༢༠༡༩ ཟླ་ ༡༠ ཚེས་ ༢༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༣ རེས་གཟའ་ལྷག་པའི་སྔ་དྲོ་ཆུ་ཚོད་ ༩ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་འཛམ་གླིང་ནང་འཁྲུག་རྩོད་ཡོད་སའི་ས་ཁུལ་གཙོ་བོར་གྱུར་བའི་རྒྱལ་ཁབ་བཅུ་གཉིས་ནས་ཞི་བདེའི་དབུ་ཁྲིད་གཞོན་སྐྱེས་མི་གྲངས་ ༢༦ ལ་ཞི་བདེ་གོང་འཕེལ་གཏོང་ཕྱོགས་དང་བསམ་བློ་འགྱུར་བ་གཏོང་སྟངས་ཐད་བཀའ་སློབ་སྩལ་འདུག དེ་ཡང་ཐོག་མར་ལས་རིམ་གཙོ་སྐྱོང་བ་ལྕམ་སྐུ་ནེན་སི་ལགས་ཀྱིས་ངོ་སྤྲོད་ཞུས་འདུག
སྐབས་དེར་ཚོགས་བཅར་བ་རེ་རེས་རྒྱལ་ཁབ་གང་ཡིན་སོགས་ངོ་སྤྲོད་མ་ཞུས་གོང་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་ཚང་མ་གཞི་རིམ་གྱི་གནས་སྟངས་ཐོག་ནས་བརྗོད་ན། འགྲོ་བ་མི་རིགས་གཅིག་གྱུར་ཡིན་པ་དང་། རྒྱལ་ཁབ་དང་ཤ་མདོག ཆོས་ལུགས། རིགས་རུས་སོགས་མི་འདྲ་བའི་ཁྱད་པར་ཡོད་པ་དེ་དག་རིམ་པ་གཉིས་པའི་གནས་སྟངས་ཡིན་སྟབས་མགོན་པོ་མཆོག་གིས་དུས་རྟག་ཏུ་མི་གཞན་སུ་འདྲ་ཞིག་དང་ཐུག་སྐབས་མི་གཅིག་གྱུར་ཡིན་པའི་འདུ་ཤེས་འཛིན་བཞིན་ཡོད་སྐོར་བཀའ་སློབ་སྩལ་འདུག
དེ་ནས་ཚོགས་མི་ཚོས་རེ་རེ་བཞིན་ངོ་སྤྲོད་ཞུ་སྐབས། གླིང་ཆེན་ཨ་ཕི་རི་ཀའི་ལྷོ་སུ་ཌན་ South Sudan དང་། ལི་བྷི་ཡ། Libya ཏུ་ནི་ཤི་ཡ། Tunisia ན་ཡི་ཇེ་རི་ཡ། Nigeria སྦར་མ། Burma ཝེན་ནེ་ཛུ་ལ། Venezuela ཨི་རཱག་(ཁུར་དི་སི་ཐན།) Khurdistan (Iraq) ཨབ་གྷ་ནི་སི་ཐན། Afghanistan སི་རི་ཡ། Syria རྒྱ་གར། India ཀོ་ལོམ་བྷི་ཡ། Colombia ཡུ་གན་ཌ་ Uganda བཅས་ནས་གཞོན་སྐྱེས་འགོ་ཁྲིད་ ༢༦ དེ་དག་གིས་རང་རང་སོ་སོའི་མི་ཚེའི་ནང་དཀའ་ངལ་ཇི་ལྟར་མྱངས་པ་དང་། དེ་ལ་བརྟེན་ནས་སྤྱི་ཚོགས་ནང་ཞི་བདེའི་དགོས་མཁོ་ཇི་ཙམ་ཡོད་པ་ངེས་པ་རྙེད་ཚུལ་གསལ་བཤད་ཞུས་འདུག
