༢༠༡༩ ཟླ་ ༨ ཚེས་ ༣ རེས་གཟའ་སྤེན་པ།

༄༅། །ཕྱི་ལོ་ ༢༠༡༩ ཟླ་ ༨ ཚེས་ ༣ ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཙམ་ལ་ཨ་རིའི་མང་གཙོ་ཚོགས་པ་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་དྲུག་ལས་གྲུབ་པའི་ཆེས་མཐོའི་སྐུ་ཚབ་ཚོགས་ཆུང་རྡ་ས་གངས་སྐྱིད་དུ་རྟེན་གཞི་བྱས་པའི་བོད་མི་མང་སྤྱི་འཐུས་ལྷན་ཚོགས་སུ་འཚམས་གཟིགས་སུ་ཕེབས་པར་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་མཆོག་དང་རྒྱུན་ལས་བཅས་ཀྱིས་སྐུ་མགྲོན་རྣམས་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཏེ་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་དུ་གདན་ཞུས་གནང་རྗེས་སྤྱི་འཐུས་རྒྱུན་ལས་ཚོགས་ཁང་ནང་ཨ་རིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གི་ཚོགས་མི་རྣམས་དང་། སྤྱི་འཐུས་རྒྱུན་ལས་རྣམ་པ་ལྷན་འཛོམས་ཐོག་དཔལ་ལྡན་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་སྤྱི་འཐུས་རྒྱུན་ལས་རྣམ་པ་ངོ་སྤྲོད་དང་། དཔལ་ལྡན་ཚོགས་གཙོ་མཆོག་གིས་འཚམས་འདྲིའི་གསུང་བཤད་གནང་གྲུབ་མཚམས་ཨ་རིའི་གྲོས་ཚོགས་འོག་མའི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་ཌེ་ཝིཌ་པ་རཡིས་མཆོག་གིས་ཨ་རིའི་གྲོས་ཚོགས་འོག་མའི་མང་གཙོ་མཉམ་འབྲེལ་ཚོགས་ཆུང་ནས་འཛམ་གླིང་ནང་མང་གཙོའི་རིང་ལུགས་ཐོག་བསྐྱོད་རྒྱུར་འབད་བརྩོན་བྱེད་མཁན་གྱི་རྒྱལ་ཁབ་ཁག་ལ་རྒྱབ་སྐྱོར་བྱེད་བཞིན་ཡོད་སྐོར་དང་། བཞུགས་སྒར་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མཇལ་ཁ་ཞུ་རྒྱུ་དང་། བཙན་བྱོལ་བོད་མིའི་མང་གཙོའི་སྒྲིག་འཛུགས་དང་ལྷན་མང་གཙོའི་ཐོག་ཕན་ཚུན་གོ་བསྡུར་སྦྱངས་བཤད་བྱེད་རྒྱུའི་སླད་རྡ་སར་ཆེད་ཕེབས་གནང་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས་གྲོས་ཚོགས་འཐུས་མི་རྣམ་པ་དང་སྤྱི་འཐུས་རྒྱུན་ལས་རྣམ་པའི་དབར་དྲི་བ་དྲིས་ལན་དང་། གྲོས་བསྡུར་ལྷུགས་པོ་གནང་རྗེས། དཔལ་ལྡན་ཚོགས་གཞོན་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་ཡོད། 

