ཕྱི་ལོ་ ༢༠༡༩ ཟླ་ ༨ ཚེས་ ༢༦ རེས་གཟའ་ཟླ་བ། 

༄༅། །ཕྱི་ལོ་ ༢༠༡༩ ཟླ་ ༨ ཚེས་ ༢༤ ཉིན་རྒྱ་གར་གྱི་དཔལ་འབྱོར་བློན་ཆེན་ཟུར་པ་དང་ཁྲིམས་རྩོད་པ་སྐུ་ཞབས་ཨ་རུན་ཇེཊ་ལི་ Arun Jaitley མཆོག་ནད་གཞིའི་རྐྱེན་པས་དགུང་ལོ་ ༦༦ ཐོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨིམ་སི་AIIMS སྨན་ཁང་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་པར། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྐུ་ཞབས་ཨ་རུན་ཇེཊ་ལི་མཆོག་གི་སྐུ་ཟླ་སང་གྷི་ཏ་ཇེཊ་ལི་ Mrs. Sangeeta Jaitley ལགས་ལ་ཐུགས་གསོའི་གསུང་འཕྲིན་ཞིག་བསྩལ་བའི་ནང་འཁོད་དོན།

ཁྱད་དུ་འཕགས་པའི་ཁྲིམས་རྩོད་པ་དང་མི་མང་གི་སྲི་ཞུ་བ་ཞིག་ཡིན་པའི་ཆ་ནས་སྐུ་ཞབས་ཨ་རུན་ཇེཊ་ལི་ལགས་ཀྱིས་རྒྱ་གར་མི་མང་གི་ཆེད་དུ་བློས་བཏང་གིས་སྲི་ཞུ་བསྒྲུབས་ཡོད་པས། ངོས་ཀྱིས་ཁོང་གི་མཛད་རྗེས་དེར་རྗེས་སུ་ཡི་རངས་དང་བསྔགས་བརྗོད་ཞུ་རྒྱུ་ཡིན།  སེམས་སྡུག་དང་དུས་ཚོད་ཁག་པོ་འདིའི་སྐབས་སུ་ཁྱེད་རང་གིས་གཙོས་ནང་མི་བཅས་ངོས་ཀྱིས་ཡིད་ལ་བཅངས་ཡོད། ཅེས་འཁོད། །