ཕྱི་ལོ་ ༢༠༡༩ ཟླ་ ༡༠ ཚེས་ ༢༡ རེས་གཟའ་ཟླ་བ།

༄༅། །འདི་གར་ཆོས་རིག་ལས་ཁུངས་ནས་ཕྱི་ལོ་ ༢༠༡༩ ཟླ་ ༡༠ ཚེས་ ༢༡ ཉིིན་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཕྱི་ལོ་ ༢༠༡༩ ཟླ་ ༡༠ ཚེས་ ༡༨ དང་ ༡༩ ལ་རྒྱུད་སྨད་གངས་ཅན་རིག་གནས་སློབ་གྲྭར་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐེངས་དྲུག་པ་འཚོགས་བཞིན་པར་གཞུང་འབྲེལ་འཚམས་གཟིགས་ཀྱིས་གསུང་བཤད་གནང་ཡོད།

དེ་ཡང་ཕྱི་ཚེས་ ༡༨ ཉིན་གྱི་ཉིན་རྒྱབ་བཀའ་བློན་མཆོག་སྦེང་ལོར་ནས་དཔལ་ལྡན་སྨད་རྒྱུད་གྲྭ་ཚང་དུ་ཕེབས་འབྱོར་སྐབས་ས་གནས་གཞིས་འགོ་དང་གྲྭ་ཚང་མཁན་བླ་རྣམ་གཉིས། འབྲེལ་ཡོད་ལས་སྣེ་བཅས་ནས་ཕེབས་བསུའི་སྣེ་ལེན་ཞུས་ཡོད། དེ་རྗེས་བཀའ་བློན་མཆོག་གིས་གྲྭ་ཚང་གི་གཙུག་ལག་ཁང་དུ་གནས་གཟིགས་གནང་གྲུབ་མཚམས་གངས་ཅན་རིག་གནས་སློབ་གྲྭར་ཆེད་ཕེབས་ཀྱིས་སློབ་ཕྲུག་ཚོའི་དགོང་དྲོའི་རིགས་ལམ་རྩོད་པ་ལ་རྟོག་ཞིབ་གནང་།

ཕྱི་ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བཀའ་བློན་མཆོག་གིས། ས་གནས་གཞིས་འགོ་དང་། གྲྭ་ཚང་མཁན་བླ་རྣམ་གཉིས། ཕྱག་མཛོད། སློབ་སྤྱི་དགེ་ལས་སློབ་ཕྲུག་བཅས་ལ་ནང་པ་སངས་རྒྱས་པའི་བསྟན་པའི་ཁྱད་ཆོས་དང་འཛིན་སྐྱོང་གི་སྐོར་གསུང་བཤད་ཟབ་རྒྱས་གནང་བ་དང་འབྲེལ་སློབ་ཕྲུག་གི་དྲི་བར་ལན་འདེབས་གནང་། 

ཕྱོགས་མཚུངས་གྲྭ་ཚང་གི་མཁན་བླ་རྣམ་གཉིས་ནས་ཀྱང་སློབ་ཕྲུག་ཚོར་བཀའ་སློབ་གནང་ཡོད།   ཉིན་རྒྱབ་བཀའ་བློན་མཆོག་སེར་བྱེས་སློབ་གྲྭར་ཕེབས་ཐོན་གནང་ཡོད་པ་བཅས། །