ཕྱི་ལོ་ ༢༠༡༩ ཟླ་ ༡༠ ཚེས་ ༢༢ རེས་གཟའ་མིག་དམར།
༄༅། །འདི་གར་དཔལ་འབྱོར་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༠ ཚེས་ ༢༡ ཉིན་སུ་ཇ་བོད་ཁྱིམ་སློབ་གྲྭའི་ཁང་ཚན་ནང་ཁུལ་དབར་ལོ་འཁོར་རྩེད་འགྲན་ཐེངས་ ༢༤ ཐོག་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་སྐུ་མགྲོན་གཙོ་བོར་ཕེབས་ནས་གསུང་བཤད་གནང་འདུག སྔ་དྲོ་ཆུ་ཚོད་ ༩ ཐོག་རྩེད་འགྲན་དབུ་འབྱེད་ཀྱིས་ཐོག་མར་སློབ་གྲྭའི་རྔ་རོལ་རུ་ཁག་གི་སྔོན་བསུས་ཏེ་ཁང་ཚན་བཞིིའི་རུ་སྒྲིག་དང་བཅས། སྐུ་མགྲོན་གཙོ་བོ་མཆོག་ནས་རུ་སྒྲིག་གིས་གུས་འདུད་བཞེས་པ་དང་བསྟུན། འཕགས་བོད་གཉིས་ཀྱི་རྒྱལ་གླུ་འབུལ་མཚམས་བོད་བསྟན་སྲིད་ཀྱི་ཆེད་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ཀྱི་ཆེད་ངག་བཅད་སྐར་མ་གཅིག་རིང་རྗེས་དྲན་མྱ་ངན་གུས་འདུད་ཞུས་འདུག
དེ་ནས་སློབ་གྲྭའི་དབུ་འཛིན་རྣམ་སྒྲོལ་བཀྲ་ཤིས་ལགས་ཀྱིས་སློབ་གྲྭའི་ངོ་སྤྲོད་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་ཐུགས་རྗེའི་བཀའ་དྲིན་བསྐྱངས་པ་དེ་དག་ཡང་ཡང་ཡིད་ལ་དྲན་སྐུལ་གཏོང་དགོས་སྐོར་སོགས་གསུངས། དེ་རྗེས་སྐུ་མགྲོན་གཙོ་བོ་མཆོག་ནས་སློབ་མ་ཚང་མས་ཤེས་ཡོན་དང་མིའི་གཞི་རྩའི་བཟང་སྤྱོད་གོང་མཐོར་གཏོང་རྒྱུའི་ཐད་ཤུགས་སྣོན་རྒྱག་དགོས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་གང་ཉིད་མཆོག་གི་བཀའ་དགོངས་གཞིར་བཟུང་སྤྱི་ཚོགས་ལ་ཞབས་འདེགས་ཞུ་མཁན་བོད་མི་ཚད་ལྡན་ཞིག་ཡོང་བ་བྱ་རྒྱུར་འབད་དགོས་པ། རྩེད་འགྲན་གྱི་འབོད་ཚིག་ནང་ཁོར་ཡུག་སྲུང་སྐྱོབ་བྱ་རྒྱུ་ནི་འགྲོ་བ་མིའི་སྲོག་རྩ་ལྟ་བུ་ཡིན་སྐོར་འཁོད་ཡོད་སྟབས། དགེ་ལས་སློབ་ཕྲུག་དང་མང་ཚོགས་ཡོངས་ནས་ཁོར་ཡུག་སྲུང་སྐྱོབ་ཐད་ཐུགས་སྣང་ངེས་པར་གནང་དགོས་གལ། ཁོར་ཡུག་སྲུང་སྐྱོབ་བྱ་རྒྱུའི་གནད་དོན་དེ་ཕྱོགས་གཅིག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ཡིན་ཞིང་། ལྷག་པར་བོད་མི་བཙན་བྱོལ་བའི་གནས་ཚང་ལྟེ་བ་རྒྱ་གར་གཞུང་གི་འབོད་ཚིག་ཀྱང་ཆགས་ཡོད། རྩེད་འགྲན་སྐབས་རྒྱལ་ཕམ་ཙམ་མིན་པར་དེ་བརྒྱུད་སློབ་ཕྲུག་རང་ཉིད་སྒེར་གྱི་མི་ཚེའི་ནང་འཕྲོད་བསྟེན་ལ་དོ་སྣང་དང་། མཉམ་རུབ་ཀྱི་འགན་ཁུར། འགོ་ཁྲིད་ཀྱི་ནུས་པ་སྐྱེད་སྲིང་དང་འབྲེལ་བ་ཆགས་ཡོད་པ་སོགས་གསུངས།
