ཕྱི་ལོ་ ༢༠༡༩ ཟླ་ ༨ ཚེས་ ༢༨ རེས་གཟའ་ལྷག་པ།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མེང་ལོར་དུ་རྒྱ་གར་རྒྱལ་ཡོངས་ཡེ་ཤུ་རྣམ་དག་ཆོས་ལུགས་ཀྱི་སློབ་གྲྭ་ལྷན་ཚོགས་ཐེངས་ ༥༢ པའི་ 52 National convention of All India Association of Catholic Schools ཚོགས་མགོན་དུ་ཆིབས་སྒྱུར་བསྐྱང་གཏན་འཁེལ་འདུག

དེ་ཡང་མཛད་འཆར་ལྟར་ན་མགོན་པོ་གང་ཉིད་མཆོག་རྒྱལ་ས་ལྡི་ལིར་ཉིན་ཤས་རིང་སྐུ་ངལ་གསོ་གནང་མཛད་གྲུབ་མཚམས་ཕྱི་ཚེས་ ༢༩ ཉིན་རྒྱལ་ས་ལྡི་ལི་ནས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་རྒྱལ་ས་སྦེང་ལོར་བརྒྱུད།  མཚོ་འགྲམ་གྲོང་ཁྱེར་མེང་ལོར་དུ་ཆིབས་སྒྱུར་གྱིས་ཁུལ་དེར་རྟེན་གཞི་བྱས་པའི་རྒྱ་གར་རྒྱལ་ཡོངས་ཡེ་ཤུ་རྣམ་དག་ཆོས་ལུགས་ཀྱི་སློབ་གྲྭ་ལྷན་ཚོགས་ཐེངས་ ༥༢ མཛད་སྒོའི་ཚོགས་མགོན་དུ་ Father Muller Convention Centre ཞེས་པའི་ཚོགས་ཁང་ཆེན་མོའི་ནང་ཆིབས་སྒྱུར་གྱིས་བཀའ་སློབ་སྩལ་གནང་མཛད་རྒྱུ་དང་། སྐབས་དེར་སློབ་གྲྭ་གཉིས་སྟོང་ཙམ་གྱི་སློབ་སྤྱི་རྣམས་ཚོགས་བཅར་གནང་འཆར་འདུག 
གཞན་ཡང་མེང་ལོར་གྲོང་ཁྱེར་དུ་མཐོ་སློབ་འགྲིམས་བཞིན་པའི་བོད་པའི་སློབ་ཕྲུག་རྣམས་ལ་ Hotel Gateway ཞེས་པའི་མགྲོན་ཁང་དུ་བཀའ་སློབ་བསྩལ་གནང་མཛད་རྒྱུ་ཡིན་འདུག ཁུལ་དེར་བོད་རིགས་སློབ་མ་གྲངས་ ༢༠༠ ཙམ་ཡོད་པ་རྣམས་གཙོ་བོ་སྨན་ཞབས་སློབ་སྦྱོང་གནང་མུས་རེད་འདུག   མཛད་འཆར་གྲུབ་བསྟུན་ཕྱི་ཚེས་ ༣༡ སྦེང་ལོར་བརྒྱུད་རྒྱ་གར་གྱི་རྒྱལ་ས་ལྡི་ལིར་ཞབས་སོར་འཁོད་རྒྱུ་དང་། དེ་ནས་ཕྱི་ཟླ་ ༩ ཚེས་ ༡ ཉིན་བཞུགས་སྒར་རྡ་རམ་ས་ལར་ཞབས་སོར་འཁོད་རྒྱུ་ཡིན་འདུག
དེ་ཡང་ཕྱི་ཟླ་ ༩ ཚེས་ ༤ ནས་ ༦ བར་ཉིན་གྲངས་གསུམ་རིང་ལྷོ་ཤར་ཨེ་ཤེ་ཡའི་དད་ལྡན་ཆོས་ཞུ་བ་རྣམས་ལ་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་གསུང་ཆོས་བསྩལ་གནང་མཛད་རྒྱུ་ཡིན་འདུག་པ་བཅས། །