ཕྱི་ལོ་ ༢༠༡༩ ཟླ་ ༨ ཚེས་ ༡༩ རེས་གཟའ་ཟླ་བ།
༄༅། །བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་འོག་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་ཟུར་པ་འབུམ་རམས་པ་བསྟན་འཛིན་རྡོ་རྗེ་ལགས་ནས་ཕྱི་ལོ་ ༢༠༡༩ ཟླ་ ༨ ཚེས་ ༡༩ ཉིན་གྱི་ཕྱི་དྲོ་ཆུ་ཚོད་ ༣ ཐོག་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་དབུས་ལྷན་ཁང་ཁག་གི་དྲུང་ཆེ་དང་སྤྱི་འཐུས་རྒྱུན་ལས་རྣམ་པ། དེ་བཞིན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམ་པ་བཅས་ལ་རྒྱལ་སྤྱིའི་ཆོས་དད་རང་དབང་དང་འབྲེལ་ལམ་རིག་པའི་ཐོག་གསུང་བཤད་གནང་ཡོད་པ་དང་།
སྐབས་དེར་བསྟན་འཛིན་རྡོ་རྗེ་ལགས་ནས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་སྐོར་དང་བཙན་བྱོལ་བོད་མི་ཞིག་གིས་རིམ་པས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོ་ཐེངས་གཉིས་གནང་བའི་བྱུང་རིམ་རྒྱབ་ལྗོངས་ཀྱི་ལོ་རྒྱུས་སྐོར་གསུང་བ་མ་ཟད། བསྟན་འཛིན་རྡོ་རྗེ་ཁོང་རང་ཉིད་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་གཙོར་སླེབས་པ་དེ་གལ་ཆེན་པོ་མ་ཡིན་པར། བོད་པ་ཞིག་ཚོགས་གཙོར་སླེབས་པ་དེ་བོད་མི་ཚོས་གཟི་བརྗིད་ཅིག་ལ་བརྩི་དགོས་པའི་གལ་གནད་སྐོར་གསུང་། ཕྱོགས་མཚུངས་བསྟན་འཛིན་རྡོ་རྗེ་ལགས་ཀྱིས་འབྲེལ་ལམ་རིག་པའི་ཐོག་གསུང་བཤད་གནང་སྐབས།
ཨ་རི་རྒྱལ་ཁབ་ལ་མཚོན་ན་མི་སྒེར་གྱི་རང་དབང་གལ་ཆེན་པོ་རྩི་ཡི་ཡོད་པ་དང་། གཞུང་གི་གནད་ཡོད་མི་སྣ་ཚོ་དང་འབྲེལ་བ་བྱེད་སྐབས་ལས་བྱེད་གོ་གནས་ཆེ་ཆུང་ལ་མ་ལྟོས་པར་ཚང་མར་གཅིག་མཚུངས་ཀྱིས་བརྩི་བཀུར་ཞུ་དགོས་ཞེས་དང་། གཞན་ཡང་ནང་ཁུལ་དབར་འབྲེལ་བ་བྱེད་སྐབས་སྐད་ཆ་གསལ་པོ་བྱས་ནས་བརྗོད་དགོས་པ་མ་ཟད། དུས་ཚོད་ལ་སྟངས་འཛིན་གནང་རྒྱུ་ཧ་ཅང་གལ་ཆེན་ཡིན་པའི་སྐོར་གསུང། མཐའ་དོན་བོད་མི་གཞོན་སྐྱེས་ཚོས་གནའ་དེང་ཟུང་འབྲེལ་གྱི་ཤེས་ཡོན་ཐོག་སློབ་སྦྱོང་བྱས་ཏེ་འདབ་གཤོག་གཉིས་ལྡན་གྱི་ཤེས་ཡོན་པ་ཞིག་བྱེད་དགོས་པ་དང་། དེ་བཞིན་མི་དང་མིའི་དབར་འབྲེལ་བ་གནང་རྒྱུ་ཧ་ཅང་གལ་ཆེན་པོ་ཡིན་པ་སོགས་ཀྱི་སྐོར་གསུངས་པ་དང་འབྲེལ། ཚོགས་བཅར་བའི་དྲི་བ་ཁག་གཅིག་ལ་ལན་འདེབས་གནང་ཡོད་པ་བཅས། །