དེ་ཡང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གསར་འགོད་པར་གསུང་དོན། ཚོགས་གཙོའི་ངོས་ནས་ད་བར་ཨ་རིའི་གྲོས་ཚོགས་དང་གཞུང་ནས་བོད་དོན་ཐོག་ལ་གྲོས་ཆོད་བཞག་པ་དང་མཐུན་འགྱུར་ཧ་ཅང་མང་པོ་གནང་ཡོད་སྟབས། ཐུགས་རྗེ་ཆེ་ཞུས་པ་ཡིན། དེ་མིན་བཙན་བྱོལ་ནང་གི་མང་གཙོའི་སྐོར་ལ་མདོར་བསྡུས་ཞུས་པ་དང་ཕན་ཚུན་བགྲོ་གླེང་གི་རྣམ་པ་ལྟ་བུ་གནང་བ་བྱུང་ཡོད། ཁོང་ཚོ་སྔོན་མ་ནས་བོད་དོན་ཐོག་དོ་སྣང་དང་དམིགས་བསལ་གྱི་འབྲེལ་བ་ཡོད་པ་དེ་འདྲ་ཞིག་རེད་མི་འདུག  ན་ནིང་ཕྱི་ཟླ་ ༡༡ ཙམ་ནས་བྱང་ཨ་རིའི་སྐུ་ཚབ་དོན་གཅོད་ཁང་གིས་ཕན་ཚུན་གཅིག་གིས་གཅིག་ལ་རྒྱུས་ལོན་དང་། ང་ཚོའི་གྲོས་ཚོགས་སྐོར་ཁོང་རྣམ་པར་ངོ་སྤྲོད་བྱ་རྒྱུ། དེ་བཞིན་ཁོང་ཚོས་ཀྱང་ཨ་རིའི་ནང་གི་གནས་སྟངས་སྐོར་ང་ཚོར་ངོ་སྤྲོད་གནང་རྒྱུ་སོགས་ཀྱི་འཆར་གཞི་བསྒྲིགས་འདུག  

འཆར་གཞི་བསྒྲིགས་པ་ནང་བཞིན་དང་པོ་ཨ་རིའི་གྲོས་ཚོགས་འཐུས་མི་བརྒྱད་ཙམ་ཕེབས་རྒྱུའི་འཆར་གཞི་རེད་འདུག  སྲིད་དོན་ཚོགས་པ་གཙོ་བོ་མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཡོད་པའི་ཁོངས་ནས་འཐུས་མི་གསུམ་རེ་ཕེབས་ཡོད། གྲོས་ཚོགས་འཐུས་མི་ཁོང་ཚོས་ང་ཚོའི་གནས་སྟངས་ཆ་ཚང་མཁྱེན་གྱི་མེད་སྟབས། ང་ཚོའི་སྤྱི་འཐུས་ཚོགས་མི་དེ་ཚོ་བསྐོ་གཞག་གནང་གི་ཡོད་པ་ལྟ་བུ་གསུངས་བྱུང་།  དེར་ངས་གསལ་བཤད་བྱེད་སྐབས་ང་ཚོ་འདིར་འོས་བསྡུ་བྱས་ནས་འགྲོ་གི་ཡོད། ཅེས་གསལ་བཤད་ཞུས་པ་དང་སྦྲགས།  ཨ་རིའི་གཞུང་གིས་བོད་མིའི་ཆེད་དམིགས་བསལ་འབྲེལ་མཐུད་པ་ཞིག་བསྐོ་གཞག་གནང་དགོས་པའི་སྙན་ཞུ་ཞིག་ཕུལ་ཡོད། 

གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་Jim McGovern མཆོག་གིས་Tibet Act policy གྲོས་འཆར་བཏོན་གནང་བ་དེར་རྒྱབ་སྐྱོར་གནང་རོགས་ཞེས་ཡིག་ཐོག་ནས་ཕུལ་ཡོད། ང་ཚོས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་དེ་གནད་འགག་ཆེན་པོ་རྩི་ཡི་ཡོད། རྒྱ་ནག་གིས་ཚོགས་ཆེན་དེ་ལྟ་བུ་འཚོགས་རྒྱུར་དངོས་ཤུགས་བརྒྱུད་གསུམ་ནས་གནོན་ཤུགས་དང་འགོག་རྐྱེན་སྣ་ཚོགས་བཟོ་ཐབས་བྱེད་བཞིན་ཡོད།  ད་ཐེངས་ང་ཚོས་གྲོས་ཚོགས་འཐུས་མི་རྣམ་པར་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པ་བར་གྱི་གྲོས་ཆོད་བཞག་ཡོད་པའི་ཕྱག་དེབ་ཅིག་ཕུལ་བ་ཡིན།  མ་འོངས་པར་ཨ་རིའི་གྲོས་ཚོགས་འཚོགས་སྐབས་གོང་གི་གནད་དོན་ཐོག་གྲོས་ཚོགས་འཐུས་མི་རྣམ་པས་ངེས་པར་དུ་རྒྱབ་སྐྱོར་གནང་རོགས་ཞེས་བཀོད་ཡོད། ཅེས་གསུངས།