ཕྱི་ལོ་ ༢༠༡༩ ཟླ་ ༡༠ ཚེས་ ༢༩ རེས་གཟའ་མིག་དམར།

༄༅། །བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༦༠ འཁོར་བའི་དུས་ཆེན་སྲུང་བརྩི་དང་བསྟུན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་ཟློས་གར་ཚོགས་པས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༩ ཟླ་ ༡༠ ཚེས་ ༢༩ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༩།༢༠ ཙམ་ལ་བོད་ཀྱི་ཟློས་གར་ཚོགས་པའི་ཚོགས་ཁང་གསར་པ་བོད་ཀྱི་གར་གླུའི་རིག་རྩལ་ཁང་ལ་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་རབ་གནས་བྱིན་རླབས་བཀའ་དྲིན་ཆེ་བ་སྩལ་སོང་།

དེ་ནས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྤྱི་འཐུས་རྒྱུན་ལས། ལྷན་ཁང་ཁག་གི་དྲུང་ཆེ། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ། བོད་ཀྱི་ཟློས་གར་ཚོགས་པའི་འགན་འཛིན་དང་དགེ་ལས་སློབ་ཕྲུག་རྣམ་པ། སུད་སིར་རྟེན་གཞི་བྱས་པའི་ནོར་བཟང་ཐེབས་རྩ་ཚོགས་པའི་འགན་འཛིན་རྣམ་པ། རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོའི་ཚོགས་བཅར་བ། བོད་ཀྱི་ཟློས་གར་ཚོགས་པའི་འགན་འཛིན་ཟུར་པ་རྣམས་ཀྱིས་གཙོས་དགེ་ལས་དང་ཚོགས་མི་ཟུར་པ། སེར་སྐྱ་མི་མང་དང་བཅས་པ་ལྷན་འཛོམས་ཐོག་མགོན་པོ་གང་ཉིད་མཆོག་བོད་ཀྱི་ཟློས་གར་ཚོགས་པའི་ཚོགས་ཁང་གསར་པ་བོད་ཀྱི་གར་གླུའི་རིག་རྩལ་ཁང་ནང་གདན་ཞུས་ཀྱིས་བཞུགས་ཁྲིར་༸ཞབས་སོར་བཀའ་དྲིན་ཆེ་བ་འཁོད་རྗེས།

བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་བོད་ཀྱི་ཟློས་གར་ཚོགས་པའི་འགན་འཛིན་ངག་དབང་ཡོན་ཏན་ལགས་ཀྱིས་སྤྱི་ནོར་༸གོང་ས་༸སྐྱསབ་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་བོད་ཀྱི་ཟློས་གར་ཚོགས་པའི་འགན་འཛིན་གྱིས་འཚམས་འདྲི་དང་འབྲེལ་དུས་ཆེན་ངོ་སྤྲོད་ཀྱི་ལས་བསྡོམས་ལྷ་སྙན་སྒྲོན་འབུལ་ཞུས།

དེ་རྗེས་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོའི་གཙོ་སྐྱོང་བ་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁས་དབང་བཀྲི་ཤིས་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་དང་། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཅས་ཀྱི་མཐུན་འགྱུར་འོག་ཚོགས་ཆེན་གྱི་བྱུང་རིམ་དང་ལས་རིམ་ཁག དེ་བཞིན་ཚོགས་ཞུགས་མི་གྲངས་དང་བརྗོད་གཞི་ཁག་སོགས་ཚོགས་ཆེན་དང་འབྲེལ་བའི་ངོ་སྤྲོད་གསུང་བཤད་གནང་གྲུབ་བསྟུན་དམིགས་བསལ་སྐུ་མགྲོན་བོད་ཀྱི་ཟློས་གར་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཙོ་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། 

