ཕྱི་ལོ་ ༢༠༡༩ ཟླ་ ༨ ཚེས་ ༢༦ རེས་གཟའ་ཟླ་བ།

༄༅། །ཉེ་ཆར་རྒྱ་གར་གྱི་དཔལ་འབྱོར་བློན་ཆེན་ཟུར་པ་སྐུ་ཞབས་ཨ་རུན་ཇེ་ཊི་ལི་ Arun Jaitley མཆོག་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དམ་པ་ཁོང་གི་སྐུ་ཟླ་མཆོག་ལ་གདུང་སེམས་མཉམ་སྐྱེ་གནང་དོན།  “སྐུ་ཉིད་ཀྱི་སྐུ་ཟླ་སྐུ་ཞབས་ཨ་རུན་ཇེ་ཊི་ལི་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ང་རང་བློ་ཕམ་ཧ་ཅང་བྱུང་། ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྐུ་ཉིད་མཆོག་དང་ནང་མི་ཡོངས་ལ་སེམས་གསོ་ཞུ་རྒྱུ་ཡིན།

ངས་ཕྱི་ལོ་ ༢༠༡༡ ལོར་དམ་པ་ཁོང་དང་མཇལ་རྒྱུའི་གོ་སྐབས་བྱུང་། སྐབས་དེར་དམ་པ་ཁོང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བརྩི་ཡོད་སྐོར་གསུངས་པ་མ་ཟད། བོད་མི་ཚོར་ཡང་གདུང་སེམས་མཉམ་སྐྱེ་གནང་བྱུང་། དམ་པ་ཁོང་ནི་ལྷག་བསམ་གྱི་ཕྱུག་པའི་དབུ་ཁྲིད་ཁྱད་འཕགས་ཤིག་ཡིན་སྟབས་ཁོང་གི་བྱས་རྗེས་ནི་མུ་མཐུད་གནས་རྒྱུ་དང་། དེ་ལ་བརྟེན་ནས་མི་རབས་གཞོན་པ་ཚོར་བློ་སྟོབས་འཕེལ་གཞི་ཞིག་ཏུ་གྱུར་ཡོད། གཉན་འཕྲང་ཆེ་བའི་དུས་སྐབས་འདིར་ང་ཚོས་སྐུ་ཉིད་དང་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན།” ཞེས་འཁོད་འདུག

སྤྱིར་དམ་པ་ཁོང་དགུང་གྲངས་ ༦༦ ཕེབས་པ་དང་།  རྒྱལ་ས་ལྡི་ལིའི་ཨེམ་སི་སྨན་ཁང་AIIMS དུ་རེས་གཟའ་སྤེན་པའི་ཕྱེད་ཡོལ་དུ་འདས་གྲོངས་སུ་གྱུར་བ་བཅས།