ཕྱི་ལོ་ ༢༠༡༩ ཟླ་ ༨ ཚེས་ ༡༧ རེས་གཟའ་སྤེན་པ།
༄༅། །ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པའི་ཚོགས་ཐུན་གསུམ་པ་དེ་བཞིན་ཕྱི་ལོ་ ༢༠༡༩ ཟླ་ ༨ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༩ ཐོག་བཞུགས་སྒར་རྡ་ས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉེ་འགྲམ་དུ་རྟེན་གཞི་བྱས་པའི་དེ་བི་དར་གསོལ་མགྲོན་ཁང་ Hotel Devdar Resort དུ་ཚོགས་ཡོད་པ་དང་། ཚོགས་འདུ་དངོས་གཞིའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་དབུས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས། ཕྱི་དྲིལ་དྲུང་ཆེ་ལས་འཕར་འཆི་མེད་ཚེ་དབྱངས་ལགས། འཆར་འགོད་ལྷན་ཁང་གི་སྤྱི་ཁྱབ་འཆར་འགོད་པ་དཀོན་མཆོག་བརྩོན་འགྲུས་ལགས། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་རྡོར་ལགས་བཅས་ཕེབས་འདུག
གཞན་ཡང་རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་འདྲ་མིན་ནས་ཚོགས་བཅར་བ་བོད་མི་གཞོན་སྐྱེས་གྲངས་བརྒྱ་དང་གཏམ་བཤད་གནང་མཁན་གྲངས་ཉི་ཤུ་བཅས་མཉམ་ཞུགས་གནང་ཡོད་པ་རེད། དེ་ཡང་ཕྱི་དྲིལ་དྲུང་ལས་བསྟན་འཛིན་འཆི་མེད་ལགས་ཀྱིས་གཙོ་སྐྱོང་འོག་ཚོགས་ཐུན་གསུམ་པའི་ཐོག་མར་ཕྱི་དྲིལ་དྲུང་ལས་འཕྲིན་ལས་ཆོས་སྐྱིད་ལགས་ཀྱིས། རྒྱ་ནག་དམར་ཤོག་གཞུང་གིས་བོད་ས་ཡོངས་རྫོགས་དབང་སྒྱུར་མ་བྱས་གོང་བོད་ནི་རང་བཙན་གཙང་མའི་རྒྱལ་ཁབ་ཅིག་ཡིན་ལུགས་སྐོར་བོད་དང་ཁྱིམ་མཚེས་རྒྱལ་ཁབ་ཁག་གི་དབར་དབང་ཆ་འདྲ་མཉམ་ཐོག་ཆིངས་ཡིག་བཞག་ཡོད་པ་སོགས་བོད་ཀྱི་ལོ་རྒྱུས་ཀྱི་གནས་བབས་སྐོར་གསུངས།
དེ་རྗེས་བཀའ་ཡིག་ཟུང་འབྲེལ་དྲུང་ཆེ་སྐལ་བཟང་ཚེ་རིང་ལགས་ནས་ཕྱི་ལོ་ ༡༩༧༩ ལོར་རྒྱ་ནག་གི་གཙོ་འཛིན་ཏེང་ཞའོ་ཕིང་གིས་རང་བཙན་མ་གཏོགས་གནད་དོན་གཞན་ཚང་མ་གྲོས་མོལ་བརྒྱུད་ཐག་གཅོད་བྱེད་ཆོག་ཅེས་གྲོས་འགོ་བཏོན་པ་ནས་བཟུང་ཕྱི་ལོ་ ༢༠༡༠ བར་བོད་རྒྱ་གྲོས་མོལ་ཐེངས་དགུ་བྱུང་བའི་རྒྱབ་ལྗོངས་ཀྱི་ལོ་རྒྱུས་ངོ་སྤྲོད་དང་བོད་རྒྱ་ཞི་མོལ་ལས་དོན་ཚོགས་ཆུང་ཕྱི་ལོ་ ༡༩༩༨ ལོར་འགོ་བཙུགས་ཀྱིས་ད་བར་ཚོགས་འདུ་ཐེངས་ ༣༡ ཚོགས་ཡོད་པའི་སྐོར་གསུང་བཤད་གནང་། དེ་རྗེས་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས་ཀྱིས་བོད་ཀྱི་གནད་དོན་གསལ་བར་དབུ་མའི་ལམ་གྱི་སྲིད་བྱུས་ཡག་ཤོས་ཡིན་པ་མ་ཟད། རྒྱ་རིགས་ཁྲིམས་རྩོད་པ་དང་། ཤེས་ཡོན་པ། རྩོམ་པ་པོ་སོགས་ཀྱིས་ཀྱང་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཆེན་པོ་གནང་གི་ཡོད་པའི་སྐོར་གསུང་།
