ཕྱི་ལོ་ ༢༠༡༩ ཟླ་ ༩ ཚེས་ ༣ རེས་གཟའ་མིག་དམར། 

༄༅། ཕྱི་ལོ་ ༢༠༡༩ ཟླ་ ༩ ཚེས་ ༣ རེས་གཟའ་མིག་དམར་ཉིན་སྤུ་རུ་ཝ་ལ་སཾ་བྷོ་ཊ་ཉིན་སློབ་ཀྱི་སློབ་ཟུར་ཐུན་མོང་གི་གོ་སྒྲིག་འོག རྒྱ་གར་བྱང་ཕྱོགས་སྤུ་རུ་ཝ་ལ་ས་སྐྱ་གཞིས་ཆགས་སུ་ཡོད་པའི་སཾ་བྷོ་ཊ་ཉིན་སློབ་དེ་བཞིན་ཕྱི་ལོ་ ༡༩༦༩  ཟླ་ ༩ ཚེས་ ༣ ཉིན་ཐོག་མར་དབུ་བརྙེས་ཏེ་མི་ལོ་ ༥༠ ཧྲིལ་པོར་འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་འདུག 

དེ་ཡང་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། དམིགས་བསལ་སྐུ་མགྲོན་ས་སྐྱའི་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས། གཞན་ཡང་གལ་ཆེའི་སྐུ་མགྲོན་སྤུ་རུ་ཝ་ལའི་མ་དགོན་བཤད་གྲྭའི་མཁན་རིན་པོ་ཆེ་ཆོས་ཉི་མ་མཆོག མཁན་རིན་པོ་ཆེ་ངག་དབང་ཉི་མ་མཆོག ཤེས་རིག་ལས་ཁུངས་ཀྱི་ཤེས་ཡོན་དེང་སྲོལ་ཚན་པའི་འགན་འཛིན་བསྟན་འཛིན་རྡོ་རྗེ་ལགས།  སཾ་བྷོ་ཊའི་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས། ཨུ་ཏར་ཁན་མངའ་ཁོངས་དཔལ་ས་སྐྱའི་ཆོས་སྒར། ས་སྐྱ་མཐོ་སློབ། བདེ་སྐྱིད་གླིང་དུ་ཡོད་པའི་ས་སྐྱ་བཙུན་དགོན་རིན་ཆེན་ཆོས་གླིང་བཅས་ཀྱི་དབུ་འཛིན་རྣམ་པ། ཧི་མཱ་ཅལ་མངའ་སྡེའི་སིར་མོར་རྫོང་ཁོངས་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམ་པ། ས་གནས་རྒྱ་གར་གནད་ཡོད་མི་སྣ། སྤོན་ཊ་སཾ་བྷོ་ཊའི་སློབ་སྤྱིས་གཙོས་དགེ་ཆེ་རྣམ་པ། ས་གཞིས་སྤུ་རུ་ཝ་ལ་སཾ་བྷོ་ཊའི་ཉིན་སློབ་ཀྱི་ལས་ཟུར་དང་སློབ་ཟུར། མང་ཚོགས་བཅས་ཚང་འཛོམས་ཀྱི་ཐོག་མར་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་སྣང་གསལ་མར་མེ་ཞལ་ཕྱེ་གནང་བསྟུན་ཚང་མའི་སྐུ་བཞེངས་ཐོག་སྤུ་རུ་ཝ་ལ་ཉིན་སློབ་ཀྱི་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་བཏང་། 

དེ་རྗེས་རྟེན་འབྲེལ་མཚོན་བྱེད་སྐུ་མགྲོན་དང་མང་ཚོགས་རྣམས་ལ་གསོལ་ཇ་དང་འབྲས་བསིལ་འདེགས་འབུལ་ཞུས་གྲུབ་མཚམས་སློབ་ཕྲུག་རྣམས་ནས་སྤྱན་རས་གཟིགས་དབང་རྣམ་ཐར་དང་། མཉམ་གཞས་ལྔ་བཅུའི་དྲན་གླུ་ཞེས་པ་གཟིགས་འབུལ་ཞུས།  ཕྱོགས་མཚུངས་རིགས་ལམ་རྟགས་གསལ་གནང་། 

