འཕྲོད་བསྟེན་བཀའ་བློན་མཆོག་བྱང་ཨ་རིར་གཞུང་འབྲེལ་འཚམས་གཟིགས་གནང་བཞིན་པ།

གསར་ལས་ཁང་གི་གསར་འགོད་པས།

༢༠༡༩-༠༨-༢༨

༢༠༡༩ ཟླ་ ༨ ཚེས་ ༢༨ རེས་གཟའ་ལྷག་པ།

༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་ ༢༠༡༩ ཟླ ༨ ཚེས ༢༧ ཉིན་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ཨ་རིིའི་རྒྱལ་ས་ཝ་ཤིང་ཀྲོང་ཏུ་རྟེན་གཞི་བྱས་པའི་སྐུ་ཚབ་དོན་གཅོད་ཁང་གིས་གཙོས་བོད་ཀྱི་གསར་ལས་ཁང་ཁག་དང་བོད་བརྒྱུད་ནང་བསྟན་གྱི་ཆོས་ཚོགས་སུ་གཞུང་འབྲེལ་འཚམས་གཟིགས་གནང་འདུག

ཕྱི་ལོ་ ༢༠༡༩ ཟླ ༨ ཚེས་ ༢༧ ཉིན་འཕྲོད་བསྟེན་བཀའ་བློན་མཆོག་ཨ་རིིའི་རྒྱལ་ས་ཝ་ཤོང་ཀྲོང་ཏུ་རྟེན་གཞི་བྱས་པའི་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་། ཨེ་ཤེ་ཡ་རང་དབང་རླུང་འཕྲིན་ཁང་། ཨ་རིའི་རླུང་འཕྲིན་ཁང་། འབྲི་གུང་ཆོས་ཀྱི་ཉི་མ་ཆོས་ཚོགས། རྭ་རྒྱ་དགོན་ཐེག་ཆེན་ནང་བསྟན་རིག་གཞུང་གླིང་བཅས་སུ་གཞུང་འབྲེལ་འཚམས་གཟིགས་ཕེབས་ཡོད་པ་རེད།

དེ་ཡང་གོང་ཚེས་ཀྱི་ཞོགས་པ་ཆུ་ཚོད་ ༩།༣༠ ཐོག་བཀའ་བློན་མཆོག་སྐུ་ཚབ་དོན་གཅོད་ཁང་དུ་ཕེབས་སྐབས་ལས་བྱེད་རྣམས་ཀྱིས་ཕེབས་བསུ་དང་། སྐུ་ཚབ་དོན་གཅོད་ནས་དོན་གཅོད་ཁང་དང་ལས་བྱེད་རྣམས་ཀྱིས་ཉིན་རེའི་ལས་དོན་གནང་ཕྱོགས་ངོ་སྤྲོད་ཞུས་འདུག

དེ་རྗེས་བཀའ་བློན་མཆོག་རྒྱལ་སྤྱིའི་བོད་དོན་ལས་འགུལ་ཁང་དུ་ཕེབས་ནས་ལས་འགུལ་ཁག་གི་འགན་འཛིན་གཞོན་པ་བསྟན་ཆོས་རྒྱ་མཚོ་ལགས་ནས་ཕེབས་བསུ་དང་སྦྲགས་ལས་ཁང་དང་ལས་བྱེད་རྣམས་ངོ་སྤྲོད་ཞུས་རྗེས། ལས་བྱེད་ཁག་གཅིག་གི་འཕྲོད་ལས་དང་འབྲེལ་བའི་དྲི་བར་བཀའ་བློན་ནས་ལན་འདེབས་གནང་འདུག དེ་ནས་ཆུ་ཚོད ༡༡།༣༠ ཐོག་ཨེ་ཤེ་ཡ་རང་དབང་རླུང་འཕྲིན་ལས་ཁང་དུ་ཕེབས་ནས་རླུང་འཕྲིན་ཁང་གི་འགན་འཛིན་གཞོན་པ་དཔལ་ལྡན་རྒྱལ་སོགས་ལས་བྱེད་ཁག་གཅིག་གིས་ཕེབས་བསུ་ཞུས་རྗེས་རྡོ་རྗེ་དགྲ་འདུལ་ལགས་ཀྱིས་ཐད་གཏོང་བཅར་འདྲི་ལས་རིམ་ལ་བཀའ་བློན་མཆོག་ནས་དང་ལེན་གནང་འདུག

ཉིན་གུང་ཆུ་ཚོད ༡ ཐོག་ཨ་རིའི་རླུང་འཕྲིན་ལས་ཁང་དུ་ཕེབས་ནས་འབྲེལ་ཡོད་འགན་འཛིན་བཀའ་ཟུར་བསྟན་འཛིན་རྣམ་རྒྱལ་མཆོག་གིས་གཙོས་ལས་བྱེད་ཁག་གཅིག་ནས་བཀའ་བློན་མཆོག་ལ་ཕེབས་བསུ་ཞུས། དེ་རྗེས་ལས་རིམ་གཙོ་སྐྱོང་བ་པ་སངས་དབྱངས་སྐྱིད་ལགས་ཀྱི་བཅར་འདྲི་ལས་རིམ་དང་ལེན་གནང་འདུག

ཕྱེད་ཡོལ་བཀའ་བློན་མཆོག་འབྲི་གུང་ཆོས་ཚོགས་སུ་མཆོད་མཇལ་གྲུབ་རྗེས། རྭ་རྒྱ་དགོན་ཐེག་ཆེན་ནང་བསྟན་རིག་གཞུང་གླིང་ལ་ཕེབས་ནས་ཤིང་བཟའ་རིན་པོ་ཆེ་བློ་བཟང་བསྟན་འཛིན་ཆོས་ཀྱི་རྒྱལ་མཚན་མཆོག་དང་མཇལ་ནས་དགོན་པར་མཆོད་མཇལ་ཞུས།

གོང་གསལ་སྡེ་ཚན་ཁག་དང་རླུང་འཕྲིན་གཉིས་བཅས་སུ་ཕེབས་སྐབས་བཀའ་བློན་མཆོག་ནས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་སྨན་བཅོས་ལྟ་སྐྱོང་ལས་གཞི་དང་ནད་གཅོང་སྔོན་འགོག་ལས་འཆར་སོགས་ཀྱི་སྐོར་ངོ་སྤྲོད་གནང་ཡོད་པ་བཅས།