དེ་བཞིན་བོད་རྒྱ་གཉིས་དབར་གྲོས་མོལ་བྱུང་བར་བརྟེན་གྲུབ་འབྲས་རླབས་ཆེན་བྱུང་ཡོད་པའི་སྐོར་དང་། བོད་མི་ཚོ་ངོས་ནས་རྒྱ་ནག་གཞུང་དང་མི་མང་རྣམས་ལ་བཀའ་མོལ་གནང་རྒྱུ་ཧ་ཅང་གལ་ཆེན་པོ་རེད་ཅེས་དང་། གཞན་ཡང་བོད་མི་ཚོས་རྒྱ་ནག་གི་གནས་སྟངས་དང་བོད་རང་གི་གནས་སྟངས་སྐོར་གསལ་པོ་རྟོགས་དགོས་པ་དང་། བོད་མིའི་འཐབ་རྩོད་ཀྱི་ནུས་པ་དང་ཆིག་སྒྲིལ་གྱི་སྟོབས་ཤུགས་གོང་འཕེལ་དུ་གཏོང་རྒྱུ། རྒྱལ་སྤྱིའི་རྒྱབ་སྐྱོར་ཐོབ་ཐབས་དང་རྒྱ་ནག་གི་གནད་ཡོད་མི་སྣ་ཚོ་དང་ལྷན་འབྲེལ་བ་བྱེད་རྒྱུ་ཧ་ཅང་གལ་ཆེན་པོ་ཡིན་པ་སོགས་ཀྱི་སྐོར་གསུངས་པ་དང་འབྲེལ། དྲི་བ་དྲིས་ལན་གནང་།
སྐབས་དེར་གསོལ་ཇའི་བར་གསེང་སྐར་མ་ ༡༥ རིང་བཏང་རྗེས་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་དྲུང་གཞོན་འབྲུག་བསྟན་སྐྱིད་ལགས་ཀྱིས་གཙོ་སྐྱོང་འོག་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་ཟུར་པ་བཀྲ་ཤིས་ལམ་བཟང་ལགས་ཀྱིས་བོད་བཙན་པོའི་སྐབས་ཀྱི་ས་ཁྱོན་དང་། མི་འབོར། དམག་ཤུགས་སོགས་ཀྱི་སྐོར་གསུང་བ་མ་ཟད། གོ་སྐབས་དམ་འཛིན་བྱས་ཏེ་བོད་མིའི་འཐབ་རྩོད་རྒྱུན་སྐྱོང་བྱེད་དགོས་པའི་སྐོར་གསུངས། གཞན་ཡང་བོད་ཀྱི་བུད་མེད་ལྷན་ཚོགས་ཀྱི་ཉམས་ཞིབ་པ་བསྟན་འཛིན་ཆོས་དབྱངས་ལགས་ཀྱིས་བོད་ཀྱི་བུད་མེད་ཚོས་བོད་ཀྱི་རྩ་དོན་ཆེད་བྱས་རྗེས་རླབས་ཆེན་བཞག་ཡོད་པའི་སྐོར་གསུངས།
དེ་རྗེས་ཨ་རིའི་པེན་སེལ་ཝ་ནི་ཡ་མངའ་སྡེའི་མཐོ་སློབ་ཏུ་དངོས་ཁམས་རིག་པའི་ཐོག་འབུམ་རམས་པའི་སློབ་སྦྱོང་གནང་བཞིན་པ་འཇམ་དབྱངས་ཕུན་ཚོགས་ལགས་ནས་སྒྱུ་རྩལ་གྱི་ལམ་ནས་བོད་དོན་ལས་འགུལ་ཇི་ལྟར་སྤེལ་དགོས་པའི་སྐོར་གསུངས། ཕྱོགས་མཚུངས་ཀུན་བཟང་སྐལ་ལྡན་ལགས་ཀྱིས་བོད་རིགས་འདྲེས་མའི་གནད་དོན་སྐོར་གསུང་བཤད་གནང་། དེ་རྗེས་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་ཀྱིས། བཙན་བྱོལ་བོད་མི་ཚོས་བོད་ནང་གི་ཛ་དྲག་གི་གནས་སྟངས་ལ་རྒྱུས་ལོན་བྱས་ཏེ་དངོས་ཡོད་གནས་ཚུལ་སྤྱི་ཚོགས་གསར་འགྱུར་བརྒྱུད་ལམ་བརྒྱུད་རྒྱལ་སྤྱིའི་ཚོགས་སྡེ་ཁག་ལ་གཏོང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་བ་དང་འབྲེལ། དྲི་བ་དྲིས་ལན་གནང་སྟེ་ཚོགས་ཐུན་བཞི་པ་གྲོལ་ཡོད་པ་བཅས། །
