ཕྱི་ལོ་ ༢༠༡༩ ཟླ་ ༡༠ ཚེས་ ༢༡ རེས་གཟའ་ཟླ་བ། 

༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༡༥ ཉིན་བོད་ཀྱི་ཡུན་རིང་གི་གྲོགས་པོ་སྐུ་ཞབས་རི་ཆར་ཌི་ཝེན་གྷར་ཊེན་Richard Weingarten ལགས་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་གིས་དམ་པ་ཁོང་གི་སྐུ་ཟླ་ལྕམ་སྐུ་ཁེ་རོལ་ཝེན་གྷར་ཊེན་ Carol Weingarten ལགས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན།
སྐུ་ཞབས་རི་ཆར་ཌི་ཝེན་གྷར་ཊེན་ལགས་སྐུ་གཤེགས་པ་ནི་ཁྱེད་ཚོའི་ནང་མི་ཙམ་མ་ཟད། བོད་དོན་ཐད་ནས་བཤད་ནའང་གྱོང་གུད་ཆེན་པོ་ཞིག་ཕོག་ཡོད། སེམས་སྡུག་གི་སྐབས་འདིར་ང་ཚོས་དམ་པ་ཁོང་ལ་སྨོན་ལམ་དང་ནང་མི་ཡོངས་ལ་གདུང་སེམས་མཉམ་སྐྱེ་ཞུ་རྒྱུ་ཡིན། རི་ཆར་ཌི་ཝེན་གྷར་ཊེན་Richard Weingarten ལགས་ནི་བོད་ཀྱི་ཡུན་རིང་གི་གྲོགས་པོ་ཞིག་ཡིན་ཞིང་། ཕྱི་ལོ་ ༡༩༨༠ ནང་ཁོང་བཞུགས་སྒར་རྡ་ས་དང་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་གཟིགས་སྐོར་དུ་ཕེབས་ཡོད། ཁོང་གིས་བོད་མིའི་གཞིས་ཆགས་ཁག་ཏུ་རྟོག་ཞིབ་གནང་སྟེ་བཀའ་ཤག་ལ་ཡུན་གནས་ཐུབ་པའི་ཡར་རྒྱས་ཐོག་སྙན་ཐོ་ཞིག་ཕུལ་ཡོད་པ་མ་ཟད། བོད་མིའི་སྒྲིག་འཛུགས་ཀྱི་འཆར་འགོད་ལྷན་ཁང་དང་བོད་ཀྱི་ཐེབས་རྩ་ཁང་སོགས་གསར་འཛུགས་གནང་བར་རམ་འདེགས་ཞུས་ཡོད། དེ་བཞིན་དམ་པ་ཁོང་བོད་བརྒྱུད་ནང་བསྟན་ཐོག་མཁྱེན་རྒྱ་ཡངས་པོ་ཡོད་པ་དང་སྒོམ་ཉམས་ལེན་བྱེད་མཁན་ཞིག་ཀྱང་ཡིན། དམ་པ་ཁོང་གིས་ཡུན་རིང་ཁྲིམས་ལུགས་ཀྱི་ཞབས་ཞུ་གཟེངས་སུ་ཐོན་པ་བསྒྲུབས་མྱོང་ཡོད་པ་མ་ཟད། རྒྱལ་སྤྱིའི་ཁེ་ལས་བཟོ་ཚོང་ཁང་ཁག་གཅིག་ལ་རང་དབང་གི་སྒོ་ནས་དཔལ་འབྱོར་སློབ་སྟོན་པ་གནང་བ་དང་ནོར་ཝེའི་མཉམ་འབྲེལ་དཔལ་འབྱོར་ཞབས་ཞུ་ཁང་ཞིག་གི་ངེས་སྟོན་པ་ཡང་གནང་མྱོང་ཡོད། ཅེས་འཁོད་ཡོད། །