ཕྱི་ལོ་ ༢༠༡༩ ཟླ་ ༩ ཚེས་ ༢ རེས་གཟའ་ཟླ་བ།
༄༅། །བོད་རྒྱལ་ལོ་ ༢༡༤༦ ཕྱི་ལོ་ ༢༠༡༩ ཟླ་ ༩ ཚེས་ ༢ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམས་དང་། སྲི་ཞུ་བ། སེར་སྐྱ་ཕོ་མོ། གཞུང་འབྲེལ་མིན་པའི་ཚོགས་སྐྱིད་ཁག་གི་འཐུས་མི་རྣམ་པ་བཅས་ཚང་འཛོམས་ཐོག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་ནས་བོད་མི་རྣམས་ལ་མང་གཙོའི་ལམ་བཟང་གསོལ་བསྩལ་བཀའ་དྲིན་བསྐྱངས་ཏེ་མི་ལོ་ ༥༩ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོང་ཁྱེར་འཛུགས་སྐྲུན་ཡར་རྒྱས་བློན་ཆེན་ལྕམ་སྐུ་སར་ཝཱིན་ཅོ་དེ་རི་ Smt. Sarveen Chaudhary མཆོག་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་ཞབས་སོར་འཁོད་མཚམས་མཛད་སྒོ་དབུ་འཛུགས་ཀྱི་ཐོག་མར་ཚང་མ་སྐུ་བཞེངས་ཐོག་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་བོད་ཀྱི་ཟློས་གར་ཚོགས་པ་ནས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་གླུ་དབྱངས་སུ་གྱེར།
དེ་རྗེས་བོད་ཀྱི་ཟློས་གར་ཚོགས་པས་ཆོལ་གསུམ་འཆམ་མཐུན་ཞེས་པ་གཟིགས་འབུལ་ཞུས་གྲུབ་མཚམས་མཛད་སྒོའི་སྐུ་མགྲོན་གཙོ་བོ་ལྕམ་སྐུ་སར་ཝཱིན་ཅོ་དེ་རི་མཆོག་གིས་སྲིད་སྐྱོང་གཟེངས་རྟགས་བཞེས་མཁན་ ༤ ལ་གཟེངས་རྟགས་གནང་བ་དང་། སྲིད་ཚབ་མཆོག་གིས་བོད་མིའི་སྒྲིག་འཛུགས་ཀྱི་དབུས་རང་ཁོངས་ལས་བྱེད་ཞབས་ལོ་ ༢༥ ཡན་རྣམས་ལ་ལེགས་གསོའི་ཕྱག་འཁྱེར་གནང་།
དེ་ནས་ཡོངས་གླིང་སློབ་གྲྭས་མཉམ་གཞས་རྟེན་འབྲེལ་བཟང་པོ་ཞེས་པ་གཟིགས་འབུལ་ཞུས་བསྟུན་སྲིད་ཚབ་མཆོག་གིས་ཕྱི་ལོ་ ༢༠༡༩ ལོའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་ནུས་སྤེལ་ལས་གཞིའི་གཟེངས་བསྟོད་ཕྱག་འཁྱེར་བཞེས་མཁན་གཉིས་ལ་གཟེངས་རྟགས་གནང་བ་མ་ཟད། དཔལ་ལྡན་ཁྲིམས་ཞིབ་པ་ཆེ་བ་མཆོག་གིས་ ༢༠༡༩ ལོའི་ཡར་ལུང་ཟོ་ཐང་གཟེངས་བསྟོད་བཞེས་མཁན་ཁོངས་སོ་ནམ་པ་རྩེད་ཕུད་གཉིས་དང་། ན་གཞོན་སོ་ནམ་པ་རྩེ་ཕུད་གཅིག་བཅས་ལ་ཕྱག་འཁྱེར་གཟེངས་རྟགས་གནང་།
གཟེངས་རྟགས་འབུལ་བཞེས་གྲུབ་རྗེས་རྡ་ས་གངས་སྐྱིད་དཔེ་སྟོན་སློབ་གྲྭ་ནས་གཙང་འགྲིག་པའི་གཞས་ཆེན་ཞེས་པ་གཟིགས་འབུལ་ཞུས་རྗེས་བོད་མི་མང་སྤྱི་འཐུས་ཚོགས་གཙོ་མཆོག་གིས་ ༢༠༡༩ ལོའི་འཛིན་རིམ་བཅུ་གཉིས་ཀྱི་སྡེ་ཚན་གསུམ་གྱི་རྩེ་ཕུད་ཨང་རིམ་དང་པོ་སོན་པ་སློབ་ཕྲུག་གྲངས་ ༣ དང་། ཨང་རིམ་གཉིས་པ་སོན་པ་སློབ་ཕྲུག་གྲངས་ ༣ ། ཨང་རིམ་གསུམ་པ་སོན་པ་སློབ་ཕྲུག་གྲངས་ ༤ བཅས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་གནང་གྲུབ་བསྟུན་བོད་ཁྱིམ་ཉིན་སློབ་ནས་འཁྲབ་གཞས་མདོ་སྨད་དཔྱིད་ཀྱི་སྦྲང་འཆར་ཞེས་པ་གཟིགས་འབུལ་ཞུས། དེ་རྗེས་བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་། དེ་ནས་སླར་ཡང་རྡ་སྟེང་བོད་ཁྱིམ་ནས་གཉའ་ནང་འཁྲབ་གཞས་ཨ་རི་ཞེས་པ་གཟིགས་འབུལ་ཞུས་མཚམས། སྲིད་ཚབ་མཆོག་གིས་བཀའ་ཤག་གི་གསུང་བཤད་གནང་བ་དང་། དེ་རྗེས་སྐུ་མགྲོན་གཙོ་བོ་ལྕམ་སྐུ་སར་ཝཱིན་ཅོ་དེ་རི་མཆོག་གིས་གསུང་བཤད་གནང་། གསུང་བཤད་ཀྱི་ལས་རིམ་ཁག་ཡོངས་སུ་གྲུབ་བསྟུན། རྡ་ཤོད་བོད་ཁྱིམ་སློབ་གྲྭ་ནས་ནང་མ་འཛོམས་པ་རྣམ་གསུམ་ཞེས་པ་གཟིགས་འབུལ་ཞུས་ཏེ་ཐེངས་འདིའི་མང་གཙོའི་དུས་ཆེན་ཐེངས་ ༥༩ གཟབ་རྒྱས་ངང་སྲུང་བརྩི་ཞུས་ཡོད་པ་བཅས། །
