ཕྱི་ལོ་ ༢༠༡༩ ཟླ་ ༩ ཚེས་ ༢༧ རེས་གཟའ་པ་སངས། 

༄༅། །ཕྱི་ལོ་ ༢༠༡༩ ཟླ་ ༩ ཚེས་ ༢༦ རེས་གཟའ་ཕུར་བུའི་ཉིན་རྒྱ་གར་གྱི་རྒྱལ་ས་ལྡི་ལི་གསར་པར་ཡོད་པའི་ Constitutional Club ཞེས་པའི་ཚོགས་ཁང་དུ་ལྡི་ལིར་ཡོད་པའི་གཞུང་འབྲེལ་མིན་པའི་ཚོགས་པ་ཅཱ་ནཀྱ་ཐེབས་རྩ་ཁང་ Chanakya Foundation  ནས་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་ལ་གཟེངས་སུ་ཐོན་པའི་འགོ་ཁྲིད་ཀྱི་ཕྱག་ལས་གནང་བར་ངོས་འཛིན་ཆེད་ཤྱཱ་མ་པྲ་སཱད་མུ་ཁར་རྗི་རྒྱལ་ཡོངས་གཟེངས་རྟགས་  Dr. Shyamaprasad Mookerjee ཞེས་པ་ཕུལ་འདུག  

དེ་ཡང་བོད་མི་མང་སྤྱི་འཐུས་ཚོགས་གཞོན་མཆོག་གིས་བོད་ཀྱི་རྩ་དོན་དང་བོད་མིའི་སྤྱི་ཚོགས་སྲ་བརྟན། འགྲོ་བ་མིའི་ཐོབ་ཐང་གོང་སྤེལ་གཏོང་ཐབས་ཀྱི་མཛད་རྗེས་ལ་ཅཱ་ནཀྱ་ཐེབས་རྩ་ཁང་ནས་ཆེ་བསྟོད་ཀྱི་གཟེངས་རྟགས་དེ་འབུལ་ལམ་ཞུས་ཡོད། སྐབས་དེར་དཔལ་ལྡན་ཚོགས་གཞོན་མཆོག་གིས་གཟེངས་རྟགས་དེ་བཞིན་འབུལ་ལམ་ཞུས་པར་སྙིང་ཁུང་རུས་པའི་གཏིང་ནས་ཐུགས་རྗེ་ཆེ་ཞུས་ཡོད། 

མཛད་སྒོའི་ཐོག་རྒྱ་གར་དབུས་གཞུང་གི་མངའ་སྡེའི་ཟ་འབྲུ་དང་བཟོ་ལས་བློན་ཆེན་སྐུ་ཞབས་ར་མེཤ་ཝར་ཏེ་ལི་ Shri. Rameshwar Teli Ji མཆོག་དང་། རྒྱ་གར་བྷི་ཇེ་པི་སྲིད་དོན་ཚོགས་པའི་ཚོགས་གཙོ་ཟུར་པ་སྐུ་ཞབས་མུར་ལི་མ་ནོ་ཧར་ Dr Murli Manohar མཆོག རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་སྐུ་ཞབས་ཨིན་དེ་རེ་ཤི་ཀུ་མཱར་ Indresh Kumar མཆོག རྒྱ་གར་གྲོས་ཚོགས་འོག་མའི་འཐུས་མི་དང་ལྡི་ལི་བྷི་ཇེ་པི་སྲིད་དོན་ཚོགས་པའི་ཚོགས་གཙོ་མ་ནོཇ་ཏི་ཝ་རི་ Manoj Tiwari མཆོག རྒྱ་གར་དབུས་མཐོ་སློབ་འཛིན་སྐྱོང་ལྷན་ཚོགས་ཀྱི་ཚོགས་མི་སློབ་དཔོན་ཀི་རཱན་ཧ་ཛ་རི་ཀ་ Prof. Kiran Hazarika མཆོག་དང་ཨ་ཅཱརྱ་གྷུ་ཇ་གྷོ་པལ་རེཌི་ Acharya Gujja Gopal Reddy མཆོག་སོགས་རྒྱ་གར་གྱི་གནད་ཡོད་མི་སྣ་ཁག་གཅིག་བཅས་ཆེད་ཕེབས་གནང་ཡོད། 

སྐབས་དེར་ལྡི་ལི་ཁུལ་གྱི་གཞུང་དང་གཞུང་འབྲེལ་མིན་པའི་ཚོགས་པ་དང་། མི་མང་བཅས་མཛད་སྒོར་མཉམ་ཞུགས་ཀྱིས་དཔལ་ལྡན་ཚོགས་གཞོན་མཆོག་ལ་འཚམས་འདྲི་ཞུས་ཡོད་པ་བཅས། །