ཕྱི་ལོ་ ༢༠༡༩ ཟླ་ ༩ ཚེས་ ༡༧ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༩ ཚེས་ ༡༦ ནས་ ༢༥ བར་ཉིན་གྲངས་བཅུའི་རིང་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག ཧི་མཱ་ཅལ་མངའ་སྡེ་གཞུང་གི་འཛིན་སྐྱོང་སྦྱོང་བརྡར་བསྟི་གནས་ཁང་དུ་ བོད་མིའི་སྒྲིག་འཛུགས་ཀྱི་སྡེ་ཚན་འགན་འཛིན་དང་། ལས་ཁུངས་དོ་དམ་པའི་གནས་རིམ་ཅན་ལས་བྱེད་ཁྱོན་བསྡོམས་གྲངས་ ༢༤ ལ་འཛིན་སྐྱོང་དང་འབྲེལ་བའི་ཟབ་སྦྱོང་ཞིག་དབུ་འཛུགས་གནང་ཡོད། དེ་ཡང་ཟབ་སྦྱོང་གི་དབུ་འབྱེད་མཛད་སྒོའི་ཐོག་མར་ཟབ་སྦྱོང་འགན་འཛིན་སྐུ་ཞབས་པྲ་ཝེཤ་ཤར་མ་ Shri Parvesh Sharma ལགས་ཀྱིས་འདེམས་ལྷན་དྲུང་ཆེ་དབུས་པས་ཟབ་སྦྱོང་བ་ཡོངས་ལ་དགའ་བསུའི་འཚམས་འདྲི་ཞུས་པ་དང་། ཉིན་གྲངས་བཅུའི་རིང་ཟབ་ཁྲིད་གནང་རྒྱུའི་སྦྱོང་ཚན་ཁག་རེ་རེ་བཞིན་ངོ་སྤྲོད་གནང་།

དེ་རྗེས་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ཟབ་སྦྱོང་གི་དགོས་དམིགས་འགྲེལ་བརྗོད་གནང་དོན། འཛམ་གླིང་འགྱུར་འགྲོས་ཤིན་ཏུ་ཆེན་པོ་འགྲོ་བཞིན་པའི་སྐབས་དང་བསྟུན་ནས། འཛིན་སྐྱོང་གི་བྱ་གཞག་ཀྱང་དེ་མཚུངས་འགྱུར་བ་གཏོང་དགོས་པ་ཆོས་ཉིད་ཆགས་ཡོད། དེར་བརྟེན་ལས་བྱེད་རྣམས་ལ་དུས་བསྟུན་ཟབ་སྦྱོང་འབུལ་རྒྱུ་ནི་དགོས་ངེས་ཅན་ཞིག་ཏུ་གྱུར་ཡོད། ཐེངས་འདིའི་ཟབ་སྦྱོང་ནང་མཉམ་ཞུགས་གནང་མཁན་སྦེལ་ཀོབ་དང་། སྒང་ཏོག རྡོར་གླིང་། ལ་དྭགས། ཌེ་ར་ལྡུན། རྡ་ས། བལ་ཡུལ་བཅས་ནས་ལས་བྱེད་ཕེབས་ཡོད་པ་རྣམས་ནས་དོ་ཁུར་ཆེ་བཞེས་ཐོག ཟབ་སྦྱོང་ནང་ཆ་ཤས་གང་མང་ལེན་ཞིང་། ཀུན་སྤྱོད་ཚུལ་བཞིན་བསྟེན་དགོས་པ་སོགས་གསུངས་གྲུབ་རྗེས། སྦྱོང་བརྡར་བསྟི་གནས་ཁང་གི་འགན་འཛིན་སྐུ་ཞབས་སི་པི་ཝར་མ་ C.P. Verma ལགས་ཀྱིས་ཐོག་མར་དགའ་བསུའི་འཚམས་འདྲི་ཞུས་ཤིང་། བོད་མིའི་སྒྲིག་འཛུགས་དང་ཧི་མཱ་ཅལ་འཛིན་སྐྱོང་སྦྱོང་བརྡར་བསྟི་གནས་ཁང་གཉིས་ལོ་མང་ནས་འབྲེལ་ལམ་གང་ལེགས་ཡོད་སྐོར་དང་།  དེ་བཞིན་ཟབ་སྦྱོང་གི་སློབ་ཚན་ཁག་གལ་ཆེ་དོན་ཆེར་བརྩིས་ཏེ་ཞིབ་དཔྱོད་མཐིལ་ཕྱིན་གནང་བའི་སྒོ་ནས་གོ་སྒྲིག་ཞུས་པ་པ་ཟད། སློབ་ཁྲིད་གནང་མཁན་ཡང་ལོ་མང་ཤེས་མྱོང་ཡོད་པའི་མི་སྣ་ཁག་གདན་ཞུས་གནང་ཡོད། ཅེས་དང་།

ཁོང་གིས་མུ་མཐུད་དེ་གསུངས་དོན། ལས་བྱེད་ཀྱི་ཟབ་སྦྱོང་ནི་གལ་གནད་ཆེན་པོ་ཡིན་པ་དང་། ལས་བྱེད་རྣམས་དེང་རབས་ཀྱི་འཕྲུལ་ཆས་སོགས་བེད་སྤྱོད་བྱེད་ཤེས་པ་དང་། དེ་དག་བེད་སྤྱོད་བྱེད་པའི་སྒོ་ནས་མི་མང་གི་དཀའ་ངལ་དག་སེལ་དགོས་སྐོར་སོགས་ཀྱི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །