ཕྱི་ལོ་ ༢༠༡༩ ཟླ་ ༩ ཚེས་ ༣༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༩ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཟིམ་ཆུང་མཇལ་ཁའི་སྐབས་སོག་རིགས་ཁག་གཅིག་ལ་ནང་ཆོས་སློབ་གཉེར་བྱེད་རྒྱུ་གལ་ཆེན་པོ་ཡིན་སྐོར་བཀའ་སློབ་སྩལ་དོན། ང་ཚོ་བོད་དང་སོག་པོ་ལ་ཡོད་པའི་གཞུང་ཆེན་ཁག་སྟེ་ཚད་མ་རྣམ་འགྲེལ་དང་དབུ་མ། ཕར་ཕྱིན་བཅས་དབུ་ཕར་རྣམ་འགྲེལ་དེ་དག་གསུམ་པོ་ནི་གལ་ཆེ་ཤོས་རེད་འདུག དབུ་ཕར་དང་ཚད་མ་དེ་ཚོའི་གྲས་ལ་སློབ་སྦྱོང་ཡག་པོ་ཡོད་པ་དང་། དེ་བཞིན་ཚན་རིག་གི་སློབ་སྦྱོང་ཡོད་ན་ནཱ་ལེནྡྲའི་ཆོས་བརྒྱུད་ཀྱི་སངས་རྒྱས་བསྟན་པ་འདི་དུས་རབས་ཉི་ཤུ་རྩ་གཉིས་དང་རྩ་གསུམ་བར་ཕལ་ཆེར་གནས་ཀྱི་རེད་བསམ་གྱི་འདུག དུས་རབས་ ༢༢་་༢༣ བར་བསྟན་པ་རྒྱུན་གནས་ཐུབ་པར་སོག་པོ་ཚོས་ཏན་ཏན་ཞབས་འདེགས་སྒྲུབ་ཐུབ་ཀྱི་རེད། བསྟན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་པ། །སྒྲུབ་པ་བྱེད་པ་ཁོ་ན་ཡིན། །ཞེས་སངས་རྒྱས་པའི་བསྟན་པར་ལུང་རྟོགས་ཀྱི་བསྟན་པ་གཉིས་ཡོད་པ་རེད། ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་དགོས་པ་དེ་བཤད་སྒྲུབ་གཉིས་ཀྱི་སྒོ་ནས་འཛིན་སྐྱོང་སྤེལ་གསུམ་བྱེད་དགོས་པ་རེད་མ་གཏོགས་ཐབས་གཞན་མེད། ཅེས་གསུང་འདུག
དེར་བརྟེན་གྲྭ་སར་སློབ་སྦྱོང་བྱེད་མཁན་རིན་པོ་ཆེ་ལྟ་བུ་ཁྱེད་རང་ཚོ་གྲས་ཀྱིས་འདིར་སློབ་སྦྱོང་ཡག་པོ་བྱས་ཏེ་མ་འོངས་པར་སོག་ཡུལ་དུ་དགོན་པ་ཡོད་པ་གྲས་ལ་ནང་ཆོས་སློབ་སྦྱོང་བྱེད་རྒྱུ་ཡག་པོ་ཡོད་པ་ཞིག་དང་། ནང་ཆོས་སློབ་སྦྱོང་བྱེད་རྒྱུ་ནི་གྲྭ་པ་ཁོ་ན་མིན་པར་མི་སྐྱ་ཕོ་མོ་ཚོས་སློབ་སྦྱོང་བྱེད་ཐུབ་པ་བྱུང་ན་ཡག་པོ་ཡོད་པ་མ་ཟད། མི་ལ་ཕན་གྱི་རེད། ཁྱེད་རང་ཚོས་ཧུར་ཐག་གནང་ཤོག་ཨང་། ཞེས་བཀའ་སློབ་སྩལ།།
