སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱིས་གསེར་གྱི་རྟགས་མ་ཕུལ་ནས་ལོ་ངོ་ ༡༢ འཁོར་བའི་མཛད་སྒོར་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས་གསུང་བཤད་གནང་བ།

གསར་ལས་ཁང་གི་གསར་འགོད་པས།

༢༠༡༩-༡༠-༢༡

ཕྱི་ལོ་ ༢༠༡༩ ཟླ་ ༡༠ ཚེས་ ༢༡ རེས་གཟའ་ཟླ་བ།

༄༅། །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ ༡༠ ཚེས ༢༠ རེས་གཟའ་ཉི་མའི་དགོང་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གསེར་གྱི་རྟགས་མ་ཕུལ་ནས་ལོ་ངོ་ ༡༢ འཁོར་བའི་དགའ་སྟོན་གྱི་མཛད་སྒོར་ཨ་རིའི་རྒྱལ་སའི་མངའ་ཁུལ་བོད་རིགས་སྤྱི་མཐུན་ཚོགས་པས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་སྐུ་མགྲོན་གཙོ་བོར་མགྲོན་འབོད་ལྟར་ཆེད་ཕེབས་གནང་།

དམིགས་བསལ་སྐུ་མགྲོན་དུ་ཨ་རིའི་སྲིད་འཛིན་ཟུར་པ་ཇོར་ཇི་སྦུ་ཤུའི་སྐུ་མཆེད་ལྕམ་སྐུ་ཨེལ་སེ་ཝོལ་ཀེར་ Elsie Walker ལགས་དང་ཁོང་གི་སྐུ་ཟླ་སྐུ་ཞབས་ཨོལ་ཁེལ་སྦོ་ནི་ Al Kilbourne ལགས། བཀའ་བློན་ཁྲི་ཟུར་བསྟན་འཛིན་རྣམ་རྒྱལ་ལགས། ཤིང་ཟ་རིན་པོ་ཆེ། གཞན་ཡང་ས་གནས་ཀྱི་གནད་ཡོད་དང་བོད་རིགས་མི་མང་བརྒྱ་ལྷག་འདུ་འཛོམས་གནང་ཡོད།

མཛད་སྒོའི་ཐོག་བོད་རིགས་སྤྱི་མཐུན་ཚོགས་པའི་ཚོགས་གཙོ་སྒོ་རབ་བསྟན་འཛིན་སྒྲོལ་དཀར་ལགས་ནས་ངོ་སྤྲོད་གསུང་བཤད་གནང་རྗེས་དམིགས་བསལ་སྐུ་མགྲོན་ལགས་ནས་གསུང་བཤད་གནང་།

དེ་རྗེས་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་རིགས་སྤྱི་མཐུན་ཚོགས་པའི་ཚོགས་མི་སྐུ་ཞབས་རྡོ་རྗེ་དགྲ་འདུལ་ལགས་ནས་དབྱིན་ཡིག་ཐོག་བརྩམས་གནང་བའི་བཙན་རྒོལ་དང་གཅིག་སྒྲིལ་ Resistance and Unity ཞེས་པའི་དཔེ་དེབ་ཞིག་དབུ་འབྱེད་གནང་བ་དང་། ཨ་རི་གཞུང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་རྟགས་མ་ཕུལ་བའི་བྱུང་རིམ་དང་དེའི་རིན་ཐང་སོགས་ཀྱི་སྐོར་གསུང་བཤད་གནང་ཡོད་པ་བཅས། །