ཕྱི་ལོ་ ༢༠༡༩ ཟླ་ ༨ ཚེས་ ༣༠ རེས་གཟའ་པ་སངས།

༄༅། །ཕྱི་ལོ་ ༢༠༡༩ ཟླ་ ༨ ཚེས་ ༢༩ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ཨ་རིའི་མངའ་སྡེ་མེ་རི་ལེན་ཌ་ Maryland ནང་གི་བྷལ་ཌི་མོར་ Baltimore གྲོང་ཁྱེར་དུ་རྟེན་གཞི་བྱས་པའི་ཇོན་ཧན་ཧོཔ་ཀིན་ Johns Hopkins གཙུག་ལག་སློབ་གཉེར་ཁང་དུ་ཆེད་མངགས་ཕེབས་ཏེ། ཉམས་ཞིབ་པ་དང་སློབ་དཔོན་སོགས་མི་སྣ་མང་དག་ཅིག་དང་ཐུགས་འཕྲད་གནང་སྟེ་བོད་པའི་སྤྱི་ཚོགས་ཀྱི་འཕྲོད་བསྟེན་དཀའ་ངལ་སྐོར་གོ་བསྡུར་སྦྱང་བཤད་གནང་འདུག  

སྐབས་དེར་ཇོན་ཧན་ཧོཔ་ཀིན་གཙུག་ལག་སློབ་གཉེར་ཁང་གི་དགེ་རྒན་ཆེན་མོ་རི་ཆར་ཌི་ Dr. Richard Chaisson ལགས་ཀྱིས། ང་ཚོ་ངོས་ནས་བཙན་བྱོལ་བོད་མིའི་ཚོགས་པ་ཁག་དང་ལྷན་འདས་པའི་ལོ་ངོ་ ༡༠ རིང་ལས་ཀ་བྱས་པ་བརྒྱུད་ང་ཚོར་ཧ་ཅང་དགའ་འོས་པའི་ཉམས་མྱོང་ཐོབ་བྱུང་། དེ་སྔ་སྨན་པ་ཚེ་བརྟན་ལགས་ཇོན་ཧན་ཧོཔ་ཀིན་གཙུག་ལག་སློབ་གཉེར་ཁང་དུ་ཕེབས་ཏེ་སྙིང་ནད་ཆེད་ལས་སྨན་པ་ཚོ་དང་ཐུག་འཕྲད་སྐབས། སྙིང་ནད་ཆེད་ལས་སྨན་པ་ཚོས་སྨན་པ་ཚེ་བརྟན་ལགས་ལ་བོད་མིའི་སྤྱི་ཚོགས་ཁྲོད་དཀའ་ངལ་གཙོ་བོ་ག་རེ་ཡིན་མིན་ཐད་བཀའ་འདྲི་ཞུས་འདུག    སྐབས་དེ་དུས་སྙིང་ནད་ཆེད་ལས་སྨན་པ་ཚོས་བོད་མིའི་སྤྱི་ཚོགས་ཁྲོད་དཀའ་ངལ་གཙོ་བོ་ནི་གློ་ནད་ཀྲི་སྦིའི་ནད་གཞི་ཡིན་པ་ཤེས་རྟོགས་བྱུང་འདུག་ཅེས་དང་།  

དེ་ཡང་བཀའ་བློན་མཆོག་གིས་ཨ་རི་ཇོན་ཧོབ་ཀིན་སི་མཐོ་སློབ་ཀྱི་ཀྲི་བྷི་ཉམས་ཞིབ་སྡེ་ཚན་གྱི་ངེས་སྟོན་པ་ Dr. Richard Chaisson ལགས་དང་། རྒྱལ་སྤྱིའི་འཕྲོད་བསྟེན་སྡེ་ཚན་སོགས་ཀྱི་མི་སྣ་གཙོ་གྲས་ཁག་དང་ཐུག་འཕྲད་ཀྱིས་བོད་པའི་སྤྱི་ཚོགས་ནང་གློ་ནད་ཀྲི་སྦིའི་ནད་གཞི་དང་། སེམས་ནད་རིགས་འདྲ་མིན། དེ་བཞིན་སྨན་བཅོས་དང་འབྲེལ་བའི་མཐུན་རྐྱེན་བཅས་ཀྱི་དཀའ་ངལ་ཁག་སེལ་བའི་ཐབས་ལམ་དང་རོགས་རམ་གནང་སྐྱོང་ཡོང་བའི་འབོད་སྐུལ་ཞུས་གནང་ཡོད། 

ཇོ་ཧན་ཧོཔ་ཀིན་གཙུག་ལག་སློབ་གཉེར་ཁང་གི་འཚམས་གཟིགས་ལས་རིམ་དེ་ཉིད་ཉམས་ཞིབ་ཁང་དེའི་ཉམས་ཞིབ་པ་སྨན་པ་དཀོན་མཆོག་རྡོ་རྗེ་ལགས་དང་། ཇོན་ཧོབ་ཀིན་སི་མཐོ་སློབ་ཀྱི་ཊི་བྷི་ཉམས་ཞིབ་སྡེ་ཚན་གྱི་ངེས་སྟོན་པ། དེ་བཞིན་བྱང་ཨ་རིའི་སྐུ་ཚབ་དོན་ཁང་བཅས་ནས་མཐུན་འགྱུར་ཞུས་པ་ཞིག་ཡིན་འདུག་པ་བཅས། །