ཕྱི་ལོ་ ༡༩༥༩ ལོར་བོད་ས་ཤོར་ནས་བཙན་བྱོལ་དུ་འབྱོར་བའི་སྐབས་ངོ་ཤེས་པ་གནམ་དང་ས་མ་གཏོགས་མེད་པའི་གནས་སྟངས་འོག་སྒྱུ་སྩལ་བ་ཁག་གཅིག་༸རྒྱལ་བའི་གཟིམ་ཆུང་དུ་མཇལ་བཅར་ཞུ་སྐབས་མགོན་པོ་གང་ཉིད་མཆོག་གིས། ད་ལྟའི་ཆར་ཁྱེད་ཚོ་སྒྱུ་སྩལ་བ་ཉུང་ཤས་ཤིག་ལས་མེད་ནའང་སེམས་ཤུགས་མ་ཆག་པར་དཀའ་ལས་བརྒྱག་ཤོག་ཨང་། རིམ་པས་ང་ཚོའི་ཟློས་གར་འདི་ཡར་རྒྱས་འགྲོ་གི་རེད། ཅེས་མ་འོངས་ལུང་བསྟན་མཛད་པ་ལྟར་ད་ལན་བོད་ཀྱི་ཟློས་གར་ཚོགས་པ་བཙུགས་ནས་ལོ་ངོ་ ༦༠ འཁོར་བའི་དུས་དྲན་སྲུང་བརྩི་ཞུ་རྒྱུའི་བསྐལ་བཟང་གི་གོ་སྐབས་བཟང་པོ་ཐོབ་པ་དེ་ནི་མགོན་པོ་གང་ཉིད་མཆོག་གིས་ཐོག་མ་ཉིད་ནས་མཁྱེན་པའི་ཐོག་ནས་སེམས་ཤུགས་སྤར་གནང་མཛད་པ་དང་ལམ་སྟོན་མཛད་པ་དེར་སྒྱུ་སྩལ་བ་མི་རབས་གོང་མ་ཚོས་སྐུ་ལས་རབ་དང་རིམ་པ་བསྐྱོན་པ་ལ་བརྟེན་ནས་གྲུབ་འབྲས་སྨིན་པ་ཞིག་ཡིན། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རླབས་ཆེན་གྱི་མཛད་འཕྲིན་ཧ་ཅང་མང་པོ་ཡོད་པའི་ནང་ནས་མཛད་འཕྲིན་གཅིག་ནི་བོད་ཀྱི་ཟློས་གར་ཚོགས་པ་ད་བར་རྒྱུན་གནས་ཐུབ་པ་མ་ཟད། བཙན་བྱོལ་བོད་མིའི་སློབ་གྲྭ་ཁག་ཡོངས་ལའང་བོད་ཀྱི་རིག་གཞུང་འཁྲབ་སྟོན་སློབ་ཁྲིད་ཧུར་ཐག་གནང་བཞིན་ཡོད།  

ཕྱོགས་མཚུངས་ཕྱི་རྒྱལ་ཡུལ་གྲུ་ཁག་གི་ནང་དུའང་བོད་ཀྱི་ཐུན་མིན་རིག་གཞུང་འཁྲབ་སྟོན་ངོམས་སུ་ཆོག་པ་ཡོད་པ་དེ་ནི་ཟློས་གར་འཁྲབ་སྟོན་པ་ཟུར་པ་རྣམས་ཀྱི་སྐུ་ལས་བསྐྱོན་པ་ལ་བརྟེན་ནས་བྱུང་བ་ཡིན། 

བོད་ནང་ཆ་མཚོན་ན། རྒྱ་ནག་གཞུང་གིས་བོད་མི་རྣམས་རྒྱ་སྡེ་བསྒྱུར་རྒྱུའི་འབད་བརྩོན་བྱེད་ཀྱི་ཡོད། བཙན་བྱོལ་ནང་བོད་མིའི་ཐུན་མོང་མིན་པའི་སྲོལ་རྒྱུན་ལམ་ལུགས་ཀྱི་སྒྱུ་སྩལ་དང་། རིག་གཞུང་སྲུང་སྐྱོབ་ཙམ་མ་ཟད། དར་སྤེལ་གནང་ཐུབ་པ་དེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་རྣམ་པ་ཚོ་ཚང་མས་སྐུ་ལས་བསྐྱོན་པར་བརྟེན་བྱུང་བ་ཡིན་སྟབས།  དེ་རིང་བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༦༠ འཁོར་བའི་དུས་དྲན་འདི་ཡང་རླབས་ཆེན་གྱི་མཛད་འཕྲིན་ཞིག་རེད། དེར་རྟེན་སླར་ཡང་རྣམ་པ་ཚོ་ཚང་མར་བཀའ་ཤག་གི་ཚབ་ཞུས་ཏེ་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 