དེ་ནས་ཉིན་སློབ་ཀྱི་དགེ་ཆེ་ལས་ཚབ་སྒྲོལ་མ་ལྷ་སྒྲོན་ལགས་ཀྱིས་ཉིན་སློབ་བྱུང་རིམ་གྱི་ལོ་རྒྱུས་སྙིང་དོན་ངོ་སྤྲོད་གནང་གྲུབ་མཚམས་སཾ་བྷོ་ཊ་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས་ཀྱིས་གསུང་བཤད་གནང་། དེ་ནས་རིམ་པར་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱི་གསུང་བཤད་གནང་བསྟུན། མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་མཆོག་གིས་གསུང་བཤད་གནང་དོན། ཐོག་མར་འདིར་ཕེབས་པའི་སྐུ་མགྲོན་དང་མང་ཚོགས་བཅས་ལ་བོད་མིའི་སྒྲིག་འཛུགས་བཀའ་ཤག་སྐབས་བཅོ་ལྔ་དང་། སྒེར་གི་ངོས་ནས་སླར་ཡང་མཇལ་རྒྱུ་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་སྔོན་སྤུ་རུ་ཝ་ལ་ས་སྐྱ་བོད་མིའི་གཞིས་ཆགས་དབུ་བརྙེས་ནས་ལོ་ངོ་ ༥༠ ཧྲིལ་པོ་འཁོར་བའི་མཛད་སྒོ་ཐོག་བཅར་རྒྱུ་བྱུང་སོང་། ཐེངས་འདིར་སྐུ་མགྲོན་དུ་བཅར་བ་ནི་གསུང་བཤད་གནང་ཆེད་བཅར་བ་ཞིག་མིན། ཕྲན་འདིར་མང་ཚོགས་ལ་གསུང་བཤད་གནང་ཐུབ་པ་དེ་ནི་སློབ་གྲྭ་དེ་ཉིད་ཀྱི་བཀའ་དྲིན་ཆེན་པོ་ཞིག་ཡིན་པར་བརྟེན་འདིར་བཅར་བ་ཡིན། 

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གི་སྐུ་ལས་སྐྱོན་པར་ས་སྐྱ་གཞིས་ཆགས་འདི་ཉིད་བཅུགས་ཏེ་ལོ་ངོ་ ༥༠ འཁོར་ཟིན་པ་རེད། དེ་སྔོན་སློབ་གྲྭའི་བྱུང་རིམ་སྒྲོགས་སྦྱང་གནང་བའི་སྐབས་སློབ་གྲྭའི་མིང་ཐེངས་གསུམ་འགྱུར་བ་ཕྱིན་འདུག 

སློབ་གྲྭ་དེ་ཐོག་མར་ལྕམ་སྐུ་མུ་ནྟི་ལགས་ཀྱི་མཐུན་འགྱུར་རོགས་རམ་འོག་སློབ་གྲྭའི་མིང་ས་སྐྱ་མུ་ནྟི་སློབ་གྲྭ་ཞེས་མིང་བཏགས་ཡོད། དེ་ནས་རིམ་པར་ Central School for Tibetan Puruwala དང་། ད་ལྟ་ཤེས་རིག་ལས་ཁུངས་ཀྱི་སྟངས་འཛིན་འོག་སཾ་བྷོ་ཊ་སྤུ་རུ་ཝ་ལ་སློབ་གྲྭ་ཞེས་མིང་ཐོགས་ཡོད། ཕྱི་ལོ་ ༡༩༩༤ ལོར་སློབ་གྲྭ་དབུ་བརྙེས་ཏེ་ལོ་ངོ་ ༢༥ འཁོར་བའི་དུས་དྲན་ཐོག་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་སྐུ་མགྲོན་གཙོ་བོ་ཆེད་ཕེབས་ཀྱི་མཛད་སྒོ་སྲུང་བརྩི་ཞུས་ཡོད། སྐབས་དེ་དུས་ཕྲན་རང་སློབ་གྲྭའི་དགེ་རྒན་གྱི་ལས་གནས་བྱེད་བཞིན་ཡོད། ཕྱོགས་མཚུངས་སློབ་ཟུར་ཚོགས་པ་ཞེས་ཟུར་དུ་དམིགས་བསལ་མེད། སློབ་གྲྭ་རང་གི་འགན་བཞེས་པའི་ཐོག ས་སྐྱ་སྒྲོལ་མ་ཕོ་བྲང་ནས་མཐུན་འགྱུར་འོག་ནས་གོ་སྒྲིག་གནང་ཡོད། གཞིས་ཆགས་འདི་ཉིད་ཀྱི་སློབ་གྲྭ་ནས་མཐར་སོན་པ་སློབ་ཕྲུག་གང་ཙམ་ཞིག་ད་ལྟ་བོད་པའི་སྤྱི་ཚོགས་ཁག་དང་། གཞིས་ཆགས། བོད་མིའི་སྒྲིག་འཛུགས་ཀྱི་སྲི་ཞུ་བའི་ཕྱག་ལས་གནང་དང་གནང་བཞིན་ཡོད། 

