ཕྱི་ལོ་ ༢༠༡༩ ཟླ་ ༩ ཚེས་ ༡༩ རེས་གཟའ་ཕུར་བུ། 

༄༅། །བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ཡུ་རོབ་རྒྱལ་ཁབ་ ༣༠ ནང་ཡུ་རོབ་ཞི་བདེའི་གྲོས་མོལ་ཞེས་སྐོར་བསྐྱོད་གནང་བཞིན་ཡོད་པ་ལྟར། ཕྱི་ལོ་ ༢༠༡༩ ཟླ་ ༩ ཚེས་ ༡༧ ཉིན་སྤྱི་འཐུས་ཐུབ་བསྟན་དབང་ཆེན་ལགས་སྦེལ་ཇམ་གྱི་རྒྱལ་ས་སྦར་སིལ་དུ་ཕེབས་འབྱོར་སྐབས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཝིན་སན་ཊི་མར་ཊིན་ལགས། སྦེལ་ཇམ་བོད་རིགས་སྤྱི་མཐུན་ཚོགས་པ་ཁག་གི་ཚོགས་གཙོ་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

དེ་རྗེས་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ཕ་རན་སིའི་སྐད་ཡིག་གི་ཚགས་པར་ལེ་སོ་ཨིར་ Le Soir ཞེས་པའི་གསར་འགོད་པའི་བཅར་འདྲི་ལ་དང་ལེན་གྱིས་ཡུ་རོབ་ཞི་བདེའི་གྲོས་མོལ་སྐོར་བསྐྱོད་དང་འབྲེལ་བའི་དྲི་བ་ཁག་ལ་ལན་འདེབས་གནང་ཡོད། རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ས་གནས་མང་ཚོགས་ཁག་གཅིག་དང་ཐུག་འཕྲད་གནང་ཡོད་པ་དང་། སྐབས་དེར་རྒྱལ་སྤྱིའི་མནའ་མཐུན་མཉམ་འབྲེལ་འགྲོ་བ་མིའི་ཐོབ་ཐང་ཚོགས་པ་  International Federation for Human Rights དང་།

རྒྱལ་ཁབ་ཁག་གི་ངོ་ཚབ་མིན་པའི་མི་མང་གི་ཚོགས་པ།  Unrepresented Nations and Peoples Organisation ས་གནས་བོད་རིགས་སྤྱི་མཐུན་ཚོགས་པ་བཅས་ཀྱི་འགན་འཛིན་རྣམ་པ་མཉམ་ཞུགས་གནང་ཡོད། སྦར་སིལ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་ནཱ་ལེནྡྲ་ཚོགས་པའི་ནང་ཡུ་རོབ་ཞི་བདེའི་གྲོས་མོལ་སྐོར་བསྐྱོད་དང་འབྲེལ་བའི་ཚོགས་འདུ་ཚོགས་ཡོད་པ་དང་། ཚོགས་འདུའི་སྟེང་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་ཡུ་རོབ་ཞི་བདེའི་གྲོས་མོལ་སྐོར་བསྐྱོད་ཀྱི་དགོས་པ་དམིགས་ཡུལ་གཙོ་བོ་ནི། རྒྱ་ནག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་བོད་རྒྱ་གྲོས་མོལ་བསྐྱར་གསོ་གནང་དགོས་པ་དང་། གྲོས་མོལ་བརྒྱུད་བོད་རྒྱ་གཉིས་ཀྱི་གནད་དོན་གསལ་ཐུབ་ཀྱི་ཡོད་པ་སོགས་ཀྱི་སྐོར་གསུངས་།

ཕྱོགས་མཚུངས་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་སྦེལ་ཇམ་གྲོས་ཚོགས་གོང་མའི་གྲོས་ཚོགས་འཐུས་མི་ལྕམ་སྐུ་བྷེ་ཐུན་ Sebine de Bethune ལགས་དང་ཐུག་འཕྲད་ཀྱིས་གནད་དོན་འདྲ་མིན་ཐོག་གླེང་མོལ་གནང་ཡོད་པ་དང་།  གྲོས་ཚོགས་འཐུས་མི་ལྕམ་སྐུ་བྷེ་ཐུན་ལགས་ཀྱིས་ཡུ་རོབ་ཞི་བདེའི་གྲོས་མོལ་སྐོར་བསྐྱོད་ཀྱི་རྒྱབ་སྐྱོར་ཞུ་ཡིག་སྟེང་མཚན་རྟགས་བཀོད་གནང་ཡོད་པ་བཅས། །