ཕྱི་ལོ་ ༢༠༡༩ ཟླ་ ༡༠ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༤ ཉིན་སུད་སིའི་ནང་གནས་སྡོད་བོད་ཀྱི་ཟློས་གར་ཚོགས་པའི་ལས་བྱེད་ཟུར་པ་ཁག་གཅིག་གིས་ཧིན་སྒོར་ ༢༡༧༦༢༡༠ བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་ཟློས་གར་ཚོགས་པའི་ངེས་སྟོན་པ་ངག་དབང་ཡོན་ཏན་ལགས་ཀྱི་ལག་ཏུ་ཞལ་འདེབས་སུ་ཕུལ་ཡོད། དེ་ཡང་འདི་ལོ་བོད་ཀྱི་ཟློས་གར་ཚོགས་པ་བཙུགས་ནས་མི་ལོ་ ༦༠ ཧྲིལ་པོ་འཁོར་བའི་དུས་དྲན་སྲུང་བརྩི་ཞུ་རྒྱུའི་སླད་དུ། སུད་སིའི་བོད་ཀྱི་ཟློས་གར་ལས་བྱེད་ཟུར་པའི་ཚོགས་པའི་ཚོགས་མི་གྲངས་ ༢༦ རྣམས་ཀྱིས་སུད་སིའི་སྒོར་ ༥༠༠ ཐམ་པ་ཞལ་འདེབས་དང་སུད་སིའི་བོད་རིགས་ཚོགས་པ་ཁག་གིས་ཞལ་འདེབས་ཕུལ་བ་བཅས་ཁྱོན་བསྡོམས་སུད་སིའི་སྒོར་ ༣༠༠༡༦.༧༠ བསྡུ་རུབ་གནང་ཡོད། སུད་སིའི་བོད་ཀྱི་ཟློས་གར་ལས་བྱེད་ཟུར་པའི་ཚོགས་པའི་འབྲེལ་མཐུད་པ་ཚེ་རིང་སྟོབས་ལྡན་ལགས་ཀྱིས་གསུང་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་ཀྱི་ཟློས་གར་ཚོགས་པ་བཙན་བྱོལ་དུ་བཙུགས་གནང་བ་ཞིག་ཡིན་ཞིང་། འདས་པའི་ལོ་ངོ་ ༦༠ རིང་བོད་ཀྱི་ཟློས་གར་ཚོགས་པའི་ངོས་ནས་བོད་ཀྱི་ཐུན་མོང་མ་ཡིན་པའི་གཞས་ཞབས་བྲོ་དང་རིག་གཞུང་སོགས་མི་ཉམས་རྒྱུན་འཛིན་དང་ཉམས་པ་སླར་གསོ་གནང་གི་ཡོད་སྟབས། ང་ཚོའི་ངོས་ནས་ཚོགས་པ་འདིར་རྒྱབ་སྐྱོར་བྱེད་དགོས་པ་ཞིག་རེད། ཅེས་དང་། བོད་ཀྱི་ཟློས་གར་ཚོགས་པ་ནི་ང་ཚོའི་ཁྱིམ་ཚང་ལྟ་བུ་ཡིན། ང་ཚོས་བོད་ཀྱི་ཟློས་གར་ཚོགས་པར་ཐུགས་རྗེ་ཆེ་ཞུའི་མཚོན་དོན་དུ་ཞལ་འདེབས་ཕུལ་བ་ཞིག་ཡིན། ཞེས་གསུངས། བོད་ཀྱི་ཟློས་གར་ཚོགས་པའི་ངེས་སྟོན་པ་ངག་དབང་ཡོན་ཏན་ལགས་ཀྱིས།
བོད་ཀྱི་ཟློས་གར་ཚོགས་པའི་ངོས་ནས་གཏོང་ཕོད་ཅན་གྱི་སུད་སིའི་བོད་ཀྱི་ཟློས་གར་ལས་བྱེད་ཟུར་པའི་ཚོགས་པའི་ཚོགས་མི་རྣམས་ནས་ཞལ་འདེབས་གནང་བར་ཐུགས་རྗེ་ཆེ་ཞུས་པ་དང་སྦྲགས། མ་འོངས་པར་མུ་མཐུད་སུད་སིའི་ནང་གནས་སྡོད་བོད་ཀྱི་ཟློས་གར་ཚོགས་པའི་ལས་བྱེད་ཟུར་པ་རྣམས་ལ་འབྲེལ་ལམ་ཤུགས་ཆེ་རུ་གཏང་ངེས་ཡིན། ཞེས་གསུངས། །
