ཕྱི་ལོ་ ༢༠༡༩ ཟླ་ ༡༠ ཚེས་ ༢༨ རེས་གཟའ་ཟླ་བ།

༄༅། །འདི་གར་ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ྋསྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ལ་ཕྱི་ལོ་ ༢༠༡༩ ཟླ་ ༡༠ ཚེས་ ༢༧ རེས་གཟའ་ཉི་མ་ཉིན་གྱི་སྔ་དྲོ་ཆུ་ཚོད་ ༡༠ ཐོག་ལྡི་ལི་བོད་སྒར་བསམ་ཡས་གླིང་ས་གནས་འགོ་འཛིན་ལས་ཁུངས་དང་ལྡི་ལི་ན་གཞོན་སྡོད་ཁང་ཟུང་འབྲེལ་ཐོག་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། ྋསྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་ལྡི་ལི་ན་གཞོན་སྡོད་ཁང་དུ་ལྡི་ལི་ཁུལ་བཅའ་བཞུགས་བོད་མི་ཡོངས་དང་། ལྷག་པར་བོད་མི་གཞོན་སྐྱེས་རྣམས་ལ་དམིགས་བཀར་གྱིས་གཙོ་བོ་སེམས་རྒྱུད་འདུལ་ཐབས་དང་། བོད་ཀྱི་སྐད་ཡིག་གི་རིན་ཐང་དང་གལ་གནད་སྐོར། དེ་བཞིན་བོད་མི་ནང་ཁུལ་རྡོག་རྩ་གཅིག་སྒྲིལ་གྱིས་བོད་དོན་བདེན་མཐའ་གསལ་ཐབས་ལ་འབད་དགོས་པ། ལྷག་པར་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གི་བཀའ་སློབ་ལམ་སྟོན་ལ་སེམས་རྩེ་གཅིག་ཏུ་ཤར་བསྐྱོད་བྱེད་དགོས་པ་ནི། བོད་མི་མི་རེ་ངོ་རེ་ལ་འཁྲི་པའི་ལས་འགན་ཞིག་ཡིན་སྐོར་སོགས་ཀྱི་བཀའ་སློབ་སྩལ་ཡོད་པ་བཅས། །