ཕྱི་ལོ་ ༢༠༡༩ ཟླ་ ༡༠ ཚེས་ ༢༥ རེས་གཟའ་པ་སངས། 

༄༅། ། འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༠ ཚེས་ ༢༥ ཉིན་གྱི་སྔ་དྲོ་ཆུ་ཚོད་ ༡༠།༣༠ ཙམ་ལ་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་ཚོགས་གཞོན་ལས་ཁུངས་སུ་ཨེ་ཤི་ཡ་ ༢༡ Asia 21 ཞེས་པའི་ཚོགས་པའི་ཚོགས་མི་མཱ་ལེ་ཤི་ཡ་རྒྱལ་ཁབ་ནས་ཡིན་པའི་སྐུ་ཞབས་ཨ་མེདྷ་ཛཱ་ཀི་བྷིན་ཨན་ཝར་ Mr. Ahmad Zakii Bin Anwar ལགས་དང་། ཁོང་གི་བཟའ་ཟླ་ལྕམ་སྐུ་སུར་ཡ་ནི་སེན་ཇ་བྷིན་ཊི་ཨ་ལེ་ས་ Mrs. Suryani Senja Binti Alias ལགས། ཨབ་གྷ་ནི་སི་ཐན་རྒྱལ་ཁབ་ནས་ཡིན་པའི་སྐུ་ཞབས་ན་དྷིར་ན་དྷི་རི་ H.E Chairman Mr.Nader Nadery ལགས་བཅས་གསུམ་དང་མཇལ་འཕྲད་གནང་སོང་།

སྐབས་དེར་དཔལ་ལྡན་ཚོགས་གཞོན་མཆོག་གིས་བོད་ནང་གི་ད་ལྟའི་ཛ་དྲག་གནས་སྟངས་དང་། བཙན་བྱོལ་བོད་མིའི་སྒྲིག་འཛུགས་སྐོར། བོད་མིའི་སྒྲིག་འཛུགས་ཀྱི་དཔལ་འབྱོར་ཡོང་ཁུངས་ཁག་རེ་རེ་བཞིན་ངོ་སྤྲོད་གནང་། ཕྱི་ལོ་ ༢༠༠༩ ནས་ད་བར་བོད་ནང་གི་བོད་མི་རྒན་གཞོན་སེར་སྐྱ་དབྱེར་མེད་གྲངས་ ༡༥༣ གྱིས་བོད་ཀྱི་རྩ་དོན་ཆེད་རང་ལུས་མེར་བསྲེགས་ཕུལ་བའི་སྐོར། སྤྱི་འཐུས་སྐབས་སོ་སོར་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆར་འགྱུར་བ་གང་བྱུང་བ་དང་ད་ལྟའི་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ། སྲིད་སྐྱོང་དང་སྤྱི་འཐུས་ཀྱི་འོས་བསྡུ་གནང་ཕྱོགས་དང་འབྲེལ། ཉེ་ཆར་འོས་བསྡུའི་སྒྲིག་གཞི་འགྱུར་བ་ཕྱིན་པ་ཁག་ངོ་སྤྲོད་སྙིང་བསྡུས། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་ཀྱི་སྐོར་སོགས་ཀྱི་ཐོག་གསུངས་པ་དང་། དེ་བཞིན་ཁོང་རྣམ་པས་བོད་ནང་ཡོད་པའི་བོད་མི་རྣམས་ཕྱིའི་རྒྱལ་ཁབ་ཁག་ལ་འགྲོ་ཐུབ་མིན་དང་། བཙན་བྱོལ་ནང་ཡོད་པའི་བོད་མི་རྣམས་ནས་བོད་ལ་ཡོད་པའི་བོད་རིགས་སྤུན་ཟླ་རྣམ་པར་སྤྱི་ཚོགས་དྲ་རྒྱ་དང་། ཁ་པར་སོགས་བརྒྱུད་འབྲེལ་བ་བྱེད་ཐུབ་མིན། བཙན་བྱོལ་བོད་མིའི་སློབ་ཕྲུག་རྣམས་ཕྱི་རྒྱལ་ཡུལ་གྲུ་ཁག་ནང་སློབ་སྦྱོང་གི་གོ་སྐབས་ཐོབ་ཀྱི་ཡོད་མེད། ལོ་འཁོར་གཅིག་ནང་གྲོས་ཚོགས་ཐེངས་ག་ཚོད་འཚོགས་ཀྱི་ཡོད་མེད་སོགས་ཀྱི་དྲི་བ་གནང་བར། དཔལ་ལྡན་ཚོགས་གཞོན་མཆོག་གིས་ལན་འདེབས་གསལ་བཤད་གནང་ཡོད་པ་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ནས་པར་བསྐྲུན་ཞུས་པའི་ཡིག་ཆ་ཁག་ཅིག་ཕུལ་རྗེས། བོད་ཀྱི་དངོས་ཡོད་གནས་ཚུལ་ཤེས་པའི་ཐོག་ནས་བོད་དོན་ཐོག་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས་གནང་ཡོད་པ་དང་། དེ་ནས་དཔལ་ལྡན་ཚོགས་གཞོན་མཆོག་དང་ལྷན་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་དུ་ཕེབས་གནང་ཡོད་པ་བཅས། །