ཕྱི་ལོ་ ༢༠༡༩ ཟླ་ ༨ ཚེས་ ༡༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༨ ཚེས་ ༡༩ རེས་གཟའ་ཟླ་བའི་ཉིན་བཞུགས་སྒར་རྡ་ས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉེ་འགྲམ་དུ་རྟེན་གཞི་བྱས་པའི་དེབ་དར་གསོལ་མགྲོན་ཁང་ Hotel Devdar Resort དུ་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པ་ ༼ འབྱུང་འགྱུར་བོད་ཀྱི་མདུན་ལམ་ ༽ ཞེས་པའི་མཇུག་སྡོམ་མཛད་སྒོ་ལེགས་གྲུབ་བྱུང་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡།༡༥ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས། ཨརྱ་ཚེ་དབང་རྒྱལ་པོ་ལགས། ཕྱི་དྲིལ་དྲུང་ཆེ་ལས་འཕར་འཆི་མེད་ཚེ་དབྱངས་ལགས། རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་འདྲ་ཁག་ ༡༣ ནས་ཚོགས་བཅར་བ་བོད་མི་གཞོན་སྐྱེས་གྲངས་བརྒྱ་དང་གཏམ་བཤད་གནང་མཁན་གྲངས་ཉི་ཤུ། དེ་བཞིན་ཕྱི་ནང་གསར་འགོད་པ་བཅས་ཁྱོན་མི་གྲངས་ ༡༥༠ ཙམ་མཉམ་འཛོམས་ཀྱིས་ཐོག་མར་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་འཚམས་འདྲི་དང་སྦྲགས་གསུང་དོན། ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པ་དེ་བཞིན་ཕྱི་ཚེས་ ༡༦ ཉིན་འགོ་འཛུགས་ཀྱི་དེ་རིང་མཇུག་སྒྲིལ་གྱི་ཡོད། འདིར་ཕེབས་པའི་ཚོགས་བཅར་བ་རྣམས་བོད་ཀྱི་རྩ་དོན་སླད་འགན་འཁུར་ཡོད་པའི་ཐོག་ནས་ལས་རིགས་འདྲ་མིན་བྱེད་མཁན་ཤ་སྟག་རེད། མ་འངོས་པར་དེ་དེ་བཞིན་གྱི་ལས་འགུལ་རྣམས་ཚགས་ཚུད་ཡོང་བའི་རེ་བ་ཡོད།
ལས་རིགས་ཅི་འདྲ་ཞིག་བྱེད་སྐབས་གཙོ་ཆེ་ཤོས་ནི། རྒྱབ་ལྗོངས་ཀྱི་གནས་ཚུལ་ཤེས་དགོས་པ་སྤྱི་དང་། ལྷག་པར་བོད་རྒྱལ་ཁབ་དང་མི་རིགས་སླད་ཕྱག་ལས་གནང་མཁན་ཞིག་ཡིན་སྟབས་བོད་ཀྱི་རྒྱལ་རབས་དང་ལོ་རྒྱུས་ངེས་པར་ཤེས་དགོས། བོད་རྒྱའི་དཀའ་རྙོག་སེལ་སླད་གཉིས་སྨན་དབུ་མའི་ལམ་གྱི་སྲིད་བྱུས་ཐོག་གོ་རྟོགས་དགོས་ཀྱི་ཡོད།