དེ་བཞིན་བཙན་བྱོལ་ནང་བོད་ཀྱི་སྨན་རྩིས་ཁང་ཐོག་མར་བསྐྱར་གསོ་བྱེད་སྐབས་སྨན་པ་གཅིག་དང་སློབ་ཕྲུག་བཞི་ལས་མེད་པ་དང་། ད་ལྟའི་ཆར་བོད་ཀྱི་སྨན་རྩིས་ཁང་གིས་འཛམ་གླིང་ཡོངས་ལ་འཕྲོད་བསྟེན་ཐོག་རླབས་ཆེན་གྱི་ཞབས་འདེགས་བསྒྲུབས་དང་སྒྲུབ་བཞིན་ཡོད་པ་འདི་མི་ཐོག་རྒན་པ་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་དཀའ་ལས་བརྒྱབ་སྟེ་རིམ་པས་ཡར་རྒྱས་ཕྱིན་ནས་ངོམས་སུ་ཆོག་པ་ཆགས་ཡོད། ཕྱོགས་མཚུངས་བཙན་བྱོལ་བོད་མིའི་གཞིས་ཆགས་ཁག་ཡིན་ནའང་ཆོལ་ཁ་གསུམ་གྱི་བོད་མི་རྣམས་གཅིག་ཏུ་སྒྲིལ་ནས་གནས་ཐུབ་པ་དང་གཞིས་ཆགས་ཁག་གི་ནང་དགོན་སྡེ་གྲྭ་ཚང་དང་སློབ་གྲྭ། སྨན་ཁང་བཅས་ཡོད།

བོད་ནང་རྒྱ་ནག་གཞུང་གིས་དགོན་སྡེ་བརྒྱ་ཆ་ ༩༨ གཏོར་བཤིག་བཏང་ཡོད། བཙན་བྱོལ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་སྐུ་ལས་བསྐྱོན་ཏེ་དགོན་སྡེ་ཆེ་ཁག་མང་ཆེ་བ་སླར་གསོ་མཛད་ཐུབ་པ་འདི་མགོན་པོ་གང་ཉིད་མཆོག་གི་བཀའ་དྲིན་ལ་བརྟེན་ནས་བྱུང་བ་ཞིག་རེད། 

ཕྱོགས་གཅིག་ནས་ང་ཚོ་བཙན་བྱོལ་བའི་གནས་སྟངས་ཆགས་ཡོད་ནའང་བཙན་བྱོལ་བ་གཞན་དང་བསྡུར་བ་ཡིན་ན།  མཉམ་འབྲེལ་རྒྱལ་ཚོགས་གཞིར་བཟུང་བྱས་ན་སྐྱབས་བཅོལ་བ་མི་འབོར་ས་ཡ་ ༦༠ ཙམ་ཡོད་ཟེར་གྱི་ཡོད། དེ་དག་གི་ནང་ནས་ང་ཚོ་ནི་ཉུང་ཤས་ལས་མེད། མཉམ་འབྲེལ་རྒྱལ་ཚོགས་ཀྱི་སྐྱབས་བཙོལ་སྡེ་ཚན་གྱི་སྙན་ཐོ་ནང་ས་ཡ་ ༦༠ ནང་ནས་སློབ་གྲྭ་འགྲོ་ཐུབ་མཁན་ས་ཡ་ ༧ དང་འབུམ་ ༤ ཡོད། འོན་ཀྱང་ས་ཡ་ ༤ ཐམ་པ་སློབ་གྲྭར་རྩ་བ་ཉིད་ནས་འགྲོ་ཐུབ་ཀྱི་མེད། 