ལྷག་པར་མི་རིགས་དང་ཆོས་ལུགས་དབྱེ་འབྱེད། ཕོ་མོ་འདྲ་མཉམ་མེད་པ། དེ་བཞིན་ཆབ་སྲིད་དང་དཔལ་འབྱོར། སྤྱི་ཚོགས་ཀྱི་དབང་ཆའི་འཐབ་རྩོད་ཁྲོད་དཀའ་སྡུག་མྱངས་པར་བརྟེན། གཞན་གྱིས་གཉའ་གནོན་དང་མནར་གཅོད། མཐོང་ཆུང་། ཁྱད་གསོད། དམའ་འབེབ་བྱས་པ་དེས་རང་ཉིད་ཀྱི་བསམ་བློའི་ནང་འཁོན་འཛིན་ཤུགས་ཆེ་སྐྱེ་རྒྱུའི་ཉེན་ཁ་ཡོད་པ་དེར་གདོང་ལེན་ཇི་ལྟར་བྱེད་དགོས་པ་དང་། དེ་བརྒྱུད་ཞི་བདེའི་ཁོར་ཡུག་ཇི་ལྟར་སྐྲུན་དགོས་པའི་ཐད་ལམ་སྟོན་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས།
མིའི་གཞི་རྩའི་ལྷན་སྐྱེས་རང་བཞིན་ནི་བྱམས་བརྩེ་ལྡན་པ་ཞིག་ཡིན་པ་ཚན་རིག་པས་བརྟག་དཔྱད་ལམ་ནས་ངེས་པ་རྙེད་ཚུལ་དང་། དད་པ་ཙམ་ལ་བརྟེན་ནས་མ་ཡིན་པར་མིའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལ་བརྟེན་ནས་བསམ་བློར་འགྱུར་བཏང་ནས་བློ་ཇེ་བཟང་དུ་གཏང་ཐུབ་པ་དང་། དེང་དུས་ཤེས་ཡོན་ལམ་ལུགས་ནང་མིའི་གཞི་རིམ་བཟང་སྤྱོད་ཀྱི་བསླབ་བྱ་དེ་དག་ངེས་པར་སློབ་ཁྲིད་བྱེད་དགོས་པ་དང་། ལྷག་པར་དམའ་རིམ་ནས་མཐོ་སློབ་བར་ལུས་པོའི་འཕྲོད་བསྟེན་ལ་དོ་སྣང་བྱས་པ་དང་དུས་མཚུངས་བསམ་བློའི་འཕྲོད་བསྟེན་ལའང་ཤུགས་རྒྱག་དགོས་པ་འི་ལམ་སྟོན་སྩལ་འདུག
བཀའ་སློབ་ལས་རིམ་དེ་ཨ་རིར་རྟེན་གཞི་བྱས་པའི་ཞི་བདེའི་བསྟི་གནས་ཁང་དང་དགའ་ལྡན་ཕོ་བྲང་ཟུང་འབྲེལ་ཐོག་ཡིན་འདུག ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་ཉིན་གཉིས་རིང་བགྲོ་གླེང་དང་དྲི་བ་དྲིས་ལན་ཞུ་སྐབས་བརྗོད་གཞི་གཙོ་བོ་བཞིའི་ཐོག་ཡིན་འདུག དང་པོ། སྤྱི་ཚོགས་ནང་ཁུལ་མི་མཐུན་པ་མཐུན་པོ་བཟོ་ཆེད་འབྲེལ་ཟམ་འཛུགས་རྒྱུ། ཞི་བདེའི་ཁོར་ཡུག་འོག་མཐུན་པོ་བཟོ་རྒྱུ། ཞི་བདེའི་སྐོར་ལ་གོ་རྟོགས་སྤེལ་རྒྱུ། ཡུལ་གྱར་སྐབས་དཀའ་ངལ་ལ་གདོང་ལེན་བྱེད་ཕྱོགས་བཅས་ཡིན་འདུག