ལོ་རྒྱུས་ཐོག་བོད་དེ་རང་དབང་རང་བཙན་གཙང་མ་ཞིག་ཡིན་པའི་ཞིབ་ཕྲ་ཤེས་པའི་ཐོག་ནས་མ་འོངས་པར་དེའི་ཐད་གང་བྱེད་དགོས་པའི་ཐོག་བསམ་ཤེས་གནང་དགོས། ད་ཆ་རྒྱ་ནག་གཞུང་གི་བོད་ཀྱི་རྒྱལ་རབས་དང་ལོ་རྒྱུས་ཐད་འཁྱོག་བཤད་བྱེད་བཞིན་ཡོད་པ་དེར་ང་ཚོས་ངོས་ནས་ཇི་ལྟར་ཁ་གཏད་བཅག་ཐུབ་པ་དགོས་པ་དང་ རྒྱ་མི་རིགས་དང་ལྷན་དུ་འབྲེལ་བ་བྱེད་དགོས་རྒྱུ་གལ་ཆེན་པོ་རེད། བྱེས་འཁོད་བོད་མི་རྣམས་གཞིས་བཞུགས་བོད་མི་ཚོའི་མགྲིན་ཚབ་ཞིག་ཡིན་པའི་ཐོག་ཧུར་སྐྱེད་གནང་དགོས། བོད་ཀྱི་ཐུན་མིན་སྐད་ཡིག་རྣམས་གལ་ཆེན་པོ་ཡིན་པར་བརྟེན་ངེས་པར་ཤེས་དགོས། བཙན་བྱོལ་བོད་མིའི་སྒྲིག་འཛུགས་ཀྱི་ལས་འགུལ་འདྲ་མིན་སྤེལ་དང་སྤེལ་མུས་ཡིན། འོན་ཀྱང་རང་ཉིད་ངོས་ནས་བོད་ཀྱི་རྩ་དོན་སླད་ལས་དོན་གང་བྱེད་ཕྱོགས་མིན་ཐད་ངེས་པར་བསམ་བློ་ནན་པོ་གཏང་དགོས། མཐར་ཕྱི་དྲིལ་ལས་བྱེད་ཡོངས་ལ་དེ་རིང་གི་ཚོགས་ཆེན་ཚགས་ཚུད་ཡོང་བར་བརྟེན་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
དེ་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ཚོགས་བཅར་བ་རྣམས་ནས་དགོངས་འཆར་ཕུལ་བ་རྣམས་མ་འོངས་པ་དེའ་ཐོག་ལག་བསྟར་གནང་རྒྱུ་ཡིན། ལྔ་དང་ལྔ་བཅུའི་ཚོགས་ཆེན་འདིར་མ་ཕེབས་གོང་ཚོགས་ཆུང་ནས་ཚོགས་ཆེན་ཐོག་ཚོགས་བཅར་བ་རྣམས་ལ་ངོ་སྤྲོད་གནང་ཡོད། དེ་ངེས་པར་ལྟ་ཀློག་སྦྱང་ཤེས་དགོས་པ་ཧ་ཅང་གལ་ཆེན་པོ་རེད། ཚོགས་ཆེན་འདིར་གཏམ་བཤད་གནང་མཁན་ཆེད་མངགས་བོད་རིགས་མགྲོན་འབོད་ཞུས་ཡོད།
ཐེངས་འདིའི་བརྗོད་གཞི་ནི། འབྱུང་འགྱུར་བོད་ཀྱི་མདུན་ལམ་ཡིན་པར་བརྟེན་བོད་ཀྱི་རྩ་དོན་སླད་ལས་འགུལ་ཇི་འདྲ་སྤེལ་དགོས་སྐོར་སོགས་ཡིན། རྒྱ་ནག་གཞུང་གིས་གཞིས་བཞུགས་བོད་མི་རྣམས་གདུག་རྩུབ་འོག་དཀའ་སྡུག་མྱོང་བཞིན་ཡོད་ཀྱང་། སྙིང་སྟོབས་ནམ་ཡང་མ་ཞུམ་པར་བོད་དོན་ལས་འགུལ་ཇེ་ཆེར་སྤེལ་བཞིན་ཡོད། དེར་བརྟེན་བཙན་བྱོལ་དུ་ཡོད་པའི་བོད་མི་ཚོས་སེམས་ཤུགས་ནམ་ཡང་མ་ཆགས་པར་ལས་དོན་མཇུག་སྐྱོང་དང་། དཀའ་ངལ་རྣམས་གདོང་ལེན་བྱེད་དགོས། བོད་པའི་གཞོན་སྐྱེས་རྣམས་བོད་ཀྱི་རྩ་དོན་སླད་ལས་འགན་ཆེན་པོ་ཞིག་ཡོད། ཅེས་སོགས་ཀྱི་གསུང་བཤད་གནང་རྗེས་ཚོགས་ཆེན་དུ་གཏམ་བཤད་གནང་མཁན་རྣམས་ལ་ཐུགས་རྗེ་ཆེ་ཞུ་དང་སྦྲགས་མཇལ་དར་རེ་ཕུལ་འདུག
མཐར་ཕྱི་དྲིལ་དྲུང་ཆེ་ལས་འཕར་འཆི་མེད་ཚེ་དབྱངས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཇུག་སྡོམ་མཛད་སྒོ་ལེགས་པར་གྲུབ་པ་བཅས། །
