློབ་ནང་རྒྱ་གར་གནའ་རབས་ལེགས་བཤད་དང་འབྲེལ་བའི་རིས་མེད་བཟང་སྤྱོད་ཀྱི་སློབ་ཁྲིད་ཆེད་ཡོང་བའི་རྒྱ་གར་ས་ཁུལ་འདྲ་མིན་གྱི་མཐོ་སློབ་ཁག་ལྔ་ནས་ཁྱོན་སློབ་ཕྲུག་ ༡༢༧ ཙམ་དང་དགེ་རྒན། སློབ་སྤྱི་བཅས་ལ་བཀའ་སློབ་སྩལ་འདུག སློབ་ཕྲུག་དེ་ཁོངས་ནས་རྡ་ས་གཞུང་གི་མཐོ་སློབ་ནས་སློབ་ཕྲུག་ ༢༧ འདུག བོད་པའི་སློབ་ཕྲུག་ ༡༨ དང་། འབྲུག་པའི་སློབ་ཕྲུག་ ༧༨ ལ་དྭགས་ནས་སློབ་ཕྲུག་ ༡༠ འདུག་ཅིང་། མོན་རྟ་དབང་ནས་སློབ་མ་ ༢ དང་། ཨབ་ཕི་རི་ཀ་ནས་སློབ་མ་ ༤ བཅས་ཡིན་འདུག
དེ་ཡང་མགོན་པོ་མཆོག་གིས་ཐོག་མར་འགྲོ་བ་མི་གཅིག་གྱུར་གྱི་འདུ་ཤེས་འཛིན་ནས་རིས་མེད་བཟང་སྤྱོད་དེང་དུས་ཤེས་ཡོན་ལམ་ལུགས་ནང་དགོས་གལ་ཆེ་བ་དང་། དེང་དུས་ཤེས་ཡོན་ལམ་ལུགས་དེ་གཙོ་ཆེར་ནུབ་ཕྱོགས་ནས་དར་བ་ཞིག་ཡིན་སྟབས་ཕྱི་དངོས་པོ་ཡར་རྒྱས་གཏོང་ཐབས་གཙོ་འདོན་བྱས་པ་དང་། ལྟ་གྲུབ་ཐོག་ནས་ཀྱང་གཙོ་ཆེར་དཀོན་མཆོག་མཁྱེན་ཟེར་ནས་འགྲོ་རྒྱུ་མ་གཏོགས་བློའི་རྣམ་གཞག་དང་བྱེད་ལས་སྐོར་ལ་དོ་སྣང་བྱས་ནས་ཆགས་སྡང་སོགས་ཉོན་མོངས་པའི་བློར་གཉེན་པོ་བསྟེན་ཕྱོགས་སྐོར་བཤད་ཀྱི་མེད་ཅིང་།
རྒྱ་གར་ལ་མཚོན་ན་ལོ་ངོ་གསུམ་སྟོང་གོང་ནས་གཙོ་ཆེར་དཔལ་ནཱ་ལེནྜའ་ནས་བརྒྱུད་པའི་སེམས་ཁམས་རིག་པའི་རྣམ་གཞག་སྐོར་འགྲེལ་བཤད་ཧ་ལས་པའི་རྒྱས་པོ་རྒྱག་རྒྱུ་ཡོད་པ་དང་། ལེགས་བཤད་དེ་དག་ནི་ཞི་གནས་དང་ལྷག་མཐོང་གི་ཉམས་ལེན་སྒོ་ནས་དཔྱད་འཇོག་གི་སྒོམ་ཉམས་ལེན་བྱེད་སྟངས་སྐོར་ཡིན་ཞིང་། ད་ལྟའི་འཛམ་གླིང་ནང་ལེགས་བཤད་དེ་དག་དགོས་མཁོ་ཧ་ཅང་ཡོད་པ་དང་། ད་ཐེངས་རྡ་སར་རྟེན་གཞི་བྱས་པའི་གཞུང་གི་མཐོ་སློབ་ཁང་ནས་རྒྱ་གར་སྲོལ་རྒྱུན་སེམས་ཁམས་རིག་པའི་རྣམ་གཞག་དང་འབྲེལ་བའི་ལེགས་བཤད་དེ་དག་ལ་གཞི་བཅོལ་བའི་རིས་མེད་ཤེས་ཡོན་ཟླ་དྲུག་རིང་སློབ་ཁྲིད་བྱ་རྒྱུའི་ལས་འཆར་ཞིག་བང་བསྒྲིགས་པ་དེར་བསྔགས་བརྗོད་རྒྱ་ཆེ་མཛད་འདུག
