༢༠༡༩ ཟླ་ ༡༠ ཚེས་ ༡༥ རེས་གཟའ་མིག་དམར།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བྱང་ཕྱོགས་ཅན་དི་གྷར་དུ་རྟེན་གཞི་བྱས་པའི་ཅིཏ་ཀ་ར་མཐོ་སློབ་Chitkara Universityཏུ་ཇི་ལྟར་སྔོན་ནས་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ཟླ་ ༡༠ ཚེས་ ༡༤ ཉིན་རྒྱལ་སྤྱིའི་གོ་ལའི་འདུ་ཚོགས་ཐེངས་ ༡༡ དབུ་འབྱེད་མཛད་པ་དང་སྦྲགས་བཀའ་སློབ་སྩལ་འདུག སྐབས་དེར་རྒྱལ་སྤྱིའི་ཁྱོན་ནས་དགེ་རྒན་ཕེབས་ཡོད་ཅིང་། སྤྱིར་དུས་ཐུང་ཤེས་ཡོན་སློབ་སྤེལ་གྱི་ལས་གཞི་དེར་གོ་ལའི་བདུན་ཕྲག ཅེས་འབོད་སྲོལ་ཡོད་འདུག སྡིངས་ཆ་དེ་བརྒྱུད་དགེ་རྒན་ཚོས་སོ་སོས་ཉམས་མྱོང་བརྗེ་ལེན་དང་སློབ་ཕྲུག་ཚོར་གོ་རྟོགས་ཀྱི་ལས་འགུལ་རྒྱ་སྐྱེད་གཏོང་རྒྱུའི་དུས་ཚོད་བཟང་པོ་ཞིག་ལ་ངོས་འཛིན་གནང་བཞིན་འདུག
དེ་ཡང་དབུ་འབྱེད་མཛད་སྒོའི་ཐོག་མཐོ་སློབ་རིགས་བདག་གཞོན་པ་སང་གཱི་ཏ་ཇོ་ར་Mrs Sangeet Jaura མཆོག་གིས་ཚོགས་བཅར་བ་དགེ་ལས་སློབ་མ་གྲངས་ ༡༢༠༠ བརྒལ་བར་བོད་ཀྱི་༸གོང་ས་༸སྐྱབས་ཏཱ་ལའི་བླ་མ་མཆོག་ངོ་སྤྲོད་ཞུས་འདུག དེ་ནས་རྒྱ་གར་སྲོལ་རྒྱུན་གྱི་གཞས་སྣ་འཁྲབ་སྟོན་ཞུས་པ་མ་ཟད། བོད་པའི་སློབ་ཕྲུག་ལྔ་ནས་བོད་ཀྱི་སྲོལ་རྒྱུན་གཞས་སྣ་སོགས་འཁྲབ་སྟོན་དང་ལྷག་པར་མགོན་པོ་གང་ཉིད་༸སྐུ་ཚེ་ཞབས་པད་བསྐལ་བརྒྱར་བརྟན་པའི་སྨོན་ལམ་གསུང་འདོན་གནང་བར་ཐུགས་དགྱེས་ཚོར་དང་སྦྲགས་མཇལ་ཁ་སྩལ་བསྟུན་སྣང་གསལ་ཞལ་ཕྱེ་མཛད་རྗེས་བཀའ་སློབ་སྩལ་དོན།
བརྩེ་བའི་སྤུན་མཆེད་ཕོ་མོ་རྒན་གཞོན་རྣམ་པ། ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་གི་དོན་དམ་གྱི་སྤུན་མཆེད་ཡིན། འཇིག་རྟེན་བཀོད་པ་པོ་འདོད་མཁན་ལྟར་ན་ང་ཚོ་ཚང་མ་དཀོན་མཆོག་གཅིག་གིས་བཀོད་པ་ཤ་སྟག་རེད། དེ་ལྟ་བུའི་དཀོན་མཆོག་དེའང་བརྩེ་བའི་བདག་ཉིད་ཁོ་ན་རེད། ང་ཚོ་ཚང་མ་ཁོང་གི་ཕྲུ་གུ་ཡིན་སྟབས་སྤུན་མཆེད་ཕོ་མོ་ཆགས་ཡོད། འཇིག་རྟེན་བཀོད་པ་མི་འདོད་མཁན་ཚོས་སྐྱེ་བ་ལ་ཐོག་མ་མེད་པ་བརྗོད་ཀྱི་ཡོད། ཚེ་རབས་ནས་ཚེ་རབས་སྐྱེ་བ་རྒྱུན་མར་བླངས་ཡོད། འོན་ཀྱང་ད་ཐེངས་མིའི་ལུས་རྟེན་བླངས་པའི་རིང་འདིར་ང་ཚོ་ཚང་མ་འགྲོ་བ་མིའི་རིགས་ཀྱི་ཁྱིམ་ཚང་གཅིག་ཡིན་སྟབས་སྤུན་མཆེད་ཕོ་མོ་ཡིན། འབྱུང་བའི་གོད་ཆགས་རིགས་ལ་ང་ཚོར་བྱ་ཐབས་གང་ཡང་མེད། དེ་ལས་གཞན་པའི་གཉའ་གནོན་དང་ཐུབ་ཚོད་ཤོད་རྒྱུ། མགོ་སྐོར་སླུ་བྲིད། བཤུ་གཞོག་སོགས་ཀྱི་དཀའ་ངལ་དེ་དག་མིས་བཟོས་པའི་དཀའ་ངལ་རེད།
