ཕྱི་ལོ་ ༢༠༡༩ ཟླ་ ༡༠ ཚེས་ ༡༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༡༧ རེས་གཟའ་ཕུར་བུའི་ཉིན་རྡ་ས་ཉེ་འདབས་སུ་ཆགས་པའི་ཤེས་རབ་དགའ་ཚལ་སློབ་གླིང་དུ་སཾ་བྷོ་ཊ་བོད་སློབ་འཛིན་ཚོགས་སྤྱི་ཁྱབ་ཡིག་ཚང་གི་གོ་སྒྲོག་འོག་ཤེས་རིག་ཁྱབ་ཁོངས་སཾ་བྷོ་ཊ་བོད་སློབ་ཚོགས་པ་དབུ་བརྙེས་ནས་ལོ་ངོ་ ༢༠ འཁོར་བའི་དུས་དྲན་མཛད་སྒོ་སྲུང་བརྩི་གཟབ་རྒྱས་ཞུས་ཡོད།
དེ་ཉིན་སྔ་དྲོ་ཆུ་ཚོད་ ༩།༡༥ ཐོག་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཤེས་རིག་བཀའ་བློན་པདྨ་དབྱངས་ཅན་མཆོག་དང་། དམིགས་བསལ་སྐུ་མགྲོན་སཾ་བྷོ་ཊའི་སྤྱི་ཁྱབ་འགན་འཛིན་ཟུར་པ་དང་མ་སུ་རི་བོད་ཁྱིམ་དྲུང་ཆེ་ལས་ཐོག་ཀརྨ་ཆུང་བདག་ལགས་དང་། ཤེས་རིག་དྲུང་ཆེ་ཀརྨ་སེངྒེ་ལགས། སཾ་བྷོ་ཊའི་སྤྱི་ཁྱབ་འགན་འཛིན་གྱིས་གཙོས་འགན་འཛིན་གཞོན་པ། ཚོགས་སྡེ་ཁག་གི་སྐུ་ཚབ་རྣམ་པ། SFU སློབ་ཕྲུག་རྣམ་པའི་སྐུ་ཚབ། ཌེན་མཱག་གཞུང་གི་ཌ་ནི་ཌ་ DANIDA རོགས་ཚོགས་ཀྱི་སྐུ་ཚབ། གཞན་ཡང་ཤེས་རིག་ཁྱབ་ཁོངས་སློབ་ཁག་ནང་ཞབས་འདེགས་ཞུས་ཏེ་ལོ་ངོ་ ༢༠ ལྷག་ཙམ་འཁོར་མཁན་གྱི་དགེ་ལས་ཟུར་པ་ཁྱོན་མི་གྲངས་ ༤༧ དང་དགེ་ལས་ལས་ཐོག་ ༦༡ བཅས་ཁྱོན་དགེ་ལས་མི་གྲངས་ ༡༠༨ ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་གི་མཇལ་དར་སྒྲོན་འབུལ་དང་འབྲེལ་སྣང་གསལ་ཞལ་ཕྱེ་གནང་གྲུབ་མཚམས། དཔེ་སྟོན་སློབ་གྲྭའི་སློབ་ཕྲུག་རྣམས་ནས་འཕགས་བོད་གཉིས་ཀྱི་རྒྱལ་གླུ་རྔ་རོལ་དང་བཅས་དབྱངས་སུ་གྱེར།
དེ་ནས་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་གྱི་རྒྱལ་གཅེས་པ་རྣམས་ཀྱི་ཆེད་མྱ་ངན་གུས་འདུད་ངག་གཅད་སྐར་མ་གཅིག་རིང་གནང་རྗེས་སྤྱི་ནོར་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་སྐུ་ཚེ་ཞབས་པས་བརྟན་ཆེད་རྒྱལ་བའི་ཞབས་བརྟན་འུར་འདོན་གནང་མཚམས་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་འདེགས་འབུལ་ཞུས།