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ནང་སྲོལ་རྒྱུན་ནས་འཚེ་མེད་ཞི་བ་དང་སྙིང་རྗེའི་ཉམས་ལེན་དར་སྲོལ་ཧ་ཅང་ཡོད་པ་དང་། ལྷག་པར་འདས་པའི་དུས་རབས་ ༢༠ ནང་མེས་པོ་དམ་པ་གཱན་དྷི་མཆོག་གིས་འཚེ་མེད་ཞི་བ་དང་སྙིང་རྗེའི་ཉམས་ལེན་ཧ་ལས་པ་གནང་ཡོད་སྟབས་དེང་སྐབས་ཉམས་བཞེས་དེ་དག་རྒྱ་གར་ནང་ཕྲན་བུ་ཉམས་ཆགས་ཕྱིན་ཡོད་ཅིང་། དེར་བརྟེན་ལེགས་བཤད་དེ་དག་བསྐྱར་གསོ་བྱེད་དགོས་ན་ཐོག་མར་རྒྱ་གར་རང་གི་ནང་ལ་ཉམས་གསོ་བྱེད་གལ་ཆེ་བར་བརྟེན་མགོན་པོ་མཆོག་གིས་རླབས་ཆེན་གྱི་མཛད་ཁུར་བཞིའི་ཁོངས་ནས་གཅིག་ཡིན་པ་དང་། སྤྱིར་ང་ཚོས་སྔོན་འགྲོ་ནས་མཐོ་སློབ་དབར་ཕྲུ་གུའི་ལུས་པོའི་འཕྲོད་བསྟེན་ལ་ཧ་ཅང་གཙིགས་ཆེར་འཛིན་བཞིན་ཡོད་པ་ལྟར། ད་ཆ་ཕྲུ་གུའི་ལུས་པོའི་འཕྲོད་བསྟེན་མཙ་མ་ཟད། བསམ་བློ་གཏོང་སྟངས་དེར་ཡང་དོ་སྣང་སྤྲད་ནས་ཕྲུ་གུའི་བསམ་བློར་བྱམས་པ་དང་བརྩེ་བ། བཟོད་བསྲན། ཆོག་ཤེས་སོགས་བཟང་པོའི་བསླབ་བྱ་དེ་དག་སློབ་ཁྲིད་དགོས་པ་མ་ཟད།
ལྷག་པར་བློ་ལ་ཆགས་སྡང་རིགས་སྐྱེ་སྐབས་དེར་གཉེན་པོ་ཇི་ལྟར་བསྟེན་དགོས་པའི་ཐོག་སློབ་ཁྲིད་བྱེད་དགོས་པའི་དུས་ལ་བབ་ཡོད་པ་གཟིགས་སྐོར་དང་། དེ་མིན་ལུས་པོའི་འཕྲོད་བསྟེན་ཧ་ཅང་ལེགས་ཀྱང་སེམས་དེ་ཆགས་སྡང་གི་གཞན་དབང་དུ་ཚུད་སླ་པོ་བྱས་ནས་བསྡད་པ་ཡིན་ན་ཕན་ཐོགས་གང་ཡང་མེད་སྐོར་དང་། གནའ་དེང་ཟུང་འབྲེལ་གྱི་ཤེས་ཡོན་སློབ་གསོ་སྤྲོད་དགོས་ན་རྒྱ་གར་ཁོ་ནས་བྱེད་ཐུབ་སྐོར་སོགས་བཀའ་སློབ་སྩལ་བསྟུན་སློབ་ཕྲུག་ཚོའི་དྲི་བར་བཀའ་ལན་སྩལ་འདུག
དེ་ཡང་མཐོ་སློབ་དེ་དག་ནི་རྡ་ས་མཐོ་སློབ་དང་། ལ་དྭགས་ཏུ་རྟེན་གཞི་བྱས་པའི་Flowering Dharma པན་ཇབ་མཐོ་སློབ།Punjab University སྭ་མི་ཝི་ཝེ་ཀ་ནནྡ་སུ་བྷཱརྟི་མཐོ་སློབ།Swami Vivekanand Subharti University ཤར་ད་མཐོ་སློབ། Sharda Univesity ལབ་ལི་མཐོ་སློབ་Lovely Professional University བཅས་ནས་ཡིན་འདུག་པ་བཅས།
