ཕྱི་ལོ་ ༢༠༡༩ ཟླ་ ༨ ཚེས་ ༢༩ རེས་གཟའ་ཕུར་བུ།

༄༅། །འདི་གར་བྱང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ནིའུ་ཡོག་ས་ཁུལ་དུ་གཞུང་འབྲེལ་འཚམས་གཟིགས་སུ་ཕེབས་གནང་བ་དང་། ས་གནས་དུ་ཡོད་པའི་བོད་རིགས་ཚོགས་སྐྱིད་ཁག་གི་འགན་འཁུར་བ་རྣམ་པ་དང་ལྷན་ཐུག་འཕྲད་དང་དམིགས་གསལ་གཏོང་ཕོད་ཅན་གྱི་ཨ་སྒོར་ཁྲི་དགུ་ཞལ་འདེབས་གནང་མཁན་མི་ཉག་བསྟན་འཛིན་དར་རྒྱས་ལགས་ལ་ཐུགས་རྗེ་ཆེ་ཞུས་གནང་སོང་།

དེ་ཡང་བཀའ་བློན་མཆོག་ཟླ་འདིའི་ཚེས་ ༢༢ ཉིན་ནིའུ་ཡོག་ཉེ་འཁོར་གྱི་ནི་ཝར་ Newark གནམ་ཐང་དུ་ཕེབས་འབྱོར་སྐབས་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་དབུས་པའི་ཚོགས་པ་གཞན་གྱི་འགན་འཁུར་བ་རྣམ་པས་ཕེབས་བསུའི་སྣེ་ལེན་གཟབ་རྒྱས་ཞུས་སོང་། ཉིན་དེའི་དགོང་མོར་བཀའ་བློན་མཆོག་གིས་ས་གནས་ནིའུ་ཡོག་ཏུ་ཡོད་པའི་དངས་བླང་སྨན་ཞབས་པའི་ཚོགས་པ་  Tibetan Nurses Association NY/ NJ དང་ཐུག་འཕྲད་ཀྱིས་ཚོགས་པའི་ལས་དོན་བྱེད་ཕྱོགས་སོགས་ཀྱི་སྐོར་ལ་བཀའ་མོལ་གནང་སོང་། དེ་བཞིན་བཀའ་བློན་མཆོག་བོད་ཀྱི་ཐེབས་རྩའི་ལས་ཁུངས་སུ་འཚམས་གཟིགས་གནང་སྟེ་ལས་ཁུངས་ཀྱི་ལས་བྱེད་ལྷན་ཐུག་འཕྲད་དང་ཐེབས་རྩའི་ལས་དོན་བྱེད་ཕྱོགས་སོགས་ལ་བཀའ་བསྡུར་གནང་།

སྐུ་ཚབ་དོན་ཁང་ནས་ས་གནས་བོད་རིགས་སྤྱི་མཐུན་ཚོགས་པར་བཀའ་མངགས་བཞིན།  ས་གནས་ཀྱི་ཚོགས་སྐྱིད་ཁག་གི་ཚོགས་གཙོ་དང་འགན་འཁུར་བ་ལྷན་རྒྱས་འདུ་འཛོམས་ཐོག་བཀའ་བློན་མཆོག་གིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་དོན་གནང་ཕྱོགས་དང་གནས་སྟངས་སོགས་ཀྱི་སྐོར་གསུང་བཤད་གནང་ཡོད་པ་མ་ཟད། དྲི་བ་དྲི་ལན་སྐབས་འཕྲོད་བསྟེན་དང་འབྲེལ་ལས་དོན་སྤྱི་དང་དེ་མིན་བོད་སྨན་གྱི་གནས་བབ། ཕྱི་རྒྱལ་དང་རྒྱ་གར་ནང་ཡོད་པའི་བོད་རིགས་གཞོན་སྐྱེས་སྨྱོ་རྫས་ལང་ཤོར་ལས་སྐྱོབ་ཐབས། ཕྱི་རྒྱལ་ཡུལ་གྲུ་ཁག་ནང་བོད་ཀྱི་གསོ་བ་རིག་པ་ཡར་རྒྱས་གཏོང་ཐབས་སོགས་ཀྱི་སྐོར་ལ་བཀའ་མོལ་ལྷུག་པོ་བྱུང་ཡོད། གསུང་བཤད་དང་དྲི་བ་དྲི་ལན་གྱི་ལས་རིམ་ཐད་ཀར་རྒྱང་སྲིང་གནང་བས་ས་གནས་མི་མང་དང་ཕྱོགས་མཐའ་ཁག་གི་མི་མང་གང་མང་ནས་གཟིགས་ཉན་ཐུབ་ཡོད།

འདུ་འཛོམས་དེའི་སྟེང་བོད་མིའི་སྒྲིག་འཛུགས་ཀྱི་འཕྲོད་བསྟེན་ཁྱབ་ཁོངས་བོད་རིགས་ཉམ་ཐག་རྒས་གཅོང་རིགས་ལ་སྨན་བཅོས་མཐུན་འགྱུར་ཆེད་ཨ་སྒོར་ ༩༠༠༠༠།༠༠ ༼ དགུ་ཁྲི་ཐམ་པ། ༽ཞལ་འདེབས་གནང་མཁན་མི་ཉག་བསྟན་འཛིན་དབང་རྒྱལ་ལགས་ཆེད་མངགས་མགྲོན་འབོད་ཀྱིས་ཁོང་གིས་ད་བར་གསོག་འཇོག་ཡོད་ཚད་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ལ་ཕུལ་བ་ནི། ཚང་མས་ཁ་མིག་ཡར་ལྟ་བྱེད་དགོས་སའི་མིག་དཔེ་བཟང་པོ་ཞིག་ཡིན་པ་དང་། འཕྲོད་བསྟེན་ལས་ཁུངས་ནས་རང་རིགས་ལ་ལྷག་བསམ་དཀར་བའི་མི་ཉག་བསྟན་འཛིན་དབང་རྒྱལ་ལགས་ཀྱི་གཏོང་ཕོད་ཅན་གྱི་བྱ་བར་ཡི་རངས་བསྔགས་བརྗོད་དང་ཐུགས་རྗེ་ཆེ་ཞུས་གནང་སོང་། 

དེ་རྗེས་བཀའ་བློན་མཆོག་ཝ་ཤིང་ཀྲོན་དུ་ཕེབས་ནས་མུ་མཐུད་ཨ་རིའི་གཞུང་འབྲེལ་མི་སྣ་མཇལ་འཕྲད་དང་འཕྲོད་བསྟེན་ལས་གཞི་དང་འབྲེལ་བའི་འབྲེལ་ཡོད་སློབ་ཆེན་ཁག་སོགས་ལ་ཕེབས་རྒྱུ་ཡིན་འདུག་པ་བཅས། །