ཕྱི་ལོ་ ༢༠༡༩ ཟླ་ ༨ ཚེས་ ༧ རེས་གཟའ་ལྷག་པ། 

༄༅། །རྒྱ་གར་གྱི་ཕྱི་སྲིད་བློན་ཆེན་ཟུར་པ་ལྕམ་སྐུ་སུཤ་མ་སྭ་རཇ་ Sushma Swaraj མཆོག་ཕྱི་ལོ་ ༢༠༡༩ ཟླ་ ༨ ཚེས་ ༦ ཉིན་གྱི་དགོང་དྲོ་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨེམ་སི་སྨན་ཁང་དུ་གློ་བུར་དུ་སྙིང་ཁྲག་འགགས་པའི་རྐྱེན་གྱིས་དགུང་གྲངས་ ༦༧ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དམ་པ་དེ་ཉིད་ཀྱི་སྐུ་ཟླ་སྐུ་ཞབས་ཀོ་ཤལ་སྭ་རཇ་ Kaushal Swaraj ལགས་དང་ནང་མི་བཅས་ཀྱི་མཚན་ཐོག་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། དམ་པ་དེ་ཉིད་ཀྱིས་བོད་དོན་ཆེད་རྒྱ་གར་གྱི་གྲོས་ཚོགས་ནང་གླེང་སློང་ཤུགས་ཆེ་གནང་མྱོང་ཡོད་པ་མ་ཟད། ཕྱི་ལོ་ ༢༠༡༧ ལོར་རྒྱ་གར་གྱི་གྲོས་ཚོགས་གོང་མའི་ནང་གསུང་བཤད་གནང་སྐབས་བོད་ནང་གི་བོད་མི་ཚོས་གཉའ་གནོན་འོག་མནར་གཅོད་མྱོང་བཞིན་ཡོད་པས། རྒྱ་གར་གྱིས་རྒྱ་ནག་གི་ཕྱོགས་སུ་ལངས་ཏེ་བོད་དོན་གླེང་སློང་མ་བྱས་པར་ལྟད་མོ་བལྟས་ནས་མི་སྡོད་ཅེས་ནན་ཏན་གྱིས་གསུངས་ཡོད།

དམ་པ་དེ་ཉིད་ནི་བྱམས་བརྩེ་ལྡན་པའི་ཆབ་སྲིད་ཀྱི་དབུ་ཁྲིད་མི་སྣ་གྲགས་ཅན་ཞིག་ཡིན་པས་རྒྱ་གར་མི་མང་གིས་དམ་པ་དེ་ཉིད་ལ་རྗེས་སུ་ཡི་རངས་དང་དགའ་མོས་གནང་གི་ཡོད། དམ་པ་དེ་ཉིད་ཀྱི་གཟེངས་སུ་ཐོན་པའི་བྱས་རྗེས་མུ་མཐུད་གནས་རྒྱུ་ཡིན་པ་མ་ཟད། འབྱུང་འགྱུར་མི་རབས་རྗེས་མ་ཚོ་ལའང་སེམས་ཤུགས་བསྐྱེད་ངེས། སྡུག་བསྔལ་གྱིས་མནར་བའི་སྐབས་འདིར། འཛམ་གླིང་གི་ས་ཕྱོགས་གང་སར་གནས་སྡོད་བྱེད་བཞིན་པའི་བོད་མི་ཚོས་སྐུ་ཉིད་ཀྱིས་གཙོས་ནང་མི་ཡོངས་ལ་གདུང་སེམས་མཉམ་སྐྱེ་ཞུ་བཞིན་ཡོད། ཅེས་འཁོད་ཡོད། །