ཕྱི་ལོ་ ༢༠༡༩ ཟླ་ ༨ ཚེས་ ༡ རེས་གཟའ་ཕུར་བུ།
༄༅། །ཨ་རིའི་གྲོས་ཚོགས་འོག་མའི་མང་གཙོ་མཉམ་སྦྲེལ་ཚོགས་ཆུང་ House Democratic Partnership གི་ཚོགས་གཙོ་སྐུ་ཞབས་ཌེ་ཝིཌ་པ་རཡིས་ David Price མཆོག་དང་། ཚོགས་གཞོན་ཝན་བྷུ་ཁ་ནན་ Vern Buchanan མཆོག་གིས་དབུས། གྲོས་ཚོགས་ཀྱི་འཐུས་མི་དྲུག་དང་ལས་བྱེད། སྐུ་སྲུང་བ་བཅས་ཁྱོན་མི་གྲངས་སུམ་ཅུ་ལས་གྲུབ་པའི་སྐུ་ཚབ་ཆོགས་ཆུང་ཞིག་བཞུགས་སྒར་རྡ་རམ་ས་ལར་ཕྱི་ཟླ་ ༨ ཚེས་ ༢ རེས་གཟའ་པ་སངས་ཉིན་ཕེབས་གཏན་འཁེལ་བ་དང་། སྐུ་མགྲོན་རྣམས་ཐོག་མར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་འཚམས་གཟིགས་གནང་རྒྱུ་དང་། དེ་རྗེས་བཞུགས་གནས་གསོལ་མགྲོན་ཁང་དུ་སྐུ་ངལ་གསོ་རྒྱུ་ཡིན་འདུག
ཕྱི་ཚེས་ ༣ སྔ་དྲོ་རྡ་ས་གངས་སྐྱིད་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་བཀའ་ཤག་ཏུ་འཚམས་གཟིགས་གནང་རྒྱུ་དང་། སྲིད་སྐྱོང་དང་བཀའ་བློན་རྣམ་པ་མཇལ་འཕྲད་གནང་རྒྱུ་ཡིན་འདུག དེ་རྗེས་སྔ་དྲོ་ཆུ་ཚོད་ ༡༠ ཡོལ་ཙམ་ལ་སྐུ་མགྲོན་རྣམས་བཞུགས་སྒར་༸རྒྱལ་བའི་ཕོ་བྲང་དུ་ཕེབས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཟིམ་ཆུང་མཇལ་བཅར་ཞུ་རྒྱུ་མ་ཟད། ཉིན་གུང་ལྗགས་སྨིན་ལྷན་བཞེས་མཛད་རྒྱུ་དང་།
དེ་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གནས་གཟིགས་གྲུབ་རྗེས་ཉིན་གུང་ཆུ་ཚོད་ ༣ ཐོག་སྐུ་མགྲོན་རྣམས་བོད་མི་མང་སྤྱི་འཐུས་ལྷན་ཚོགས་སུ་ཕེབས་ནས་གྲོས་ཚོགས་ཀྱི་ཚོགས་གཙོ་སྦྲེལ་པོ་སྤྱི་འཐུས་རྒྱུན་ལས་ཀྱི་ཚོགས་མི་རྣམས་མཇལ་འཕྲད་གནང་རྗེས། གངས་སྐྱིད་ཚོགས་ཁང་གསར་པའི་ནང་དུ་བོད་མིའི་སྒྲིག་འཛུགས་ཀྱི་སྲི་ཞུ་བ་ཡོངས་ལ་གསུང་བཤད་གནང་རྒྱུ་ཡིན་འདུག གསུང་བཤད་གྲུབ་བསྟུན་བོད་ཀྱི་ཟློས་གར་ཚོགས་པ་ནས་སྐུ་མགྲོན་རྣམས་ལ་སྲོལ་རྒྱུན་གྱི་གཞས་སྣ་འཁྲབ་སྟོན་ཞུ་རྒྱུ་དང་། འཁྲབ་སྟོན་ལེགས་པར་གྲུབ་མཚམས་བཀའ་ཤག་གིས་སྐུ་མགྲོན་རྣམ་པར་དགོང་ཚིགས་འདེགས་འབུལ་རྒྱུ་ཡིན་འདུག ཕྱི་ཚེས་ ༤ ཉིན་གྷ་གལ་གནམ་ཐང་བརྒྱུད་ཕེབས་ཐོན་གནང་རྒྱུ་ཡིན་འདུག
ད་ཐེངས་ཨ་རིའི་གྲོས་ཚོགས་འཐུས་མི་དེ་ཙམ་མང་པོ་བཞུགས་སྒར་དུ་ཕེབས་པ་ནི་དེ་སྔ་ཕྱི་ལོ་ ༢༠༡༧ ལོར་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་དབུ་ཁྲིད་ད་ལྟའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པེ་ལོ་སིས་ Nancy Pelosi དབུ་ཁྲིད་པའི་གྲོས་ཚོགས་འཐུས་མའི་ཚོགས་ཆུང་ཞིག་བཞུགས་སྒར་རྡ་རམ་ལར་འཚམས་གཟིགས་གནང་རྗེས་ཐེངས་གཉིས་པ་ཆགས་ཡོད།
བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཐེངས་འདིར་ལྷན་བཅར་ཞུ་རྒྱུ་ཡིན་འདུག
གྲོས་ཚོགས་འཐུས་མིའི་མཚན་གཞུང་།
༡ ༽ David Price མང་གཙོ་ཚོགས་པ།
༢ ༽ Vern Buchanan སྤྱི་མཐུན་ཚོགས་པ།
༣ ༽ Susan Davis མང་གཙོ་ཚོགས་པ།
༤ ༽ Neal Dunn སྤྱི་མཐུན་ཚོགས་པ།
༥ ༽ John Rutherford སྤྱི་མཐུན་ཚོགས་པ།
༦ ༽ Gerry Connolly མང་གཙོ་ཚོགས་པ།
