ཕྱི་ལོ་ ༢༠༡༩ ཟླ་ ༡༠ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༢༨ ཉིན་བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་ཟློས་གར་ཚོགས་པའི་ཚོགས་ཁང་གསར་པའི་ནང་རྒྱལ་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་དབུ་འབྱེད་ཀྱི་མཛད་སྒོ་ཚོགས་སོང་། དབུ་འབྱེད་མཛད་སྒོའི་སྟེང་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་ Sam Brownback མཆོག་དང་འབྲེལ་ཡོད་ཨ་རིའི་སྐུ་མགྲོན་ལས་བྱེད་ལྔ། དེ་བཞིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ། ཟློས་གར་ཚོགས་པའི་འགན་འཛིན་དང་དགེ་ལས་སློབ་ཕྲུག་རྣམ་པ། ཟློས་གར་ལས་བྱེད་ཟུར་པ་རྣམ་པ། རྡ་ས་ས་གནས་འགོ་འཛིན། བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐོག་ཆེད་དུ་ཕེབས་པའི་མཉམ་ཞུགས་པ་རྣམ་པ། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱིས་གཙོས་ལས་བྱེད་རྣམ་པ་སོགས་ཕེབས་འདུག
དེ་ཡང་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་གྱི་དབུ་འབྱེད་མཛད་སྒོའི་ཐོག་མར་བོད་ཀྱི་ཟློས་གར་ཚོགས་པའི་འགན་འཛིན་ངག་དབང་ཡོན་ཏན་ལགས་ཀྱིས་ཕེབས་བསུའི་གསུང་བཤད་གནང་གྲུབ་མཚམས། དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན།
ཐོག་མར་བོད་མིའི་སྒྲིག་འཛུགས་ཀྱི་བཀའ་ཤག་གི་ཚབ་ཞུས་ཏེ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་མཆོག་གིས་དབུས་འབྲེལ་ཡོད་ཨ་རིའི་སྐུ་མགྲོན་རྣམ་པ། ཟློས་གར་ལས་བྱེད་ཟུར་པ་རྣམ་པ། དེ་བཞིན་སྐུ་མགྲོན་རྣམ་པ་ཚར་མར་སྙིང་ཐག་པ་ནས་ཕེབས་བསུ་ཞུ་རྒྱུ་ཡིན། ལྷག་པར་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་མཆོག་ཆེད་དུ་དེ་རིང་གི་མཛད་སྒོར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། སྐུ་ཞབས་སམ་བྷི་རོན་བྷེ་གི་མཆོག་གིས་ཞུམ་པ་མེད་པའི་སྒོ་ནས་བོད་མིའི་ཆོས་དད་རང་དབང་དང་རྒྱལ་སྤྱིའི་ཆོས་དད་རང་དབང་ཐོག་རྒྱབ་སྐྱོར་གྱིས་གསུང་བཤད་གནང་བར་ཐུགས་རྗེ་ཆེ་ཞུ་རྒྱུ་ཡིན། ངས་ཨ་རི་གཞུང་གིས་རྒྱ་གར་དང་བལ་ཡུལ་ནང་གི་བཙན་བྱོལ་བོད་མི་རྣམས་ལ་དཔལ་འབྱོར་གྱི་རོགས་རམ་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། ཨ་རིའི་སྲིད་འཛིན་གཞོན་པ་མ་ཡི་ཀི་པན་སི་ Mike Pence མཆོག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་ཤུགས་ཆེ་གནང་ཡོད།
