ཕྱི་ལོ་ ༢༠༡༩ ཟླ་ ༩ ཚེས་ ༩ རེས་གཟའ་ཟླ་བ།

༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། མི་ནི་སོ་ཊའི་བོད་རིགས་སྤྱི་མཐུན་ཚོགས་པས་ཇི་ལྟར་མགྲོན་འབོད་གདན་ཞུ་ལྟར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཕྱི་ལོ་  ༢༠༡༩ ཟླ་ ༩ ཚེས་ ༨ ཉིན་གྱི་སྔ་དྲོ་ཆུ་ཚོད་ ༡༠།༣༠ ཙམ་ལ་མི་ནི་སོ་ཊའི་གནམ་ཐང་དུ་ཕེབས་འབྱོར་སྐབས་བྱང་ཨ་རིའི་སྤྱི་འཐུས་ཚེ་དབང་རིག་འཛིན་ལགས་དང་། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ངག་དབང་འཆི་མེད་ལགས། བྱང་ཨ་རིའི་དོན་གཅོད་ཁང་གི་སྐུ་ཚབ་བསྟན་འཛིན་ཚེ་དཔག་ལགས།  ས་གནས་སུ་རྟེན་གཞི་བྱས་པའི་བོད་བརྒྱུད་ནང་བསྟན་གྱི་དགོན་པ་རྒྱུད་སྟོད་དང་། ས་སྐྱ། རྙིང་མ། གཡུང་དྲུང་བོན་བཅས་ཆོས་ཚོགས་ཁག་གི་སྐུ་ཚབ་དང་། བོད་ཀྱི་སྐད་ཡིག་དང་རིག་གཞུང་སློབ་གྲྭའི་སློབ་མ་སོགས་མང་ཚོགས་ཉིས་བརྒྱ་ལྷག་ཙམ་གནམ་ཐང་དུ་གྲོ་སོ་ཕྱེ་མར་འདེགས་འབུལ་གྱིས་ཕེབས་བསུ་གཟབ་རྒྱས་ཞུས་ཡོད།

དེ་ཡང་ཉིན་རྒྱབ་ཆུ་ཚོད་གསུམ་པའི་ཐོག་དཔལ་ལྡན་སྲིད་སྐྱོང་མཆོག་མི་ནི་སོ་ཊའི་བོད་རིགས་སྤྱི་མཐུན་ཚོགས་པའི་ཚོགས་ཁང་ནང་ཕེབས་ཏེ་མང་ཚོགས་བཞི་བརྒྱ་ལྷག་འདུ་འཛོམས་སར་གསུང་བཤད་གནང་རྗེས་མང་ཚོགས་ཀྱིས་དྲི་བ་ཁག་ལ་ལན་འདེབས་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་ལ་ཨ་རི་མི་ནི་སོ་ཊ་བོད་རིགས་སྤྱི་མཐུན་ཚོགས་པས་དྲན་རྟེན་ཕྱག་རྟགས་ཕུལ་ཡོད། དགོང་མོ་ཆུ་ཚོད་ ༦།༣༠ ཐོག་མགྲོན་ཁང་མེ་རེ་ཊེ་  Hotel Marriott ཞེས་པའི་འདུ་འཛོམས་ཁང་དུ་དཔལ་ལྡན་སྲིད་སྐྱོང་མཆོག་ལ་དགོང་མོའི་གསོལ་སྟོན་  Gala Dinner གོ་སྒྲིག་ཞུས་ཡོད་པ་དང་གསོལ་སྟོན་དེའི་ཐོག་དཔལ་ལྡན་སྲིད་སྐྱོང་མཆོག་དང་། ཕྱོགས་བཞུགས་སྤྱི་འཐུས་ཚེ་དབང་རིག་འཛིན་ལགས། བཀའ་དྲུང་ཟུར་པ་སྟོབས་རྒྱལ་ཚེ་རིང་ལགས་སོགས་གཞུང་ཞབས་ཟུར་པ་ཁག་དང་། དགོས་སྡེ་ཁག་གི་སྐུ་ཚབ་ཀྱིས་གཙོས་མི་མང་ལྔ་བརྒྱ་ལྷག་ཙམ་འདུ་འཛོམས་གནང་ཡོད།

ཕྱི་ཚེས་ ༩ ཉིན་གྱི་སྔ་དྲོ་ཆུ་ཚོད་ ༧ ཐོག་མཁའ་ལམ་བརྒྱུད་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་གྱིས་ཨ་རིའི་གཞུང་དང་གྲོས་ཚོགས་ཁང་བཅས་ལ་མཛད་འཆར་དང་། དགོང་མོ་ཆུ་ཚོད་ལྔ་པ་ནས་དྲུག་པ་བར་ཨ་རིའི་གྲོས་ཚོགས་ཁང་ནས་གཞུང་འབྲེལ་ཕེབས་བསུའི་མཛད་སྒོ་ Receiption ཞུ་འཆར་ཡོད་པ་བཅས། །