༄༅། །འདི་གར་བྱང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བྱང་ཨ་རིའི་ས་གནས་ནིའུ་ཡོག་ཏུ་མཉམ་མེད་ཤར་༸རྒྱལ་བ་ཙོང་ཁ་བ་ཆེན་པོའི་དྲུག་བརྒྱའི་རྗེས་དྲན་གྱི་མཛད་སྒོ་དང་དམིགས་གསལ་སྨོན་ལམ་བཅས་ཉིན་གསུམ་རིང་གོ་སྒྲིག་ཞུས་པའི་ཐོག་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ བློ་བཟང་བསྟན་འཛིན་མཆོག་དང་། ཤར་པ་ཆོས་རྗེ་བློ་བཟང་རྡོ་རྗེ་རིན་པོ་ཆེ་མཆོག བྱང་རྩེ་ཆོས་རྗེ་སྒོ་སོག་རིན་པོ་ཆེ་ངག་དབང་གསུང་རབ་བསྟན་འཛིན་མཆོག་བཅས་ནས་ཆོས་འགྲེལ་དབང་ལུང་སོགས་བཀའ་ཁྲིད་ཟབ་མོ་བཀའ་དྲིན་གནང་བ་དང་།  བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་རྒྱ་གར་དུ་དམིགས་གསལ་ཚོགས་ཆེན་ལ་མ་ཕེབས་སྔོན་ཆེད་དུ་མཛད་སྒོའི་ཉིན་དང་པོར་རིན་པོ་ཆེ་རྣམ་པ་མཇལ་ཁར་བཅར་བ་དང་། ཚོགས་འདུ་ཉིན་གཉིས་པ་རྗེ་རིན་པོ་ཆེ་སྐུ་ཞི་བར་གཤེགས་ནས་གྲངས་ཆ་ ༦༠༠ འཁོར་བའི་རྗེས་དྲན་གྱི་མཛད་སྒོའི་སྟེང་བྱང་ཨ་རིའི་དོན་གཅོད་ཀྱི་སྐུ་ཚབ་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གསུང་འཕྲིན་སྒྲོགས་སྦྱང་ཞུས་པ་དང་གསུང་བཤད་གནང་། 

ཉིན་གསུམ་པར་དགའ་ལྡན་ཁྲི་རིན་པོ་ཆེ་མཆོག་གིས་རྗེ་རིན་པོ་ཆེའི་ཚེ་འཛིན་མའི་ཚེ་དབང་གནང་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭའི་ཞབས་རིམ་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་བཅས་དབུ་བཞུགས་ཐོག་སྨིན་སྒྲུབ་ཞུས་སོང་། ཉིན་གྲངས་གསུམ་གྱི་མཛད་སྒོའི་སྐབས་ཆོས་ཞུ་བ་སྟོང་ཁྲག་བརྒལ་བ་བཅར་འདུག་པ་བཅས། །