དེ་བཞིན་མཉམ་འབྲེལ་རྒྱལ་ཚོགས་ཀྱི་སྤྱི་ཡོངས་སྙན་ཐོ་ཞིག་གི་ནང་འཛམ་གླིང་ནང་རང་དབང་ཅན་གྱི་རྒྱལ་ཁབ་ཁག་གི་ནང་སློབ་གྲྭར་འགྲོ་ཐུབ་མཁན་གྱི་ཕྲུ་གུ་གྲངས་ས་ཡ་ ༢༦༣ ཡོད་པའི་ནང་ཕྲུ་གུ་ ༥ ནས་ཕྲུ་གུ་ ༡ སློབ་གྲྭར་འགྲོ་ཐུབ་ཀྱི་མེད། རང་དབང་ཡོད་པའི་རྒྱལ་ཁབ་ཚོའི་ནང་གཞུང་གིས་ཕྲུ་གུ་ ༥ ནང་ནས་ ༡ ལ་སློབ་སྦྱོང་སྤྲོད་ཐུབ་ཀྱི་མེད། འོན་ཀྱང་ང་ཚོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་ང་ཚོའི་ངོས་ནས་ཕྲུ་གུ་རྣམས་སློབ་གྲྭར་གཏོང་ཐུབ་ཀྱི་ཡོད་པ་མ་ཟད། ཡི་གེ་འབྲི་ཀློག་ཤེས་མཁན་གྱི་་གྲངས་ཚད་དེ་བརྒྱ་ཆ་ ༩༢་་༩༤ རེད་ཟེར་གྱི་ཡོད། རྒྱ་གར་ནང་ཡི་གེ་འབྲི་ཀློག་ཤེས་མཁན་གྱི་བརྒྱ་ཆ་ ༨༢ ཟེར་གྱི་ཡོད། ང་ཚོའི་སྤྱི་ཚོགས་ནང་ཡི་གེ་འབྲི་ཀློག་ཤེས་མཁན་གྱི་བརྒྱ་ཆ་དེ་ཙམ་མཐོ་བོ་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་རྒྱལ་ཁབ་ ༦༥ ལྷག་ནང་ཆིབས་སྒྱུར་བསྐྱངས་ཡོད་པ་དང་། ཆེ་བསྟོད་གཟེངས་རྟགས་ ༡༥༠ ལྷག་ཙམ་འབུལ་བཞེས་མཛད་ཡོད་པ་མ་ཟད། ཕྱག་དེབ་ ༡༠༠ ལྷག་ལྗགས་རྩོམ་གནང་བའི་བཀའ་དྲིན་ལ་བརྟེན་ནས་བོད་མི་སུ་འདྲ་ཞིག་ཡིན་ནའང་རྒྱལ་སྤྱིའི་སྡིངས་ཆ་དང་གྲོས་ཚོགས་འཐུས་མི། གནད་ཡོད་མི་སྣ་སུ་ཞིག་དང་ཐུག་པ་ཡིན་ནའང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལས་ལྷག་པའི་དབུ་ཁྲིད་ཅིག་འཛམ་གླིང་སྟེང་མེད་སྟབས། བོད་མི་རྣམས་ཧ་ལས་པའི་བསོད་ནམས་ཆེན་པོ་རེད། བོད་དོན་ཞུ་གཏུག་ལ་རྒྱབ་སྐྱོར་མུ་མཐུད་གནང་གི་ཡིན། ཞེས་རྒྱལ་སྤྱིའི་ཐོག་བོད་དོན་ལ་རྒྱབ་སྐྱོར་ཤུགས་ཆེ་ཐོབ་བཞིན་པ་འདི་ཡང་༧གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་རེད། དེར་བརྟེན་བཀའ་ཤག་ནས་སང་ཕོད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༥ ཕེབས་པ་དང་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་བོད་ཀྱི་ཟློས་གར་ཚོགས་པའི་ཚོགས་ཁང་གསར་རྒྱག་ལས་གཞིའི་ཆེད་མཐུན་འགྱུར་རོགས་རམ་གནང་མཁན་བོད་མིའི་སྒྲིག་འཛུགས་དང་། དེ་བཞིན་སུད་སིར་བཅའ་སྡོད་ནོར་བཟང་ཐེབས་རྩ་བཅས་ལ་ཐུགས་རྗེ་ལེགས་འབུལ་མཚོན་ཆེད་སྤྱི་ནོར་༧གོང་ས་༸སྐྱབས་མགོན་ཆེན་པོམཆོག་གིས་ཕྱག་ནས་དྲིན་གསོའི་ཕྱག་རྟགས་གསོལ་སྩལ་མཛད་པ་དང་།

དེ་བཞིན་དགུང་ལོ་ ༩༣ ལ་ཕེབས་པའི་བསམ་ཕོ་འཇིགས་མེད་དབང་ཆེན་ལགས་བོད་གཞིས་བྱེས་གཉིས་ནང་བོད་ཀྱི་རོལ་ཆ་མཁན་སྐུ་སྣ་བགྲེས་ཤོས་ཀྱི་མི་གཡང་དང་། རྒྱལ་ཁབ་ཀྱི་གཅེས་ནོར་དཔེ་བཟང་ཕུལ་བྱུང་མི་སྣའི་མཚན་གསོལ་གཟེངས་རྟགས་བཅས་གསོལ་སྩལ་མཛད་ཡོད། ལྷག་པར་བོད་ཀྱི་ཟློས་གར་ཚོགས་པའི་དབུ་ལས་ཟུར་ཐུན་མོང་ནས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་སུ་དྲན་པ་དང་། མགོན་པོ་གང་ཉིད་མཆོག་སྐུ་གེགས་མཚན་མ་ཡོད་རིགས་ཞི་ནས་མཛད་འཕྲིན་ཕྱོགས་བཅུར་རྒྱས་པ་མཚོན་སླད་སྐུ་རྒྱུ་རིན་ཆེན་སྣ་ཚོགས་ལས་གྲུབ་པའི་དཔལ་ཕྱག་ན་རྡོ་རྗེའི་སྤྲུལ་པར་གྲགས་པ་གསང་བདག་རྔོན་པའི་སྣང་བརྙན་ངོ་མཚར་ཅན་ཞིག་བཀའ་དྲིན་རྗེས་དྲན་གཟེངས་རྟགས་སུ་འབུལ་ལམ་ཞུས་པ་མ་ཟད། བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་ལྗགས་རྩོམ་གནང་བའི་བསྟོད་ཚིག་བཀའ་དྲིན་རྗེས་དྲན་གྱི་མཆོད་པའི་བསྟོད་དབྱངས་སུ་འབུལ།

དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་ཏེ་མཛད་སྒོ་རྒྱལ་ཁའི་ངང་གྲོལ་ཡོད་པ་དང་། མཛད་སྒོ་གྲོལ་རྗེས་མགོན་པོ་གང་ཉིད་མཆོག་ Dharamkot ས་གནས་སུ་ཡོད་པའི་ Hyatt Regency ཞེས་པའི་སྐར་མ་ལྔ་ཅན་གྱི་མགྲོན་ཁང་གི་རྒྱལ་སྒོར་དེང་ལུགས་དར་རས་གཅོད་འབྲེག་གིས་དབུ་འབྱེད་མཛད་རྗེས་དེ་སྔའི་ཧི་མཱ་ཅལ་མངའ་སྡེའི་བློན་ཆེན་སྐུ་ཞབས་ཇི་ཨེས་བྷ་ལི་ G.S Bali མཆོག་གི་ནང་མི་དང་ལྷན་ཉིན་གུང་ལྗགས་སྨིན་དགྱེས་བཞེས་མཛད་པ་བཅས། །