ཕྱོགས་མཚུངས་བཀའ་བློན་མཆོག་གིས་གསུང་དོན། ༸སྐུའི་གཅུང་མོ་གངས་ཅན་བོད་ཀྱི་ཨ་མ་བཀའ་ཟུར་རྗེ་བཙུན་པདྨ་མཆོག་གིས་སྣེ་ཁྲིད་པའི་བོད་ཁྱིམ་སྒྲིག་འཛུགས་ནས་བོད་མིའི་ཤེས་ཡོན་ཐོག་ད་བར་སྐུ་ལས་ཇི་ལྟར་བསྐྱོན་དང་སྐྱོན་བཞིན་པ་དང་། ལྷག་པར་སུ་ཇ་བོད་ཁྱིམ་ནས་ཐོན་པའི་སློབ་མ་མང་པོ་ཞིག་གིས་དེང་སྐབས་བོད་མིའི་སྒྲིག་འཛུགས་ཀྱིས་མཚོན་སྤྱི་ཚོགས་འདྲ་མིན་ནང་སྤྱི་པའི་ལས་འགན་བཞེས་ནས་ཕྱག་ལས་གནང་བཞིན་པར་བསྔགས་བརྗོད་གནང་བ་དང་སྦྲགས། ད་ལྟ་སློབ་གཉེར་གནང་བཞིན་པའི་སློབ་མ་ཚོས་ཀྱང་མ་འོངས་པར་སློབ་སྦྱོང་མཐར་ཕྱིན་པའི་རྗེས་སུ་དེ་མཚུངས་སྤྱི་དོན་ཐོག་ཤུགས་རྒྱག་དགོས་པའི་ལམ་སྟོན་གནང་འདུག དེ་རྗེས་སློབ་གྲྭའི་སློབ་སྤྱི་ཀརྨ་ཤེས་རབ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་ནས་སློབ་གྲྭའི་ལོ་འཁོར་རྩེད་འགྲན་ཐེངས་ ༢༤ དེ་བཞིན་རྒྱལ་ཁའི་ངང་མཇུག་སྒྲིལ་བྱུང་བའི་གསལ་བསྒྲགས་གནང་སྟེ་སློབ་གྲྭའི་རྩེད་མོའི་འགྲན་བསྡུར་མཇུག་སྒྲིལ་འདུག
དེ་ཉིན་ཕྱི་དྲོ་སྐུ་མགྲོན་གཙོ་བོ་མཆོག་ནས་བྱ་དགའ་ཐོབ་མཁན་སློབ་མ་རྩེ་ཕུད་དང་ཁང་ཚན་སོ་སོར་བྱ་དགའ་གནང་། རྩེད་འགྲན་ཐོག་ཉེ་འཁོར་སློབ་གྲྭ་ཁག་གཅིག་ནས་ཀྱང་མཉམ་ཞུགས་ཀྱང་གནང་འདུག དེ་ཡང་ཐེངས་འདིར་སློབ་གྲྭའི་ཁང་ཚན་བཞིའི་སློབ་ཕྲུག་ཆེ་འབྲིང་ཆུང་གསུམ་ཙམ་མ་ཟད། སློབ་མ་ཆེས་ཐ་ཆུང་བཞིའི་དབར་རྒྱུག་མཆོང་སོགས་ཀྱི་རྩེད་འགྲན་གནང་འདུག
རྩེད་འགྲན་སྐབས་ཁྲི་རལ་ཁང་ཚན་ལ་ཨང་ཐོབ་ ༢༦༢ དང་། གཉའ་ཁྲི་ཁང་ཚན་ལ་ཨང་ ༢༠༦ ཁྲི་སྲོང་ཁང་ཚན་ལ་ཨནང་ ༢༠༩ སྲོང་བཙན་ཁང་ཚན་ལ་ཨང་ ༣༣༩ ཐོབ་འདུག མཐའ་མའི་རྒྱལ་ཁ་དེ་སྲོང་བཙན་ཁང་ཚན་ལ་ཐོབ་འདུག ཐེངས་འདིའི་རྩེད་འགྲན་ཐོག་ཉེ་འཁོར་གཞིས་ཆགས་གསུམ་གྱི་ས་གནས་འགོ་འཛིན་དང་སྐུ་ཚབ། ས་གནས་འཐུས་ཚོགས་ཀྱི་ཚོགས་གཙོ། སློབ་གྲྭ་ཁག་གི་དབུ་འཛིན་དང་བོད་ཁྱིམ་གྱི་ལས་ཟུར་པ་ཁག་གཅིག གཞན་ཡང་མང་ཚོགས་བརྒྱ་ཕྲག་བརྒལ་བར་ཕེབས་ཡོད་པ་བཅས། །