དེ་རིང་གི་དུས་ཆེན་ཐོག་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གིས་ཐུགས་རྗེ་བཀའ་དྲིན་དང་། སློབ་གྲྭའི་དགེ་ལས་བཅས་ཀྱི་བཀའ་དྲིན་བསམ་ཤེས་ཀྱི་ཐོག་ནས་སློབ་ཕྲུག་ཟུར་པ་རྣམས་ནས་དམིགས་བསལ་གྱི་འགན་བཞེས་པའི་ཐོག་ནས་གོ་སྒྲིག་གནང་བར་ངས་བསྔགས་བརྗོད་དང་སྦྲགས་ཐུགས་རྗེ་ཆེ་ཞུ་རྒྱུ་ཡིན། གཞན་ཡང་སློབ་ཕྲུག་ཙམ་མ་ཟད་ཕ་མའི་ངོས་ནས་ཤེས་ཡོན་གལ་ཆེན་པོ་བརྩིས་པའི་ཐོག་ནས་ཕྲུ་གུ་ཤེས་ཡོན་སྤྲོད་དགོས་རྒྱུ་ཧ་ཅང་གལ་ཆེན་པོ་རེད། ཅེས་དང་། བོད་མིའི་སྒྲིག་འཛུགས་ཀྱི་ངོས་ནས་ཤེས་ཡོན་གལ་ཆེར་བརྩིས་པའི་ཐོག་ནས་མཐུན་འགྱུར་གནང་དང་གནང་མུས་ཡིན་སྐོར་དང་། ཤེས་ཡོན་སློབ་སྦྱོང་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་། 

དེ་ནས་སློབ་ཟུར་གོ་སྒྲིག་ཚོགས་ཆུང་གི་ཚོགས་མི་ཚེ་རིང་བསྟན་པ་ལགས་ཀྱིས་ས་སྐྱའི་བདག་མོ་སྐལ་ལྡན་ལགས་ཀྱི་གསུང་འཕྲིན་སྒྲོགས་སྦྱང་གནང་རྗེས་དཔལ་འབྱོར་བཀའ་བློན་མཆོག་གིས་ཉིན་སློབ་ཀྱི་འགན་འཛིན་དང་དགེ་ལས་ཟུར་པ་རྣམས་དང་ད་ལྟ་ཉིན་སློབ་ཀྱི་ལས་ཐོག་དགེ་ཆེ་དང་སློབ་དགེ་བཅས་ལ་ལྔ་བཅུ་དྲན་རྟེན་ཕྱག་རྟགས་དང་ཤེས་རིག་དེང་སྲོལ་ཚན་པའི་འགན་འཛིན་བསྟན་འཛིན་རྡོ་རྗེ་ལགས་དང་། སཾ་བྷོ་ཊ་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས་རྣམ་གཉིས་ལ་ཕྱག་རྟགས་གནང་རྗེས་མཛད་སྒོའི་སྐུ་མགྲོན་གཙོ་བོ་དང་དམིགས་བསལ་སྐུ་མགྲོན་རྣམ་གཉིས་ལ་ལྔ་བཅུའི་དྲན་རྟེན་གྱི་ཕྱག་རྟགས་གནང་།

མཐར་སློབ་ཟུར་གོ་སྒྲིག་ཚོགས་ཚུང་གི་ཚོགས་མི་ཚེ་རིང་དགའ་བ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།  སྐབས་དེར་སྤུ་རུ་ཝ་ལའི་ཉིན་སློབ་ཀྱི་སློབ་ཕྲུག་དང་། ས་གཞིས་མི་མང་རྒན་པ་དང་། སློབ་ཟུར་རྣམས་ནས་རྟེན་འབྲེལ་སླད་གཞས་སྣ་ཁག་གཅིག་གཟིགས་འབུལ་ཞུས་ཡོད་པ་བཅས། །