ཕྱི་ལོ་ ༢༠༡༩ ཟླ་ ༩ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༩ ཚེས་ ༢༤ ཉིན་ཨ་རིའི་མང་གཙོ་དང་སྤྱི་མཐུན་ཚོགས་པ་བཅས་ཆབ་སྲིད་ཚོགས་པ་གཉིས་ལས་གྲུབ་པའི་གྲོས་ཚོགས་འཐུས་མི་དང་། གྲོས་ཚོགས་གོང་མའི་རྒྱ་ནག་ལས་དོན་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ཇིམ་མེག་གྷོ་ཝན་ Jim McGovern མཆོག་བཅས་ཟུང་འབྲེལ་ཚོགས་གཙོ་སྐུ་ཞབས་མར་ཁོ་རུ་བྷིའོ་ Marco Rubio མཆོག་གིས་བོད་ནང་གི་བོད་མི་ཚོར་འགྲོ་བ་མིའི་ཐོབ་ཐང་དང་། ཆོས་དད་རང་དབང་། ཁོར་ཡུག་བཅས་ཀྱི་དཀའ་ངལ་འཕྲད་བཞིན་པར་གདོང་ལེན་གྱི་ཆེད་དུ་བོད་དོན་རྒྱབ་སྐྱོར་གྱི་སྲིད་བྱུས་ ༢༠༡༩ H.R.4331 / S. 2539 ཞེས་པའི་ཁྲིམས་འཆར་གསར་པ་ཞིག་བཏོན་གནང་འདུག
དེ་ཡང་ཁྲིམས་འཆར་དེར་ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་བྷེན་ཁར་ཌིན་ Ben Cardin མཆོག་དང་། ལིན་སེ་གྷྲ་ཧམ་ Lindsey Graham མཆོག ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ཌ་ཡིན་ཕ་ཡིན་སི་ཊ་ཡིན་ Dianne Feinstein མཆོག གྲོས་ཚོགས་འཐུས་མི་ཊོམ་ཁོ་ཊོན་ Tom Cotton མཆོག སྐུ་ཞབས་ཨེ་ཌི་མར་ཀེ་ Ed Markey མཆོག གྲོས་ཚོགས་འོག་མའི་འཐུས་མི་སྐུ་ཞབས་ཁི་རི་སི་སི་མིཐ་ Rep Chris Smith མཆོག སྐུ་ཞབས་ཊོམ་སའོ་ཛི་ Tom Suozzi མཆོག སྐུ་ཞབས་མར་ཀི་ Mark Meadows མཆོག་བཅས་ནས་རྒྱབ་སྐྱོར་གནང་འདུག
སྐུ་ཞབས་ཇིམ་མེག་གྷོ་ཝན་མཆོག་གིས། རྒྱ་ནག་གི་འགོ་ཁྲིད་ཚོས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཐོག་ཐེ་བྱུས་བྱ་རྒྱུ་དང་། ལྷག་པར་༸རྒྱལ་བའི་ཡང་སྲིད་ངོས་འཛིན་ཞུ་རྒྱུའི་ལམ་ལུགས་ལ་ཐེ་བྱུས་བྱས་ཚེ། ཨ་རིའི་གཞུང་གིས་དེར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་པ་མ་ཟད། འབྲེལ་ཡོད་རྣམས་ལ་དམ་བསྒྲགས་བཀའ་ཆད་གཅོད་དགོས་པ་སྲིད་གཞུང་གི་སྲིད་བྱུས་གཏན་འབེབ་དགོས་པའི་འབོད་སྐུལ་ཞུས་འདུག དེ་ཡང་ཁོང་གིས། ངས་ཁྲིམས་འཆར་འདིར་སྤོབས་པ་ཆེན་པོའི་སྒོ་ནས་རྒྱབ་སྐྱོར་བྱེད་དོན་གཙོ་བོ་ནི། ཨ་རི་གཞུང་གིས་བོད་མིའི་ཆོས་དད་རང་དབང་དང་། འགྲོ་བ་མིའི་ཐོབ་ཐང་། བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་ཐོབ་པར་རྒྱབ་སྐྱོར་ཤུགས་ཆེ་རུ་གཏོང་ཐབས་ཆེད་ཡིན། ཞེས་གསུངས།
སྐུ་ཞབས་མར་ཁོ་རུ་བྷིའོ་མཆོག་གིས། ང་ཚོའི་ངོས་ནས་གཞིས་བྱེས་བོད་མིའི་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་བྱེད་རྒྱུ་དང་། རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་གྲོས་མོལ་བྱེད་ཀྱི་མེད་པ་མ་ཟད། ༸གོང་ས་ཏཱ་ལའི་བླ་མ་སྐུ་ཕྲེང་ ༡༤ པའི་ཡང་སྲིད་སྐོར་ཐེ་བྱུས་བྱེད་ཀྱི་ཡོད་པ་དེ་ནི་རྒྱལ་སྤྱིའི་ཆོས་དད་རང་དབང་དང་། ཡང་སྒོས་བོད་མི་ནང་པ་ཚོའི་སྲོལ་རྒྱུན་བླ་སྤྲུལ་ངོས་འཛིན་ལམ་ལུགས་ལ་རྩིས་མེད་རྡོག་རོལ་བཏང་བ་ཞིག་ཡིན།་ཞེས་གསུངས། །