ཨ་རིའི་ཕྱི་སྲིད་དྲུང་ཆེ་མ་ཡི་ཀི་པོམ་པེའོ་ Mike Pompeo ལགས་ཀྱིས་བོད་ཀྱི་གནད་དོན་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་སྐོར་གླེང་སློང་གནང་ཡོད། ཨ་རི་གཞུང་གིས་ལོ་མང་རིང་རྒྱ་ནག་ནང་གི་འགྲོ་བ་མིའི་ཐོབ་ཐང་དང་། ལྷག་པར་བོད་མིའི་འགྲོ་བ་མིའི་ཐོབ་ཐང་གི་གནད་དོན་སྐོར་རྒྱབ་སྐྱོར་གནང་བར་སླར་ཡང་ཐུགས་རྗེ་ཆེ་ཞུ། བོད་ཀྱི་ཟློས་གར་ཚོགས་པ་དང་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གཉིས་མཉམ་འབྲེལ་ཐོག་སྤྱིའི་བོད་ཀྱི་ཟློས་གར་སྒྱུ་རྩལ་ཞིབ་འཇུག་བགྲོ་གླེང་ཚོགས་ཆེན་ཐེངས་དང་པོ་འཚོགས་བཞིན་ཡོད། ཐེངས་འདིའི་བགྲོ་གླེང་ཐོག་རྒྱལ་སྤྱིའི་ཁྱད་མཁས་མི་སྣ་ ༡༨ དང་། བོད་མིའི་ཁྱད་མཁས་མི་སྣ་ ༦ བཅས་ནས་དབུ་འབྱེད་མཛད་སྒོ་གྲོལ་རྗེས་ཉིན་གསུམ་རིང་གཏམ་བཤད་གནང་གི་རེད།
བོད་ཀྱི་རིག་གཞུང་ཕྱུག་པོ་ཡོད་པའི་སྐོར་མཁྱེན་འདོད་ཡོད་མཁན་ཚོར་དམིགས་ཏེ་ཁྱད་མཁས་མི་སྣ་ཚོས་གཏམ་བཤད་གནང་བ་དེ་དག་དེབ་གཅིག་ཕྱོགས་སྒྲིག་བྱ་རྒྱུ་ཡིན། ཞེས་སོགས་ཀྱི་གསུང་བཤད་གནང་། དེ་རྗེས་སྐུ་མགྲོན་གཙོ་བོ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་མཆོག་གིས་གསུང་བཤད་གནང་དོན། ཁྱེད་རང་ཚོ་དང་མཉམ་དུ་ཐུག་འཕྲད་བྱུང་བར་དགའ་པོ་བྱུང་། ངས་འདི་ནས་རང་དབང་གི་སྐོར་བཤད་རྒྱུ་ཡིན། དེ་རིང་སྔ་དྲོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུ་རྒྱུའི་བསྐལ་བ་བཟང་པོ་བྱུང་། སྐབས་དེར་ང་ཚོ་གཉིས་ནས་བྱམས་པ་དང་། སྙིང་རྗེ། དྲང་བདེན། བཟོད་སེམས། ཞི་བདེ་བཅས་ཀྱི་སྐོར་གླེང་སློང་བྱུང་། ཨ་རི་གཞུང་གིས་དུས་རྟག་ཏུ་འཛམ་གླིང་ཕྱོགས་གང་སར་གནས་པའི་འགྲོ་བ་མིའི་ཆོས་དད་རང་དབང་སྲུང་སྐྱོབ་གནང་གི་ཡོད། ང་ཚོའི་ངོས་ནས་བོད་ཀྱི་ཆོས་དང་རིག་གཞུང་། སྐད་ཡིག་ལ་ཧ་ཅང་བརྩི་བཀུར་ཞུ་བཞིན་ཡོད། བོད་ཀྱི་རིག་གཞུང་ནི་འགྲོ་བ་མི་ཡོངས་ཀྱི་གཅེས་ནོར་རེད།
ཨ་རི་དང་བོད་མིའི་དབར་ལོ་རེ་བཞིན་འབྲེལ་བ་ཤུགས་ཆེ་རུ་འགྲོ་བཞིན་ཡོད། ཐ་ན་དེ་རིང་སྔ་དྲོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པའི་སྐབས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཨ་རིའི་སྲིད་འཛིན་ཟུར་པ་རོ་སེ་ཝེ་ལི་ཊི་ Franklin Roosevelt མཆོག་གིས་མགོན་པོ་གང་ཉིད་མཆོག་ལ་ཆུ་ཚོད་ཅིག་ལེགས་སྐྱེས་སུ་གནང་བའི་ལོ་རྒྱུས་སྐོར་གསུངས་བྱུང་། ང་ཚོ་བོད་མི་ཚོ་དང་མཉམ་དུ་ལངས་ཡོད། ཕྱི་ཟླ་ ༡༠ ནང་དམིགས་བསལ་ཚོགས་ཆེན་ཐེངས་གསུམ་པ་ཚོགས་པའི་སྐབས་ཡང་སྲིད་ཀྱི་ལམ་ལུགས་ནི། བོད་ཀྱི་ཐུན་མོང་མིན་པའི་ལམ་ལུགས་ཤིག་ཡིན་སྟབས། བོད་བརྒྱུད་ནང་བསྟན་གྱི་འགྲོ་སྟངས་ལྟར་བྱེད་དགོས་ཀྱི་ཡོད་པར་བརྟེན་རྒྱ་ནག་གཞུང་ནས་དེའི་ཐོག་ཐེ་བྱུས་བྱེད་མི་ཆོག་ཅེས་པའི་གྲོས་ཆོད་ལ་ཨ་རི་གཞུང་གིས་རྒྱབ་སྐྱོབ་སྐྱོར་གནང་གི་ཡོད། ཅེས་གསལ་པོར་ཞུ་རྒྱུ་ཡིན། ང་ཚོའི་ངོས་ནས་གཞན་གྱི་ཐེ་བྱུས་མེད་པར་བོད་མི་ཚོས་རང་དབང་གི་སྒོ་ནས་བླ་སྤྲུལ་ངོས་འཛིན་གནང་རྒྱུར་རྒྱབ་སྐྱོར་ཡོད། ཅེས་སོགས་ཀྱི་གསུང་བཤད་གནང་།
མཐར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཨརྱ་ཚེ་དབང་རྒྱལ་པོ་ལགས་ཀྱིས་ཐུགས་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །
