ཕྱི་ལོ་ ༢༠༡༩ ཟླ་ ༩ ཚེས་ ༣ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཕྱི་ལོ་ ༢༠༡༩ ཟླ་ ༨ ཚེས་ ༡༩ ནས་ ༣༡ བར་ལ་དྭགས་ཁུལ་དུ་རྟེན་གཞི་བྱས་པའི་བོད་ཀྱི་དགོན་སྡེ་ཁག་ཏུ་གནས་གཟིགས་དང་། བོད་མིའི་སྒྲིག་འཛུགས་དང་ལ་སྤྱི་ལས་ཁུངས་ཐུན་མོང་ནས་ཉེ་སྔོན་རྒྱ་གར་གཞུང་གིས་ལ་དྭགས་དེ་བཞིན་རྒྱ་གར་དབུས་གཞུང་ནས་ཐད་ཀར་འཛིན་སྐྱོང་སྟངས་འཛིན་བྱས་པའི་དབུས་འཛིན་མངའ་ཁུལ་ Union Territory དུ་ངོས་འཛིན་གནང་བར་དགའ་བསུའི་རྟེན་འབྲེལ་མཚོན་སླད་དགོང་ཚིགས་གསོལ་སྟོན་གྱི་མཛད་སྒོར་ཕེབས་ཞུགས་ཀྱིས་ས་གནས་ཀྱི་གནད་ཡོད་མི་སྣ་དང་མཇལ་འཕྲད། དེ་བཞིན་མང་ཚོགས་ལ་གསུང་བཤད་གནང་བ་སོགས་ཀྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད།

ཐེངས་འདིར་བཀའ་བློན་མཆོག་གིས་རུ་ཐོག་ལྷུན་གྲུབ་ཆོས་གླིང་དགོན་དང་། གཡུང་དྲུང་བོན་གྱི་དགོན་པ། ཀརྨ་སྒྲུབ་རྒྱུད་ཆོས་གླིང་དགོན། ཐུབ་བསྟན་མདོ་སྔགས་བཤད་སྒྲུབ་གླིང་། ལ་དྭགས་བྱང་ཐང་སུམ་མདོར་ཡོད་པའི་མ་ཧེ་དགོན། ལྡུམ་ར་དང་ཨལ་ལྕི། མ་ཁྱུ། སུམ་མདོ། བྲག་ཐོག དཔེ་ཐུབ། མང་ཁྲོ། ཁྲིག་རྩེ། ཤེ། ཧེ་མིས། ཕི་ཡང་བཅས་སུ་རྟེན་གཞི་བྱས་པའི་དགོན་སྡེ་ཁག་ཏུ་གནས་གཟིགས་གནང་ཡོད་པ་མ་ཟད། ཕྱི་ཚེས་ ༢༣ ཉིན་ལ་དྭགས་བསོད་ནམས་གླིང་གི་གཞིས་མི་མང་ཚོགས་ལ་བཞུགས་སྒར་རྡ་སར་འཚོགས་ལ་ཉེ་བའི་དམིགས་བསལ་ཚོགས་ཆེན་ཐེངས་གསུམ་པའི་བརྗོད་གཞི་གཙོ་བོ་གཉིས་ཏེ་ལྔ་དང་ལྔ་བཅུ་དང་། ༸རྒྱལ་དབང་སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་སྐོར་ངོ་སྤྲོད་དང་མང་ཚོགས་ཀྱི་དྲི་བར་ལམ་འདེབས་གནང་། 

གཞན་ཡང་ཕྱི་ཚེས་ ༢༤ ནས་ ༢༧ བར་བཀའ་བློན་མཆོག་ལ་སྤྱི་དང་ལྷན་བྱང་ཐང་སུམ་མདོ་དང་། ས་སྨད། ཧན་ལེ། ཉོ་མ། ཆུ་མུར། བཀག་གཞུང་། རྒོད་ཡུལ། མ་ཁྱུ་བཅས་སུ་འཚམས་གཟིགས་གནང་ཡོད་པ་བཅས། །