དེ་ནས་སཾ་བྷོ་ཊའི་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས་ཀྱིས་མཛད་སྒོའི་ངོ་སྤྲོད་ཀྱི་གསུང་བཤད་གནང་རྗེས་དམིགས་བསལ་སྐུ་མགྲོན་ཀརྨ་ཆུང་བདག་ལགས་ཀྱིས་རང་ཉིད་སཾ་བྷོ་ཊའི་ནང་ཕྱག་ལས་གནང་བའི་སྐོར་ཉམས་མྱོང་དང་། ཤེས་རིག་ཁྱབ་ཁོངས་བོད་སློབ་ཚོགས་པ་དབུ་བརྙེས་ཏེ་ལོ་ངོ་ ༢༠ འཁོར་བའི་མཛད་སྒོའི་ཐོག་སཾ་བྷོ་ཊ་བོད་སློབ་འཛིན་ཚོགས་སྤྱི་ཁྱབ་ཡིག་ཚང་ནས་སློབ་ཁག་ནང་ཞབས་འདེགས་ཞུས་ཏེ་ལོ་ངོ་ ༢༠ ལྷག་ཅམ་ཕྱིན་པའི་དགེ་ལས་རྣམས་འདུ་བསྐོང་གིས་གུས་བརྩི་གནང་བར་ཁོང་གིས་སྙིང་ཐག་པ་ནས་ཐུགས་རྗེ་ཆེ་ཞུས་པ་མ་ཟད། ད་ཆ་གཉན་འཕྲང་ཅན་གྱི་དུས་འདིར་མ་འོངས་ཕྲུ་གུའི་མདུན་ལམ་ཡར་རྒྱས་གཏོང་ཕྱོགས་ཐད་དགེ་རྒན་དང་ལས་བྱེད་རྣམས་ནས་འཕྱར་གྲུ་མཉམ་འདེགས་ཐོག་ཤུགས་སྣོན་སྐྱོན་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་དང་།
ཕྱི་ལོ་ ༢༠༠༤ ལོར་ཤེས་ཡོན་སྲིད་བྱུས་གཏན་འབེབས་གནང་རྗེས་སཾ་བྷོ་ཊའི་སློབ་ཁག་ནང་ལག་བསྟར་གནང་འགོ་བཙུགས་པ་དང་ལག་བསྟར་གནང་དགོས་དོན་ནི། སཾ་བྷོ་ཊའི་དམིགས་ཡུལ་དང་ཤེས་ཡོན་སྲིད་བྱུས་ཀྱི་དགོས་པ་མཐུན་པར་བརྟེན་ལག་བསྟར་གནང་ཡོད་པ། ཤེས་ཡོན་སྲིད་བྱུས་དང་མཐུན་པའི་སློབ་ཕྲུག་གསོ་སྐྱོང་གནང་རྒྱུ་དེ་ཧ་ཅང་གནད་འགག་ཆེན་པོ་ཡིན་སྐོར་སོགས་གསུངས།
དེ་ནས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཤེས་ཡོན་གལ་ཆེ་དོན་ཆེར་གཟིགས་ནས་ཐོག་མར་བཙན་བྱོལ་དུ་འབྱོར་མཚམས་སློབ་གྲྭ་གསར་འཛུགས་མཛད་ཡོད། ད་ལྟ་འདིར་ཡོད་དགེ་ལས་རྣམས་ཆ་ཚང་སློབ་གྲྭ་དེ་དག་ནས་འགྲིམས་པ་ཤ་སྟག་རེད། ང་ཚོར་གང་ཡོད་པ་རྣམས་བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བྱུང་ཞིག་ཡིན་པ་དེ་ནམ་ཡང་བརྗེད་མི་རུང་།
སློབ་ཕྲུག་རྣམས་ཀྱི་ཤེས་ཡོན་དང་བཟང་སྤྱོད་མདུན་ལམ་ཐད་དགེ་ལས་ཡོངས་ནས་སྐུ་ལས་ཧ་ཅང་སྐྱོན་ཡོད་པར་བརྟེན། དེ་རིང་སྡིངས་ཆ་འདི་བརྒྱུད་ངས་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཕྱོགས་མཚུངས་བོད་མི་ཙམ་མ་ཟད་། རྒྱ་གར་གྱི་དགེ་རྒན་རྣམས་ནས་ཀྱང་བོད་ཕྲུག་གི་ཤེས་ཡོན་མདུན་ལམ་ཐོག་ཤུགས་སྣོན་སྐྱོན་པར་སླར་ཡང་ཐུགས་རྗེ་ཆེ་ཞུ་འདོད་བྱུང་། སཾ་བྷོ་ཊ་བོད་སློབ་འཛིན་ཚོགས་སྤྱི་ཁྱབ་ཡིག་ཚང་ནས་དགེ་ལས་ཟུར་པ་དང་ལས་ཐོག་རྣམས་འདུ་བསྐོང་གནང་བར་ངས་རྗེས་སུ་ཡི་རངས་དང་བསྔགས་བརྗོད་ཞུ་རྒྱུ་ཡིན།