འོན་ཀྱང་ཚན་རིག་པས་བརྟག་དཔྱད་བྱས་པ་བརྒྱུད་མིའི་རང་བཞིན་ལྷན་སྐྱེས་དེ་བྱམས་བརྩེ་ཡིན་པ་བརྗོད་ཡོད། ལྷག་པར་ཚན་རིག་པས་བརྟག་དཔྱད་བྱས་པ་བརྒྱུད་རྒྱུན་དུ་སེམས་ནང་འཁོན་འཛིན་དང་ཞེ་སྡང་བྱས་ནས་བསྡད་པ་ཡིན་ན་ལུས་པོའི་ནད་འགོག་བྱེད་ཀྱི་ཟུངས་ཉམས་ཆག་འགྲོ་རྒྱུ་ཡིན་པ་བརྗོད་ཀྱི་འདུག དེ་ལས་ལྡོག་སྟེ་བྱམས་པ་དང་བརྩེ་བའི་བསམ་བློས་ལུས་པོའི་འཕྲོད་བསྟེན་ལའང་ཕན་གྱི་ཡོད་པ་བརྗོད་ཀྱི་ཡོད།
ང་ཚོ་ཆུང་བྱིས་པའི་གནས་སྐབས་སུ་གཞན་ལ་རང་བཞིན་བཅོས་མིན་གྱི་མཛའ་བརྩེའི་བསམ་པ་ཡོད། དེ་ནས་ནར་སོན་སྐབས་རང་གཞན་གྱི་བསམ་བློ་དེ་སླེབས་པ་རེད། དེང་དུས་ཤེས་ཡོན་ལམ་ལུགས་དེ་ནུབ་ཕྱོགས་ནས་དར་བ་ཞིག་རེད། འོན་ཀྱང་རྒྱ་གར་ནང་ལ་མཚོན་ན་ལོ་ངོ་མང་པོའི་གོང་ནས་འཚེ་བ་མེད་པ་དང་། བྱམས་བརྩེ། ཞི་གནས་དང་ལྷག་མཐོང་སོགས་ཉམས་ལེན་དར་སྲོལ་ཡོད། ནང་པ་སངས་རྒྱས་པ་དང་གཅེར་བུ་བ་གཉིས་སྲོལ་རྒྱུན་དེ་དག་ནས་མཆེད་པ་ཞིག་རེད། རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དང་འབྲེལ་བའི་སྲོལ་རྒྱུན་རིག་གནས་དེ་དག་ཐོག་དེང་དུས་ཤེས་ཡོན་བསྣན་ནས་ང་ཚོས་ངེས་པར་སློབ་སྦྱོང་བྱེད་དགོས། དེ་ལྟར་མིན་ཚེ་དེང་དུས་ཤེས་ཡོན་ལམ་ལུགས་ནང་ཕྱི་དངོས་པོ་དཔལ་འབྱོར་འཛུགས་སྐྲུན་ཁོ་ན་མ་གཏོགས་ནང་གི་བསམ་བློ་གཏོང་སྟངས་ཐོག་དོ་སྣང་རྩ་བ་ནས་བྱེད་ཀྱི་མེད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ་འདུག
མཐོ་སློབ་དེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཛམ་གླིང་ཞི་བདེ་དང་ཤེས་ཡོན་གོང་སྤེལ་གྱི་སློབ་གསོ་སོགས་རླབས་ཆེན་གྱི་མཛད་ཁུར་ལ་ངོས་འཛིན་ཞུ་སླད་མཁས་པའི་མཚན་གནས་ཤིག་ཀྱང་འབུལ་བཞེས་མཛད་འདུག མཐར་༸གོང་ས་༸སྐྱབས་མགོན་ཆེན་པོ་མཆོག་གིས་མཐོ་སློབ་ཀྱི་ར་བའི་ནང་ཤིང་སྣ་འདེབས་འཛུགས་དང་སྦྲགས། མཐོ་སློབ་ཀྱི་མཚན་བྱང་གསར་པ་ཞིག་དབུ་འབྱེད་མཛད་འདུག དེ་རྗེས་ཉིན་གུང་ལྗགས་སྨིན་དགྱེས་བཞེས་མཛད་རྗེས་བཞུགས་གནས་གསོལ་མགྲོན་ཁང་དུ་ཆིབས་སྒྱུར་བསྐྱངས་ཡོད་པ་བཅས།།