སྐབས་དེར་ལྷོ་སུ་ཌན་ནས་ཕེབས་པའི་གཞོན་སྐྱེས་ཨ་རིག་ལགས་ཀྱིས་ཁོང་རུས་སྡེ་སྣ་མང་ཡོད་སའི་ས་ཁུལ་ཞིག་ཏུ་སྐྱེས་ཤིང་། རུས་སྡེ་ནང་ཁུལ་འཁྲུག་རྩོད་ཤོར་རྐྱེན་རང་གི་མ་རུས་སྡེ་གཞན་གྱིས་དམར་གསོད་བཏང་འདུག འོན་ཀྱང་ཕྱིས་སུ་ཁོང་གིས་ས་གནས་གཞན་དུ་སྨན་པའི་སློབ་སྦྱོང་ལེགས་ཐོན་རྗེས་སྨན་ཁང་ཞིག་བཙུགས་པ་དང་། དེར་སྨན་བཅོས་ཡོང་མཁན་ཁྲོད་རང་གི་མ་གསོད་མཁན་ཚོ་ཡང་སླེབ་བཞིན་ཡོད་པ་དེ་དག་ལ་འཁོན་འཛིན་གྱི་བསམ་པ་མེད་ཀྱང་། རང་ཉིད་ཀྱི་རུས་སྡེ་དང་མ་གསོད་མཁན་གྱི་རུས་སྡེ་གཉིས་དབར་ཞེ་འཁོན་མེད་པར་འཆམ་མཐུན་ཡོང་ཐབས་ཆེད་འབྲེལ་ཟམ་ཇི་ལྟར་འཛུགས་དགོས་པའི་ཐད་ལམ་སྟོན་ཞུས་པར་༸གོང་ས་༸སྐྱསབ་མགོན་ཆེན་པོ་མཆོག་གིས། རང་གི་མ་གསོད་མཁན་ཡིན་ཡང་དེར་བཟོད་སྒོམ་བསྟེན་རྒྱུ་ལས་གནོད་ལན་གནོད་པས་འཇལ་ཚེ་འཚེ་བ་རྒྱུན་ཆད་མེད་པ་ཡོང་རྒྱུ་དང་། གནོད་ལན་གནོད་པས་མ་འཇལ་བར་བཟོད་སྒོམ་བསྟེན་དགོས་པ་གལ་ཆེ་ཚུལ་སྐོར་བཀའ་ལན་སྩལ་འདུག
ཕྱོགས་མཚུངས་འབར་མའི་ནང་པ་དང་ཁ་ཆེའི་དབར་གྱི་རྩོད་རྙོག་འདུམ་སྒྲིག་ཇི་ལྟར་བྱེད་དགོས་པའི་སྐོར་གྱི་དྲི་བར་མགོན་པོ་མཆོག་གིས་འབར་མའི་ནང་པ་ཚོར་སྟོན་པ་བཅོམ་ལྡན་འདས་ཀྱི་ཞལ་རས་དྲན་དགོས་པ་དང་། ཁ་ཆེ་བ་ཚོ་ཐུག་སྐབས་ཁོང་ཚོའི་ཕྲག་པའི་སྟེང་སྟོན་པ་བཅོམ་ལྡན་འདས་བཞུགས་ཡོད་བསམས་པ་ཡིད་ལ་དྲན་དགོས་པ། ༸གོང་ས་༸སྐྱབས་མགོན་ཆེན་པོ་མཆོག་གིས་འབར་མའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཨང་སན་སུ་ཀི་Aung San Suu Kyi མཆོག་ལ་འབར་མའི་ནང་པ་དང་ཁ་ཆེའི་རྙོག་གྲ་འདུམ་འགྲིག་ཡོང་ཐསབ་ཆེད་འབད་བརྩོན་གནང་དགོས་པ་ཞུ་སྐབས་ལྕམ་སྐུས་གནད་དོན་དེར་འབར་མའི་དམག་མི་དང་འབྲེལ་བ་ཡོད་སྟབས་ཆབ་སྲིད་ཀྱི་གནད་དོན་ཧ་ཅང་མགོ་རྙོག་ཅན་ཞིག་ཡིན་སྐོར་ལན་ཞུས་ཚུལ་བཀའ་ལན་སྩལ།