ད་ཆ་སེམས་འཚབ་སྐྱེ་གཞི་ཞིག་ལ་བཙན་བྱོལ་བོད་མིའི་སློབ་གྲྭ་ཁག་གི་ནང་སློབ་ཕྲུག་གི་གྲངས་འབོར་ཉིན་རེ་བཞིན་ཉུང་དུ་འགྲོ་བཞིན་པ་དེ་རེད། དགེ་ལས་ངོས་ནས་ཕྲུ་གུར་ཤེས་ཡོན་སྤུས་ཚད་ལྡན་པ་ཞིག་དང་། སློབ་སྦྱོང་གི་གནས་ཚད་གོང་འཕེལ་གཏོང་ཕྱོགས་ཙམ་མ་ཟད། བཟང་སྤྱོད་ལྡན་པའི་བོད་མི་ཡ་རབས་ཤིག་སྐྲུན་དགོས་པ་ཧ་ཅང་གལ་ཆེན་པོ་རེད། དུས་རྒྱུན་མགོན་པོ་གང་ཉིད་མཆོག་ནས། བོད་མི་བཟང་པོ་ཞིག་བྱོས། ཞེས་བཀའ་སློབ་ཡང་ཡང་ཕེབས་བཞིན་ཡོད། ཤེས་ཡོན་ཡོད་ཀྱང་བོད་མི་བཟང་པོ་ཞིག་མེད་ན་ཆོ་མེད། བོད་མི་བཟང་པོ་ཞིག་ཆགས་དགོས།
བོད་ཀྱི་ཐུན་མིན་སྐད་ཡིག ཆོས་དང་རིག་གཞུང་མི་ཉམས་རྒྱུན་འཛིན་བྱ་དགོས། སྐད་ཡིག་ནི་མི་རིགས་ཀྱི་བླ་སྲོག་ཡིན། ཅེས་བཤད་སྲོལ་ལྟར། སོ་སོའོ་ཕ་སྐད་གཙང་མ་དེ་བཞིན་གལ་ཆེན་པོར་བརྩིས་ཏེ་བོད་སྐད་སྐྱོན་དགོས། གཞིས་བཞུགས་བོད་མི་ཚོར་སྐད་ཡིག་སྲུང་སྐྱོབ་བྱ་རྒྱུའི་གི་རང་དབང་མེད། ཤེས་རིག་ལས་ཁུངས་ངོས་ནས་ཤེས་ཡོན་སྲིད་བྱུས་དང་མཐུན་པའི་སློབ་ཕྲུག་གསོ་སྐྱོང་གནང་རྒྱུ་དེ་ཧ་ཅང་གནད་འགག་ཆེན་པོ་མཐོང་གི་ཡོད། ཕ་མས་ཤེས་ཡོན་སྲིད་བྱུས་ཐོག་ངེས་པ་རྙེད་པའི་ཐོག་ནས་རྒྱབ་སྐྱོར་གནང་དགོས། ཞེས་སོགས་གསུངས།
སྐབས་དེར་སྐུ་མགྲོན་གཙོ་བ་ོཤེས་རིག་བཀའ་བློན་མཆོག་ནས་སཾ་བྷོ་ཊའི་སྤྱི་ཁྱབ་འགན་འཛིན་ཟུར་པ་ཀརྨ་ཆུང་བདག་ལགས་ལ་དམིགས་བསལ་ཕྱག་རྟགས་དང་། ཁྱབ་ཁོངས་སློབ་ཁག་ནང་ཞབས་འདེགས་ཞུས་ཏེ་ལོ་ངོ་ ༢༠ ལྷག་ཙམ་འཁོར་མཁན་གྱི་དགེ་ལས་ཟུར་པ་རྣམས་ལ་ལེགས་གསོལ་ཕྱག་རྟགས་གནང་གྲུབ་མཚམས་དམིགས་བསལ་སྐུ་མགྲོན་ཤེས་རིག་དྲུང་ཆེ་ནས་སློབ་ཁག་ནང་ཞབས་ཞུ་བསྒྲུབས་ནས་ལོ་ངོ་ ༢༠ ལྷག་འཁོར་མཁན་གྱི་དགེ་ལས་ལས་ཐོག་རྣམས་ལ་ལེགས་གསོལ་ཕྱག་རྟགས་གནང་། དེ་རྗེས་སཾ་བྷོ་ཊའི་སྤྱི་ཁྱབ་འགན་འཛིན་ནས་སྐུ་མགྲོན་རྣམས་ལ་ཐུགས་རྗེ་ཆེ་ཞུའི་ཕྱགས་རྟགས་གནང་རྗེས་མཛད་སྒོ་གྲོལ་ཡོད་པ་བཅས། །
