ཕྱི་ལོ་ ༢༠༡༩ ཟླ་ ༩ ཚེས་ ༢༤ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༩ ཚེས་ ༢༡ རེས་གཟའ་སྤེན་པ་ཉིན་ཨ་རིའི་ནིའུ་ཡོག་གྲོང་སྟོད་དུ་ཆགས་པའི་རོ་ཆ་སི་ཊར་གཙུག་ལག་སློབ་ཁང་དུ་བོད་རྒྱའི་སློབ་ཕྲུག་མཛའ་འབྲེལ་ཚོགས་པ་ཤིག་གསར་འཛུགས་གནང་ཡོད།
དེ་ཡང་ University of Rochester College Republicans ཞེས་པའི་གོ་སྒྲིག་འོག་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་རྣམ་གཉིས་ ༼བོད་ཀྱི་བགྲོ་གླེང་། བཙན་བྱོལ་བོད་མིའི་མང་གཙོའི་འཕེལ་རིམ།༽ ཞེས་པའི་བགྲོ་གླེང་ལས་རིམ་ཐོག་མཉམ་ཞུགས་གནང་ཡོད། ལས་རིམ་དེའི་ཐོག་གཙུག་ལག་སློབ་ཁང་གི་སློབ་ཕྲུག་ཙམ་མ་ཟད། མཐོ་སློབ་ཀྱི་གཙོ་འཛིན་དང་། དགེ་རྒན་སློབ་དཔོན་ཁག་གཅིག་ཀྱང་ཕེབས་ཞུགས་གནང་འདུག ལྷག་པར་རྒྱ་རིགས་སློབ་ཕྲུག་མི་ཉུང་བ་ཞིག་ཀྱང་མཉམ་ཞུགས་བྱས་པ་ཙམ་མིན་པར་དྲི་བ་དྲིས་ལན་ནང་དུའང་ཆ་ཤས་བླངས་འདུག ལས་རིམ་དེ་གཙོ་སྐྱོང་གནང་མཁན་ཨ་རི་བ་ཀོ་རི་ཡ་མི་རིགས་ཡིན་པ་སློབ་མ་ Se Hoon Kim  ལགས་ཀྱིས་གནང་འདུག

སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་ཀྱི་ལོ་རྒྱུས་དང་། ཕྱི་ལོ་ ༡༩༥༩ ལོར་བོད་མི་ཚོ་བཙན་བྱོལ་དུ་གྱར་དགོས་བྱུང་བའི་གནས་སྟངས། དེ་བཞིན་བཙན་བྱོལ་བོད་མིའི་མང་གཙོའི་འཕེལ་རིམ་དང་། དབུ་མའི་ལམ་གྱི་སྲིད་བྱུས་བཅས་ཀྱི་སྐོར་ངོ་སྤྲོད་སྙིང་བསྡུས་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་བཙན་བྱོལ་བོད་མིའི་གནས་སྟངས་གང་ལེགས་དང་། བོད་མིའི་ཆོས་དང་རིག་གཞུང་། སྐད་ཡིག ངོ་བོ་དང་བཅས་པ་མི་ཉམས་གོང་འཕེལ་བྱུང་ཡོད་པ་ངོ་སྤྲོད་གནང་འདུག

སྐབས་དེར་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ཀྱང་བོད་རྒྱ་གྲོས་མོལ་སྐོར་དང་།  རྒྱ་རིགས་འབྲེལ་མཐུད་པའི་ལས་འགན་དང་འབྲེལ་ནས་གདོང་ལེན་བྱེད་དགོས་པའི་གནད་དོན་རིགས་ངོ་སྤྲོད་གནང་འདུག ཚོགས་ཐོག་ཏུ་གཙུག་ལག་སློབ་ཁང་དེའི་སློབ་མ་བོད་ཕྲུག་བཞི་ཡོད་པ་ཆ་ཚང་མཉམ་ཞུགས་གནང་བ་དང་། ཚོགས་འདུའི་ཐོག་རྒྱ་ནག་སྐམ་སའི་སློབ་ཕྲུག་ཁག་གཅིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་སོགས་ལ་སྐྱོན་བརྗོད་བྱས་ཡོད་ཀྱང་།

བོད་མི་གཏམ་བཤད་གནང་མཁན་གཉིས་ནས་བོད་ཀྱི་དངོས་ཡོད་གནད་དོན་ཁག་གསལ་བཤད་དང་། བོད་ནང་ས་བྱི་ཞི་རྒོལ་སྐབས་འཚེ་བའི་བྱ་སྤྱོད་སྤེལ་མཁན་དེ་དག་ནི་གྲྭ་ཆས་དང་བོད་ཀྱི་ཆས་གྱོས་གྱོན་པའི་རྒྱ་རིགས་ཡིན་སྐོར་གསལ་བཤད་དང་། ཕན་ཚུན་དྲི་བ་དྲིས་ལན་ཡང་ལྷུག་པོ་བྱུང་ཡོད་པ་བཅས་ལ་བརྟེན་ནས། རྒྱ་རིགས་སློབ་ཕྲུག་མང་པོར་བོད་དོན་སྐོར་གོ་རྟོགས་རྒྱ་མི་ཆུང་བ་བྱུང་ཡོད།  ཚོགས་འདུའི་མཇུག་ཏུ་གཙུག་ལག་སློབ་ཁང་དེར་བོད་རྒྱའི་སློབ་ཕྲུག་མཐུན་ཚོགས་ཤིག་གསར་འཛུགས་དང་སྦྲགས། འབྱུང་འགྱུར་ཤེས་བྱ་དང་ཉམས་མྱོང་བརྗེ་རེས་ཀྱི་ལས་རིམ་སྤེལ་གནང་རྒྱུ་ཡིན་འདུག

གཞན་ཡང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་པདྨ་དཀར་པོ་སྒོམ་གྲུབ་བསྟི་གནས་ཁང་དུ་འཚམས་གཟིགས་གནང་ཡོད་པ་དང་། སྐབས་དེར་མཁན་པོ་དཀོན་མཆོག་སྨོན་ལམ་ལགས་ཀྱིས་གཙོས་འགན་འཛིན་ལྷན་ཚོགས་ཀྱི་ཚོགས་མི་རྣམས་ནས་ཕེབས་བསུའི་སྣེ་ལེན་གཟབ་རྒྱས་ཞུ་ཡོད་པ་བཅས། །