ཕྱི་ལོ་ ༢༠༡༩ ཟླ་ ༨ ཚེས་ ༢༣ རེས་གཟའ་པ་སངས།
༄༅། །རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ཁི་རི་སི་མཐོ་སློབ་ཁང་ Christ University གིས་ལོ་ལྟར་སློབ་མ་རེ་ལ་གཟེངས་སུ་ཐོན་པའི་བསླབ་པ་མཐར་སོན་གྱི་གཟེངས་རྟགས་གནང་བའི་མཛད་སྒོ་འཚོགས་ཀྱི་ཡོད་པ་དང་། འདི་ལོ་མཐོ་སློབ་ཁང་གིས་བསྟན་འཛིན་བུ་འཁྲིད་ལགས་ནས་ཨིན་ཡིག་དང་རིག་གཞུང་ཐོག་རབ་འབྱམས་པའི་སློབ་སྦྱོང་གཟེངས་སུ་ཐོན་པ་གནང་ཡོད་པར་ངོས་འཛིན་དུ་ཕྱི་ལོ་ ༢༠༡༩ ལོའི་གཟེངས་སུ་ཐོན་པའི་བསླབ་པ་མཐར་སོན་གྱི་གཟེངས་རྟགས་དང་ཧིན་སྒོར་ ༧༠༠༠ སློབ་ཡོན་གྱི་ཚུལ་དུ་གནང་ཡོད་པར་བརྟེན། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་བསྟན་འཛིན་བུ་འཁྲིད་ལགས་ལ་དགའ་བསུའི་འཚམས་འདྲི་དང་ཡི་རངས་བསྔགས་བརྗོད་ཞུས་འདུག དེ་ཡང་བསྟན་འཛིན་བུ་འཁྲིད་ལགས་ཀྱིས་ཁི་རི་སི་མཐོ་སློབ་ཁང་དུ་ཨིན་ཡིག་དང་རིག་གཞུང་ཐོག་རབ་འབྱམས་པའི་གཟེངས་སུ་ཐོན་པའི་སློབ་སྦྱོང་གནང་ཞིང་། ད་ལྟའི་ཆར་བསྟན་འཛིན་བུ་འཁྲིད་ལགས་ཀྱིས་རྒྱལ་སྤྱིའི་ཁེ་ལས་ཚོགས་པ་ IBM ཨ་ཡི་བྷེ་ཨམ་ནང་ཕྱག་ལས་གནང་བཞིན་ཡོད་པ་དང་མ་འོངས་པར་མུ་མཐུད་སློབ་སྦྱོང་བྱ་འདོད་ཡོད་པ་རེད།
བསྟན་འཛིན་བུ་འཁྲིད་ལགས་ཀྱིས་གོང་གི་གཟེངས་རྟགས་དང་འབྲེལ་ནས་གསུང་དོན། འདས་པའི་ལོ་གཉིས་རིང་རང་ཉིད་ལ་ཤེས་རིག་ལས་ཁུངས་ནས་སློབ་ཡོན་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག་ཏུ། འབྱུང་འགྱུར་ཡང་དགོས་ངེས་ཅན་གྱི་སློབ་ཕྲུག་ཚོ་ལའང་དེ་ལྟ་བུའི་སློབ་ཡོན་ཐོབ་པའི་རེ་བ་ཡོད། ངས་སློབ་སྦྱོང་ཐོག་བརྒྱ་ཆ་ཡག་པོ་བླངས་ཐུབ་ཡོད་པས་སྦྱིན་བདག་རྣམ་པ་ཚོ་ཡིད་ལ་སྤོབས་པ་སྐྱེ་པའི་རེ་བ་ཡོད། བཙན་བྱོལ་དུ་ཡོད་པའི་ང་དང་ང་འདྲ་བའི་སློབ་ཕྲུག་ཚོར་དཔལ་འབྱོར་གྱི་རྒྱབ་སྐྱོར་གནང་མཁན་ཤེས་རིག་ལས་ཁུངས་ཀྱིས་གཙོས་ཚོགས་པ་སྐྱིད་སྡུག་ཁག་དང་མི་སྒེར་པ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
བསྟན་འཛིན་བུ་འཁྲིད་ལགས་ནི། ཀོ་ལི་གྷལ་དོན་ལྡན་གླིང་གཞིས་ཆགས་ནས་ཡིན་ཞིང་། གཞི་རིམ་སློབ་སྦྱོང་རྒྱ་གར་ལྷོ་ཕྱོགས་ཏ་མི་ལི་ན་དུ་མངའ་སྡེ་ཁོ་ནོར་གྲོང་སྡེའི་Coonoor ནང་རྟེན་གཞི་བྱས་པའི་ཡེ་ཤུའི་གཏན་འཇགས་སློབ་གྲྭ་ Christian boarding school, Stanes Anglo Indian higher secondary school ནས་ཐོན་རྗེས། ཇེ་ཡོ་ཏི་ནི་ཝ་སི་མཐོ་སློབ་ཁང་ Jyoti Nivas College ནས་འབྲེལ་ལམ་རིག་པ་དང་། ཨིན་ཇིའི་རྩོམ་རིག སེམས་ཁམས་རིག་པ་བཅས་ཀྱི་ཐོག་ཉེ་བའི་རབ་འབྱམས་པའི་སློབ་སྦྱོང་ལེགས་པར་མཐར་ཕྱིན་འདུག ཤེས་རིག་ལས་ཁུངས་བརྒྱུད་ཡེ་ཤེས་འཁོར་ལོ་ཐེབས་རྩ་ཁང་ནས་བསྟན་འཛིན་བུ་འཁྲིད་ལགས་ལ་ལོ་གཉིས་རིང་སློབ་ཡོན་གནང་འདུག་པ་བཅས། །
