ཕྱི་ལོ་ ༢༠༡༩ ཟླ་ ༨ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༨ ཚེས་ ༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་གྱི་མངའ་སྡེ་གུ་ཇི་ར་ཏིའི་གྲོང་ཁྱེར་ཝ་དོ་དར་རྟེན་གཞི་བྱས་པའི་པ་རུལ་ Parul University མཐོ་སློབ་ཁང་གི་ཚོགས་ཁང་དུ་མཐོ་སློབ་ཁང་གི་དགེ་ལས་སློབ་ཕྲུག་རྣམས་ལ་གསུང་བཤད་གནང་དོན། རྒྱ་གར་དང་བོད་གཉིས་བར་ལས་འབྲེལ་ཡོད་པའི་ཆ་ནས་འདས་པའི་ལོ་ངོ་ ༦༠ རིང་རྒྱ་གར་གཞུང་མང་གཉིས་ནས་བཙན་བྱོལ་བོད་མི་རྣམས་ལ་བྱམས་སྐྱོང་གནང་ཡོད་པ་མ་ཟད། བོད་ཀྱི་འཐབ་རྩོད་ལའང་རོགས་རམ་བླ་ན་མེད་པ་གནང་ཡོད། དུས་རབས་ ༧ དང་༨ པའི་ནང་བོད་ཀྱི་མཁས་པ་རྣམ་པ་ཚོས་རྒྱ་གར་ནས་ལེགས་སྦྱར་གྱི་སྐད་ཡིག་སྦྱངས་ཏེ་བཀའ་བསྟན་འགྱུར་སོགས་ཀྱིས་མཚོན་པའི་ནང་པའི་གཞུང་ཆེན་ཁག་བོད་ཀྱི་སྐད་ཡིག་ཏུ་བསྒྱུར་ནས་དཔལ་ནཱ་ལེནྡྲའི་ཆོས་བརྒྱུད་བོད་ནང་དར་སྤེལ་ཧ་ཅང་གནང་ཡོད།
རྒྱ་གར་ནི་སྐྱེས་བུ་དམ་པ་མང་པོ་བྱོན་པའི་གནས་ཁྱད་འཕགས་ཅན་ཞིག་ཡིན་ཞིང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནི་རྒྱ་གར་གྱི་བདག་ཉིད་ཆེན་པོ་གྷན་ངྷི་མཆོག་གི་འཚེ་མེད་ཞི་བའི་ལྟ་གྲུབ་ལ་ཡི་རངས་མཛད་མཁན་ཞིག་ཡིན། རྒྱ་གར་དང་བོད་གཉིས་བར་ཆོས་དང་རིག་གཞུང་། ས་བབ། ལོ་རྒྱུས། ཁོར་ཡུག་སོགས་ཀྱི་འབྲེལ་བ་ཡོད་པ་མ་ཟད། ཐ་ན་བོད་མི་ཚོས་རྒྱ་གར་གྱི་འཚེ་མེད་ཞི་བའི་ལྟ་གྲུབ་ལ་བརྟེན་ནས་རང་དབང་འཐབ་རྩོད་བྱེད་ཀྱི་ཡོད། རྒྱ་གར་དང་བོད་གཉིས་ཀྱི་འབྲེལ་བ་ནི་སྤྱིར་བཏང་ཞིག་མ་ཡིན་པར། བླ་མ་དང་སློབ་མའི་བར་གྱི་འབྲེལ་བ་ཡོད། རྒྱ་གར་གྱི་གནའ་རབས་ཀྱི་ལེགས་བཤད་དེ་དག་བོད་མི་ཚོས་བདག་གཉེར་བྱས་ཐུབ་ཡོད། ཁོར་ཡུག་གི་ཆ་ནས་བཤད་ནའང་བོད་ནི་ཨེ་ཤི་ཡའི་ཆུ་མཛོད་ལྟ་བུ་ཡིན་པས། བོད་ཀྱི་གཙང་པོ་ཆེ་ཁག་རྒྱ་གར་ནང་ཡོང་གི་ཡོད།
ཕྱི་ལོ་ ༡༩༥༠ དང་ ༡༩༦༠ ནང་རྒྱ་ནག་དམར་ཤོག་གཞུང་གིས་བོད་ཀྱི་དགོན་སྡེ་ཁག་གཏོར་བཤིག་དང་གྲྭ་བཙུན་རྣམས་སྐྱ་སར་བབས་བཅུག་ཡོད། བོད་མི་ཚོ་རྒྱ་གར་ནང་བཙན་བྱོལ་དུ་འབྱོར་རྗེས་སྔར་བོད་ནང་དགོན་སྡེ་ཁག་ཉམས་པ་རྣམས་རྒྱ་གར་ནང་བསྐྱར་གསོ་གནང་ཐུབ་ཡོད། ཅེས་སོགས་ཀྱི་གསུང་བཤད་གནང་ཡོད་པ་མ་ཟད། དཔལ་ལྡན་སྲིད་སྐྱོང་མཆོག་གིས་པ་རུལ་མཐོ་སློབ་ཁང་གི་འགན་འཛིན་དེ་ཝན་ཤུ་པ་ཌེལ་ Deevanshu Patel ལགས་ཀྱིས་ཤེས་ཡོན་ཐོག་འགྲོ་གྲོན་བཏང་གནང་བར་ཐུགས་རྗེ་ཆེ་ཞུས་པ་དང་འབྲེལ་དྲི་བ་ཁག་ལ་ལན་འདེབས་ཞིབ་རྒྱས་གནང་ཡོད་པ་བཅས། །
