ཕྱི་ལོ་ ༢༠༡༩ ཟླ་ ༨ ཚེས་ ༣༠ རེས་གཟའ་པ་སངས།

༄༅། །བོད་མིའི་སྒྲིག་འཛུགས་དང་ལ་སྤྱི་ལས་ཁུངས་ཐུན་མོང་ནས་ཉེ་སྔོན་རྒྱ་གར་གཞུང་གིས་ལ་དྭགས་དེ་བཞིན་རྒྱ་གར་དབུས་གཞུང་ནས་ཐད་ཀར་འཛིན་སྐྱོང་སྟངས་འཛིན་བྱས་པའི་དབུས་འཛིན་མངའ་ཁུལ་Union Territory དུ་ངོས་འཛིན་གནང་བར་རྟེན་འབྲེལ་མཚོན་སླད་དགོང་ཚིགས་གསོལ་སྟོན་རྒྱས་པ་ཞིག་གོ་སྒྲིག་གནང་ཡོད།

དེ་ཡང་གསོལ་སྟོན་མཛད་སྒོའི་སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་སྐུ་ཞབས་དབང་རྒྱལ་ Gyal P.Wangyal ལགས་དང་། ཆེ་བསྟོད་སྐུ་མགྲོན་རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག རྒྱ་གར་གྲོས་ཚོགས་འོག་མའི་འཐུས་མི་ཐུབ་བསྟན་ཚེ་དབང་ལགས། དེ་སྔའི་གྲོས་ཚོགས་འཐུས་མི་ཐུབ་བསྟན་ཚེ་དབང་ལགས། མངའ་སྡེའི་གྲོས་ཚོགས་གོང་མའི་འཐུས་མི་ཟུར་པ་ཚེ་རིང་རྡོ་རྗེ་ལགས།  ཨན་ཇུ་མན་ཨི་མ་མི་ཡ་ Anjuman Imamia ཞེས་པའི་ཁ་ཆེ་ཚོགས་པའི་ཚོགས་གཙོ་ཨཤ་རཕ་སྦར་ཅ་ Ashraf Barcha ལགས། ལ་དྭགས་དགོན་པ་ཚོགས་པའི་ཚོགས་གཙོ་བཤད་སྒྲུབ་བྱམས་པ་ལགས། ལ་དྭགས་ནང་པ་ཚོགས་པའི་ Ladakh Buddhist Association ཚོགས་གཙོ་ཀུན་བཟང་ལགས། མོན་ཨུལ་ཨི་སི་ལམ་ Mon-ul-Islam ཞེས་པའི་ཁ་ཆེ་ཚོགས་པའི་ཚོགས་གཙོ་ཀ་ཡུམ་ Dr Kayum ལགས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་མི་རྣམ་པ། སྡེ་ཚན་ཁག་གི་འགན་འཛིན་རྣམ་པ་སོགས་ཁྱོན་སྐུ་མགྲོན་ ༡༠༠ ཕེབས་ཡོད།

སྐབས་དེར་སྐུ་མགྲོན་གཙོ་བོ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་དེད་དཔོན་སྐུ་ཞབས་དབང་རྒྱལ་ལགས་ཀྱིས་བོད་མིའི་སྒྲིག་འཛུགས་དང་ལ་སྤྱི་ལས་ཁུངས་ནས་དགོང་ཚིགས་གསོལ་སྟོན་གྱི་མཛད་སྒོ་གོ་སྒྲིག་གནང་བར་ཐུགས་རྗེ་ཆེ་ཞུས་པ་འབྲེལ་ལ་དྭགས་པ་རྣམས་ནས་ལོ་ངོ་བཅུ་ཕྲག་བདུན་ཙམ་རིང་འབད་བརྩོན་ལྷོད་མེད་གནང་བ་དེ་མཇུག་སྒྲིལ་ཡོད་པ་དང་། ལོ་ངོ་བཅུའི་ནང་བོད་དོན་བདེན་མཐའ་གསལ་བའི་ཡིད་ཆེས་ཡོད་སྐོར་སོགས་གསུང་། །